ଗଣ୍ଡତୁରୁମ, ୨୪।୧୨ (ଡି.ଏନ୍.ଏ.)-
ଉତ୍ତର ପ୍ରଦେଶ କାନପୁର ଜିଲା ରସୁଲ୍ଲାବାଦ ଗଁାର ସୁରଜ ଗୁପ୍ତା(୨୩)। ସେ ଆଜ୍କେ ୨ ବଛର ହେଲା ବରଗଡ଼ ଜିଲାକେ କମେଇ ଖାଏବାର ଲାଗି ଆସିଛନ୍। ସୁରଜ ନିଜେ ବମ୍ବେଇ ଲଡୁ ତିଆର କରବାର ସଂଗେ ଗଁା ଗଁା ବୁଲି ବିକି ଦୁଇପଏସା ରୁଜ୍ଗାର କରୁଛନ୍।
ସୂଚନା ଅନ୍ସାରେ ବାପ୍ ସିପାହୀ ଲାଲ ଆର ମା’ ସୁରଜମୁଖୀକଁର ଗୁଟେବଲି ପୁଓ ହେଉଛନ୍ ସୁରଜ ଗୁପ୍ତା। ପରିବାରଟା ନିହାତି ଗରିବ୍, ଜମିବାଡ଼ି ବଲି କିଛି ନାଇଁ। ଗଁାରେ କାମ୍ଧଁଦା ଅଭାବୁ ସେ ଇ ବେପାରକେ ଆଦ୍ରି ନେଇଛନ୍। ସୁରଜ ଦିନେ ପୁରୀ ମନ୍ଦିର ଦରଶନ ଲାଗି ଟ୍ରେନରେ ଆସୁଥିଲାବେଲେ ବମ୍ବେଇ ଲଡୁର ଚାହିଦା ଦେଖିଥିଲେ। ଇତାର ପରେ ସେ ଘରକେ ଫିରି ଉନିଆମାନକରନୁ ବମ୍ବେଇ ଲଡୁ ତିଆରି ଶିଖିଥିଲେ। ପଛେ ନିଜେ ଧାରଉଧାର କରି ୧୫ ହଜାର ଟଁକାରେ ବମ୍ବେଇ ଲଡୁ ତିଆର କରବାର ଗୁଟେ ମେଶିନ ଘିନି ବେପାର ଆରମ୍ କରିଥିଲେ। ସୁରଜ ବରଗଡ଼ରେ ଗୁଟେ ଘର ଭଡ଼ା ନେଇ ରହୁଛନ୍। ସେଠାନେ ବମ୍ବେଇ ଲଡୁ ତିଆର କରୁଛନ୍। ସେ ଫିବଛର ରାକ୍ଷୀ ପୂନିକେ ବରଗଡ଼ ଆସି ଜୁନ ମାସେ ଗଁାକେ ଫିରୁଛନ୍। ଲାଲ୍ ଟହଟହ ରୁଆମୁଡ଼ା ଲେଖେଁ ଦିଶୁଥିବାର ବମ୍ବେଇ ଲଡୁଟା ଛୁଆଠାନୁ ବୁଢ଼ା ତକ୍ ସମକିରି ପସନ୍। ଦେଖ୍ଲେ ଲାଲ୍ ଥିପିପଡ଼ବା। ହେଲେ ବମ୍ବେଇ ଲଡୁ ଯେତେ ଖାଏଲେ ପେଟ୍ ନାଇଁପୂରେ। ବମ୍ବେଇ ଲଡୁ ତିଆରି ଲାଗି ଦରକାର ପଡ଼ୁଥିବାର ଚିନି, ମଇଦା, ରଂଗ, ଲେମଉ ଆର ପ୍ୟାକିଂ ଲାଗି ପଲିଥିନ୍ ଖରଚ୍ ଯାଇ ଦିନ୍କ ୩ଶହ ଟଁକା ମିଲୁଥିବାର ସୁରଜ କହିଛନ୍।