ବରଗଡ଼ ଅଫିସ,୬ା୫: ଝାଡ଼ଖଣ୍ଡରୁ ଅତାବିରାରେ ମଙ୍ଗଳବାର ପହଞ୍ଚିଥିବା ଏକ ପ୍ରବାସୀ ଶ୍ରମିକ ପରିବାର ଆଶ୍ରୟ ଟିକିଏ ପାଇଁ ବାରଓଳି ଶୁଣ୍ଢିପିଣ୍ଡା ହୋଇଥିଲେ। ସେମାନେ ପୂର୍ବରୁ ଏକ ଘରଭଡ଼ା ନେଇଥିଲେ ସୁଦ୍ଧା ଘରମାଲିକ ସେମାନଙ୍କୁ ରଖିବାକୁ ମନା କରି ଦେଇଥିଲେ। ସେହିପରି ସ୍ଥାନୀୟ ପୋଲିସ, ପ୍ରଶାସନର ଦୃଷ୍ଟି ଆକର୍ଷଣ ସତ୍ତ୍ବେ ସେମାନଙ୍କୁ କିଛି ସୁଫଳ ମିଳି ନ ଥିଲା। ଫଳରେ ସେମାନେ ରାସ୍ତାପାର୍ଶ୍ୱରେ ଏବଂ ଏକ ମନ୍ଦିର ସମ୍ମୁଖରେ ଦୀର୍ଘ ସମୟ ଧରି ଖୋଲା ଆକାଶତଳେ ରହିଥିଲେ। ଏ ନେଇ ବରଗଡ଼ ଜିଲା ପାଇକମାଳ ବ୍ଲକ ଅନ୍ତର୍ଗତ ଟେମରି ଗ୍ରାମର ସାମାଜିକ କର୍ମୀ ଦୀପା ବାରିକ ବରଗଡ଼ ଜିଲାପାଳଙ୍କୁ ଫୋନ୍ କରି ଜଣାଇଥିଲେ । ତଥାପି କୌଣସି ସନ୍ତୋଷଜନକ ଉତ୍ତର ନ ପାଇ ଦୀପା ମୁଖ୍ୟମନ୍ତ୍ରୀ, ସ୍ବତନ୍ତ୍ର ରିଲିଫ କମିଶନର(ଏସ୍ଆରସି) ପ୍ରଦୀପ ଜେନା ପ୍ରମୁଖଙ୍କୁ ଟୁଇଟ୍ କରି ନିଜର କ୍ଷୋଭ ପ୍ରକାଶ ସହିତ ସମ୍ପୃକ୍ତ ପ୍ରବାସୀ ଶ୍ରମିକଙ୍କୁ ଆଶ୍ରୟ ଦେବାକୁ ନିବେଦନ କରିଥିଲେ। ଏହାପରେ ଏସ୍ଆରସି ତତ୍କାଳ ବରଗଡ଼ ଜିଲାପାଳଙ୍କୁ ସେହି ପ୍ରବାସୀ ଶ୍ରମିକଙ୍କୁ ଆଶ୍ରୟ ଦେବା ବ୍ୟବସ୍ଥା କରିବା ସହିତ ବୁଧବାର ସୁଦ୍ଧା ସେ ନେଇ ଏକ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିଲେ । ପରେ ସମ୍ପୃକ୍ତ ପ୍ରବାସୀ ଶ୍ରମିକଙ୍କୁ ଲାଦେରପାଲିର ଏକ ଘରେ ରାତାରାତି ଆଶ୍ରୟ ଦିଆଯାଇଥିଲା। ଏସ୍ଆରସିଙ୍କ ଏଭଳି ତ୍ୱରିତ୍ ପଦକ୍ଷେପ ଯୋଗୁ ମଙ୍ଗଳବାର ରାତ୍ରିରେ ହୋଇଥିବା ଝଡ଼ବର୍ଷା, ବଜ୍ରପାତରୁ ଏହି ପ୍ରବାସୀ ପରିବାର ରକ୍ଷା ପାଇଯାଇ ଥିବାବେଳେ ଏଥିପାଇଁ ସାମାଜିକ କର୍ମୀ ଦୀପା ଏସ୍ଆରସି ଜେନାଙ୍କୁ ଅନ୍ୟ ଏକ ଟୁଇଟ୍ରେ ଧନ୍ୟବାଦ ଜଣାଇଛନ୍ତି।