ଓ୍ବେଲିଂଟନ,୧।୫(ପି.ଟି.): ଅଭିଜ୍ଞ ବ୍ୟାଟ୍ସମ୍ୟାନ ରସ୍ ଟେଲର ସମ୍ମାନଜନକ ନ୍ୟୁଜିଲାଣ୍ଡ କ୍ରିକେଟର ଅଫ୍ ଦି ଇୟର ପୁରସ୍କାର ହାସଲ କରିଛନ୍ତି। ତାଙ୍କୁ ଏହି କ୍ରମରେ ସାର୍ ରିଚାର୍ଡ ହାର୍ଡଲି ମେଡାଲ ପ୍ରଦାନ କରାଯାଇଛି। ସବୁ ୩ଟି ଯାକ ଫର୍ମାଟରେ ଉନ୍ନତ ପ୍ରଦର୍ଶନ କରି ସେ ତୃତୀୟଥର ପାଇଁ ଏହି ପଦକ ହାସଲ କରିଛନ୍ତି।
ପୂର୍ବତନ ତାରକା ବ୍ୟାଟ୍ସମ୍ୟାନ ଷ୍ଟିଫାନ ଫ୍ଲେମିଂଙ୍କୁ ପଛରେ ପକାଇ ସେ ଟେଷ୍ଟ ଫର୍ମାଟରେ ସର୍ବାଧିକ ରନ୍ ସଂଗ୍ରହକାରୀ ବ୍ୟାଟ୍ସମ୍ୟାନର ମାନ୍ୟତା ପାଇଥିଲେ। ସେ ମଧ୍ୟ ନ୍ୟୁଜିଲାଣ୍ଡର ପ୍ରଥମ କ୍ରିକେଟର ଭାବେ ୩ଟି ଯାକ ଫର୍ମାଟରେ ୧୦୦ ମ୍ୟାଚ୍ ଖେଳିବାର ଗୌରବ ଅର୍ଜନ କରିଛନ୍ତି। ଗତ ସେସନରେ ୩ଟି ଫର୍ମାଟକୁ ବିଚାର କଲେ ସେ ୧୩୮୯ ରନ ସଂଗ୍ରହ କରିଛନ୍ତି। ତାଙ୍କ ଦମ୍ଦାର ପ୍ରଦର୍ଶନ ବଳରେ ନ୍ୟୁଜିଲାଣ୍ଡ ଗତ ବିଶ୍ୱକପ୍ରେ ଫାଇନାଲରେ ପ୍ରବେଶ କରିଥିଲା। ତେବେ ନ୍ୟୁଜିଲାଣ୍ଡ ବିଶ୍ୱକପ୍ ଫାଇନାଲରେ ଆୟୋଜକ ଇଂଲଣ୍ଡଠାରୁ ରୋମାଞ୍ଚକ ଫାଇନାଲ ମାଚ୍ରେ ପରାସ୍ତ ହୋଇ ରନର୍ସଅପ୍ ବିବେଚିତ ହୋଇଥିଲା। ପୂର୍ବତନ ମହାନ୍ ନ୍ୟୁଜିଲାଣ୍ଡ କ୍ରିକେଟର ରିଚାର୍ଡ ହାର୍ଡଲି ଟେଲରଙ୍କୁ ଏଥିପାଇଁ ଅଭିନନ୍ଦନ ଜଣାଇଛନ୍ତି।
ଅପରପକ୍ଷରେ ଅଭିଜ୍ଞ୍ୟ ଦ୍ରୁତ ବୋଲର ଟିମ୍ ସୌଦିଙ୍କୁ ଶ୍ରେଷ୍ଠ ବୋଲର ଭାବେ ପୁରସ୍କୃତ କରାଯାଇଛି। ତାଙ୍କୁ ଟେଷ୍ଟ ପ୍ଲେୟାର ଅଫ୍ ଦି ଇୟର ପୁରସ୍କାର ପ୍ରଦାନ କରାଯାଇଛି। ଗତ ସେସନରେ ସୌଦି ୧୬.୪ ରନ ହାରରେ ୪ଟି ଟେଷ୍ଟ ମ୍ୟାଚ୍ରୁ ୨୫ଟି ଉଇକେଟ ହାସଲ କରିଥିଲେ।