ଗୋପ,୩।୪(ଡି.ଏନ.ଏ.): କରୋନାକୁ ନେଇ ଏବେ ସାରା ବିଶ୍ବ ଚିନ୍ତା କରୁଥିବା ବେଳେ ଗ୍ରାମାଞ୍ଚଳରେ ମଧ୍ୟ ଲୋକମାନେ ଲକଡାଉନକୁ ସମର୍ଥନ ଜଣାଇ ବାହାରକୁ ବାହାରୁ ନାହାନ୍ତି। ପ୍ରଶାସନ ଓ ପୋଲିସ ପକ୍ଷରୁ ଗଁା ଗଁା ବୁଲି ଲୋକଙ୍କୁ ଘରେ ରହିବାକୁ ସଚେତନ କରିବା ସହ ମାସ୍କ, ସାନିଟାଇଜର ବ୍ୟବହାର କରିବାକୁ କହୁଛନ୍ତି। ସାଧାରଣ ଲୋକ ମାନଙ୍କର ଏବେ ଏହି ରୋଗର ସଂକ୍ରମଣ ରୋକିବାକୁ ମାକ୍ସର ଅଭାବ ପରିଲକ୍ଷିତ ହେଉଛି। ଏହାକୁ ଆଖି ଆଗରେ ରଖି ଅଲ ଇଣ୍ତିଆ ଟେଲର ମହାସଂଘ ପକ୍ଷରୁ ମାକ୍ସ ବଣ୍ଟନ କରାଯାଇଛି। ଗୋପ ବ୍ଲକ ଟେଲର ସଂଘର ସଂପାଦିକା ସରୋଜିନୀ ପ୍ରଧାନଙ୍କ ନେତୃତ୍ୱରେ ଗୋପର ଅସ୍ଥାୟୀ ହାଟ, ବଜାର, ବେଗୁନିଆ, କୁସୁପୁର, ଗଣେଶ୍ୱରପୁର, ନାଗପୁର ଆଦି ସମେତ ବିଭିନ୍ନ ସ୍ଥାନରେ ଲୋକମାନଙ୍କୁ ଏକ ହଜାରରୁ ଅଧିକ ମାକ୍ସ ବଣ୍ଟନ କରାଯାଇଛି। ବିଶେଷ କରି ଗୋପ ବ୍ଲକର ଅଧିକାଂଶ ଗାଁରେ ଏହି ମାକ୍ସ ବଣ୍ଟନ ଉପରେ ଗୁରୁତ୍ୱ ଦିଆଯାଇଛି ବୋଲି ସମ୍ପାଦିକା ପ୍ରଧାନ କହିଛନ୍ତି।