ନୂଆଦିଲ୍ଲୀ,୬।୯(ପିଟି): ନୂଆକରି ଭାରତୀୟ ଦଳର ବ୍ୟାଟିଂ କୋଚ୍ ନିଯୁକ୍ତ ହୋଇଥିବା ବିକ୍ରମ ରାଠୋର ଶୁକ୍ରବାର କହିଛନ୍ତି, ଦଳର ଟେଷ୍ଟ ଓପନିଂ ସ୍ଲଟ ଓ ଦିନିକିଆରେ ମଧ୍ୟକ୍ରମର ବ୍ୟାଟ୍ସମ୍ୟାନଙ୍କ ପ୍ରଦର୍ଶନ ମୁଖ୍ୟ ଚିନ୍ତାର କାରଣ। ଗୁରୁବାରଠାରୁ ତାଙ୍କ କାର୍ଯ୍ୟକାଳ ଆରମ୍ଭ ହୋଇଛି। ଦକ୍ଷିଣ ଆଫ୍ରିକା ବିପକ୍ଷ ଟି୨୦ ଓ ଟେଷ୍ଟ ସିରିଜ୍ ତାଙ୍କ ପାଇଁ ପ୍ରଥମ ଚ୍ୟାଲେଞ୍ଜ। ଦିନିକିଆ ଦଳର ମଧ୍ୟକ୍ରମ ବ୍ୟାଟ୍ସମ୍ୟାନଙ୍କ ପ୍ରଦର୍ଶନ ସେତେଟା ଭଲ ନାହିଁ। ଏହାର ସମାଧାନ ବାହାର କରିବାକୁ ପଡ଼ିବ। ଚିନ୍ତାର ଆଉ ଏକ ବିଷୟ ହେଉଛି ଟେଷ୍ଟ ଦଳର ଓପନିଂ ସ୍ଲଟ। ଆମ ନିକଟରେ ବହୁ ବିକଳ୍ପ ରହିଛି। ଜବରଦସ୍ତ ପ୍ରତିଦ୍ୱନ୍ଦ୍ୱିତା ମଧ୍ୟ ରହିଛି। କିନ୍ତୁ ଆମକୁ ନିୟମିତ ପ୍ରଦର୍ଶନ କରୁଥିବା ବ୍ୟାଟ୍ସମ୍ୟାନ ଚିହ୍ନଟ କରିବାକୁ ପଡ଼ିବ ବୋଲି ରାଠୋର କହିଛନ୍ତି। ଶ୍ରେୟାସ ଆୟାର ଗତ କିଛି ମ୍ୟାଚ୍ରେ ଭଲ ପ୍ରଦର୍ଶନ କରିଛନ୍ତି। ଆମ ନିକଟରେ ମନୀଷ ପାଣ୍ଡେ ମଧ୍ୟ ଅଛନ୍ତି। ଏହି ଦୁଇ ବ୍ୟାଟ୍ସମ୍ୟାନ ଘରୋଇ କ୍ରିକେଟ ଓ ଭାରତ ଏ’ ପାଇଁ ପ୍ରଦର୍ଶନ ଭଲ କରିଛନ୍ତି। ଏମାନେ ଜାତୀୟ ସ୍ତରରେ ମଧ୍ୟ କାର୍ଯ୍ୟ କରିବାକୁ ଦକ୍ଷ। ଏଥିରେ ମୁଁ ନିଶ୍ଚିତ ଅଛି। ସେମାନଙ୍କୁ ନିରବଚ୍ଛିନ ସମର୍ଥନ ଓ ଅଧିକରୁ ଅଧିକ ସୁଯୋଗ ଦେବା ଦରକାର, ଯଦ୍ଦ୍ବାରା ଦୁହେଁ ଲମ୍ବା ସମୟ ପାଇଁ ଖେଳିପାରିବେ ବୋଲି ସେ କହିଛନ୍ତି। ତାଙ୍କ ନିଯୁକ୍ତିକୁ ନେଇ ବହୁ ବିବାଦ ଦେଖାଦେଇଥିଲା। ସେ ସଞ୍ଜୟ ବାଙ୍ଗରଙ୍କ ସ୍ଥାନ ନେଇଛନ୍ତି। ପୂର୍ବତନ ଡାହାଣହାତୀ ବ୍ୟାଟ୍ସମ୍ୟାନ ୬ ଟେଷ୍ଟ ଓ ୭ ଦିନିକିଆ ଖେଳିଛନ୍ତି।