ଟେଷ୍ଟ କ୍ରିକେଟରେ ଏମିତି ଏକ ରେକର୍ଡ ଅଛି, ଯାହା ପ୍ରାୟ ପ୍ରଶଂସକଙ୍କୁ ଜଣା ନ ଥିବ। ଟେଷ୍ଟରେ ଯେକୌଣସି ଉଇକେଟ ପାଇଁ ସର୍ବାଧିକ ଭାଗୀଦାରିର ରେକର୍ଡ ଶ୍ରୀଲଙ୍କାର ପୂର୍ବତନ କ୍ରିକେଟର ମାହେଲା ଜୟବର୍ଦ୍ଧନେ ଓ କୁମାର ସଙ୍ଗକାରାଙ୍କ ନାମରେ ରହିଛି। ଦୁହେଁ ୨୦୦୬ରେ କଲମ୍ବୋଠାରେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ରେ ୩ୟ ଉଇକେଟ ଲାଗି ୬୨୪ ରନ୍ କରିଥିଲେ। ଏହା କ୍ରିକେଟ ଇତିହାସର ସବୁଠୁ ବଡ଼ ଭାଗୀଦାରି। ଉକ୍ତ ଇନିଂସରେ ଜୟବର୍ଦ୍ଧନେ ୩୭୪ ଓ ସଙ୍ଗକାରା ୨୮୭ ରନ୍ କରିଥିଲେ। ଏହି ଶ୍ରୀଲଙ୍କା ଯୋଡ଼ି ପଛକୁ ରହିଛି ସେହି ଦେଶର ଆଉ ଏକ ଯୋଡ଼ି। ରୋଶନ ମହାନାମା ଓ ସନଥ ଜୟସୁରିୟା ୧୯୯୭ କଲମ୍ବୋଠାରେ ଭାରତ ବିପକ୍ଷରେ ଦ୍ୱିତୀୟ ଉଇକେଟ ପାଇଁ ୫୭୬ ରନ୍ ଭାଗୀଦାରି କରିଥିଲେ। ଏହା ସେତେବେଳେ ସର୍ବାଧିକ ଭାଗୀଦାରି ଥିଲା। ମ୍ୟାଚ୍ରେ ଜୟସୁରିୟା ୩୪୦ ଓ ମହାନାମା ୨୨୫ ରନ୍ର ଇନିଂସ ଖେଳିଥିଲେ। ଉକ୍ତ ମ୍ୟାଚ୍ରେ ଶ୍ରୀଲଙ୍କା ୬ ଉଇକେଟ କ୍ଷତିରେ ୯୫୨ ରନ୍ କରିଥିଲେ, ଯାହାକି ଟେଷ୍ଟ ଇତିହାସରେ ସର୍ବାଧିକ ଦଳଗତ ସ୍କୋର। ପାକିସ୍ତାନର ମୁଦାସର ନଜର ଓ ଜାଭେଦ ମିଆଁଦାଦ (୪୫୧), ଅଷ୍ଟ୍ରେଲିଆର ଆଡାମ ଭୋଗସ ଓ ଶନ ମାର୍ଶ (୪୪୯), ଶ୍ରୀଲଙ୍କାର ମାର୍ଭାନ ଆଟାପାଟୁ ଓ କୁମାର ସଙ୍ଗକାରା (୪୩୮), ମାହେଲା ଜୟବର୍ଦ୍ଧନେ ଓ ଥିଲନ ସମରଓ୍ବିରା (୪୩୭)ଙ୍କ ଭଳି ସର୍ବାଧିକ ଭାଗୀଦାରି ତାଲିକାରେ ରହିଛି। ଏହି ତାଲିକାରେ ଭାରତୀୟ ବ୍ୟାଟ୍ସମ୍ୟାନଙ୍କ ନାମ ନାହିଁ। ହେଲେ ପୂର୍ବତନ ଭାରତୀୟ ଅଧିନାୟକ ରାହୁଲ ଡ୍ରାଭିଡ୍ ଓ ଭି.ଭି.ଏସ୍. ଲକ୍ଷ୍ମଣ ୨୦୦୩-୦୪ ଆଡିଲେଡ୍ ଟେଷ୍ଟରେ ୫ମ ଉଇକେଟ ପାଇଁ ୩୦୩ ରନ୍ର ଭାଗୀଦାରି କରିଥିଲେ।
