ମୁମ୍ବାଇ, ୨୩।୫: କରୋନା ଭାଇରସ୍ ଲକଡାଉନ୍ ସରିବା ପରେ ଟେଷ୍ଟ ଖେଳ ଆରମ୍ଭ କରିବା ନେଇ ବୋଲରମାନେ ଲକ୍ଷ୍ୟ ରଖିଛନ୍ତି। ତେବେ ଟେଷ୍ଟ ଖେଳିବା ପାଇଁ ବୋଲରମାନଙ୍କୁ ୨ ମାସର ପ୍ରସ୍ତୁତି ଆବଶ୍ୟକ ବୋଲି ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ତରଫରୁ କୁହାଯାଇଛି। ଅନ୍ୟ କ୍ରୀଡ଼ା ଭଳି କ୍ରିକେଟ ମଧ୍ୟ କୋଭିଡ୍-୧୯ ମହାମାରୀ କାରଣରୁ ସସ୍ପେଣ୍ଡ ହୋଇଛି। ତେବେ ଏବେ କ୍ରିକେଟର ପ୍ରତ୍ୟାବର୍ତ୍ତନ ପାଇଁ ସମସ୍ତେ ତତ୍ପର ହୋଇଉଠିଛନ୍ତି। ବିଭିନ୍ନ ଦେଶରେ ଏବେ ଲକ୍ଡାଉନ୍ ଉଠିବାକୁ ଯାଉଛି। ବିଭିନ୍ନ ଦେଶର ସରକାରମାନେ ମଧ୍ୟ ନୂଆ ନିର୍ଦ୍ଦେଶନାମା ଜାରି କରିଛନ୍ତି।
ଚଳିତ ସପ୍ତାହରେ ଇଂଲଣ୍ଡ ଖେଳାଳିମାନେ ବ୍ୟକ୍ତିଗତ କୌଶଳ ଆଧାରିତ ପ୍ରଶିକ୍ଷଣ କରିଛନ୍ତି। କାଉଣ୍ଟ କ୍ରିକେଟ ମଧ୍ୟ ସାମାନ୍ୟ ବିଳମ୍ବରେ ଆୟୋଜନ ହେବ। ଜୁଲାଇରେ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟ ଟେଷ୍ଟ ସିରିଜ ଖେଳାଯିବାର ଯଥେଷ୍ଟ ସମ୍ଭାବନା ରହିଛି। ଅଗଷ୍ଟରେ ପାକିସ୍ତାନ ମଧ୍ୟ ଇଂଲଣ୍ଡ ଗସ୍ତ କରି ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଓ ଟି୨୦ ସିରିଜ ଖେଳିବା କାର୍ଯ୍ୟକ୍ରମ ରହିଛି। ଏହି ସିରିଜ୍ ଗୁଡିକ ଫାଙ୍କା ଷ୍ଟାଡିୟମରେ ଖେଳାଯିବ ବୋଲି ଆଶା କରାଯାଉଛି।
ଟେଷ୍ଟ ଖେଳାଗଲେ ବୋଲରମାନେ ପ୍ରକୃତ ଚ୍ୟାଲେଞ୍ଜ୍ର ସମ୍ମୁଖୀନ ହେବେ। ଦୀର୍ଘ ଦିନ ପରେ କ୍ରିକେଟ ଖେଳିବାକୁ ଯାଉଥିବାରୁ ବୋଲରମାନେ ଇଞ୍ଜୁରିର ସମ୍ମୁଖୀନ ହେବା ଯଥେଷ୍ଟ ସମ୍ଭାବନା ରହିଛି। ବୋଲରମାନଙ୍କ କାର୍ଯ୍ୟଭାର କମାଇବା ଉପରେ ଆଇସିସି ଅଧିକ ଗୁରୁତ୍ୱ ଦେଇଛି। ଟେଷ୍ଟ କ୍ରିକେଟକୁ ଫେରିବା ପୂର୍ବରୁ ବୋଲରଙ୍କୁ ଅତିକମ୍ରେ ଦୁଇ ମାସ ପ୍ରସ୍ତୁତି କରିବା ଆବଶ୍ୟକ ବୋଲି ଆଇସିସି କହିଛି। ତେବେ ଦିନିକିଆ ଓ ଟି୨୦ ପାଇଁ ବୋଲରମାନେ ୬ ସପ୍ତାହ ପ୍ରସ୍ତୁତି କରିବା ଦରକାର ବୋଲି ଆଇସିସି କହିଛି। ଟ୍ରେନିଂ ଆରମ୍ଭ କରିବାକୁ ପୂର୍ବରୁ ମେଡିକାଲ ଆଡଭାଇଜର ଓ ବାୟୋ ସେଫ୍ଟି ଅଫିସିଆଲ ନିଯୁକ୍ତ କରିବାକୁ ଆଇସିସି ବିଭିନ୍ନ ବୋର୍ଡକୁ ପରାମର୍ଶ ଦେଇଛି। ଇତିମଧ୍ୟରେ ରିଭର୍ସ ସୁଇଙ୍ଗ୍ ପାଇଁ ବଲ୍ରେ ଲାଳ ଲଗାଇବାକୁ ଆଇସିସି ବାରଣ କରିଛି। ଖେଳାଳି ଓ ଅମ୍ପାୟରମାନେ ସାମାଜିକ ଦୂରତା ରକ୍ଷା କରିବାକୁ, ଖେଳାଳିମାନେ ଅବାଞ୍ଛିତ ବଡି କଣ୍ଟାକ୍ଟରୁ ଦୂରେଇ ରହିବାକୁ ଓ ଟୋପି, ଟାଓ୍ବେଲ୍, ସନ୍ଗ୍ଲାସ ଅମ୍ପାୟର କିମ୍ବା ଟିମ୍ ସଦସ୍ୟଙ୍କୁ ହସ୍ତାନ୍ତର ନ କରିବାକୁ ଆଇସିସି ପରାମର୍ଶ ଦେଇଛି।