ଓ୍ବେଲିଂଟନ, ୧୦ା୬ (ପି.ଟି.):ନ୍ୟୁଜିଲାଣ୍ଡ ନିଜକୁ କରୋନାଭାଇରସ୍ ମୁକ୍ତ ଦେଶ ଭାବେ ଘୋଷଣା କରିଛି। ଟେଷ୍ଟ ମ୍ୟାଚଗୁଡ଼ିକ ଲାଗି ଏହାକୁ ନିରପେକ୍ଷ ଭାବେ ବ୍ୟବହାର କରାଯାଇ ପାରିବ ବୋଲି ଦେଶର ଖେଳାଳି ଆସୋସିଏଶନର ମୁଖ୍ୟ କାର୍ଯ୍ୟନିର୍ବାହୀ ହିଥ୍ ମିଲ୍ସ ପ୍ରକାଶ କରିଛନ୍ତି। ସମଗ୍ର ଦେଶରେ କରୋନା ଭାଇରସ୍ ବ୍ୟାପିବା ପରେ ମାର୍ଚ୍ଚ ମାସରୁ ଅନ୍ତର୍ଜାତୀୟ କ୍ରିକେଟ ସ୍ଥଗିତ ରହିଛି। ଭାରତ ଏହାର ଶେଷ ସିରିଜ ଆୟୋଜକ ନ୍ୟୁଜିଲାଣ୍ଡ ବିପକ୍ଷରେ ଖେଳିଛି। ଏହି ଗ୍ରୀଷ୍ମଋତୁରେ ମଧ୍ୟ ମ୍ୟାଚ ଆୟୋଜନ କରି ହେବ। ନ୍ୟୁଜିଲାଣ୍ଡ କ୍ରିକେଟ (ଏନ୍ଜେଡ୍ଡବ୍ଲ୍ୟୁ) ଏହି ପ୍ରସଙ୍ଗରେ ଇଂଲଣ୍ଡ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଓ ଅନ୍ୟ କେତେକ କ୍ରିକେଟ ବୋର୍ଡ ସହିତ ଆଲୋଚନା କରିଥିବା ମିଲ୍ସ କହିଛନ୍ତି। ଦେଶରେ ବର୍ତ୍ତମାନ କୌଣସି କରୋନା ପଜିଟିଭ୍ ନ ଥିବାରୁ ନ୍ୟୁଜିଲାଣ୍ଡ ସରକାର ରବିବାର ଅଧିକାଂଶ କଟକଣା ହଟାଇ ଦେଇଛି। ଅନ୍ତର୍ଜାତୀୟ କ୍ରିକେଟରେ ନିରପେକ୍ଷ ଭେନ୍ୟୁ ନୂଆ କଥା ନୁହେଁ। ୨୦୦୯ରେ ଲାହୋରରେ ଶ୍ରୀଲଙ୍କା ଟିମ୍ ବସ୍ ଉପରେ ଆକ୍ରମଣ ଘଟଣା ପରଠାରୁ ପାକିସ୍ତାନ ଏହାର ଅଧିକାଂଶ ଘରୋଇ ସିରିଜ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଖେଳି ଆସୁଛି। ତେବେ ପାକିସ୍ତାନ କ୍ରମେ ଦେଶକୁ ଅନ୍ତର୍ଜାତୀୟ କ୍ରିକେଟକୁ ଫେରାଇ ଆଣିବା ଲାଗି ଉଦ୍ୟମ ଚଳାଇଛି। କୋଭିଡ୍-୧୯ ଯୋଗୁ କାଉଣ୍ଟ କ୍ରିକେଟ ପ୍ରଭାବିତ ହୋଇଛି। ଏହାକୁ ଆୟୋଜନ କରିବା ଲାଗି ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ ଅଫର ଦେଇଥିବା ଇଂଲଣ୍ଡ ଓ୍ବେଲ୍ସ କ୍ରିକେଟ ବୋର୍ଡ ମୁଖ୍ୟ କାର୍ଯ୍ୟନିର୍ବାହୀ ଟମ୍ ହାରିସନ ଏପ୍ରିଲରେ ସୂଚନା ଦେଇଥିଲେ। ଓ୍ବେଷ୍ଟଇଣ୍ଡିଜ ବିପକ୍ଷ ଇଂଲଣ୍ଡର ୩ ମ୍ୟାଚ ବିଶିଷ୍ଟ ଘରୋଇ ଟେଷ୍ଟ ସିରିଜ ସହ ଆସନ୍ତା ମାସରେ ଅନ୍ତର୍ଜାତୀୟ କ୍ରିକେଟ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ଏହା ଜୈବ-ସୁରକ୍ଷା ପରିବେଶ ମଧ୍ୟରେ ହେବ। ତେବେ ଏହି ପରିବେଶରେ ସବୁବେଳେ ଖେଳିବା ଗ୍ରହଣୀୟ ହେବ ନାହିଁ।