ରାଜକୋଟ,୧୨।୧(ପି.ଟି.)- କ୍ରିକେଟର ପାରମ୍ଭରିକ ତଥା ସବୁଠାରୁ ଲମ୍ବା ଫର୍ମାଟ ରୂପ ପରିଗଣିତ ହେଉଥିବା ଟେଷ୍ଟ ହେଉଛି ସବୁଠାରୁ ସ୍ବତନ୍ତ୍ର। ଏହି ଫର୍ମାଟ ତା’ର ସ୍ଥିତି ବଜାୟ ରଖିବାରେ ସଫଳ ହେବ ବୋଲି ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା କହିଛନ୍ତି। ସମୟର ପରବର୍ତ୍ତନ ହୋଇଛି ଓ ଧଳା ବଲ୍ କ୍ରିକେଟ ଏବେ ଲୋକପ୍ରିୟତାର ଶୀର୍ଷକୁ ଛୁଇଁଛି। ତେବେ ଟେଷ୍ଟ ଫର୍ମାଟ ହେଉଛି ସ୍ବତନ୍ତ୍ର ଓ ଶ୍ରେଷ୍ଠ ବୋଲି ପୂଜାରା କହିଛନ୍ତି। ସବୁଦିନେ ମଧ୍ୟ ଟେଷ୍ଟ ଏହା ହୋଇ ରହିବ ବୋଲି ପୂଜାର କହିଛନ୍ତି। ଟେଷ୍ଟ ହିଁ ଜଣେ କ୍ରିକେଟ ପାଇଁ ପ୍ରକୃତ ପରୀକ୍ଷା ସୃଷ୍ଟି କରିଥାଏ ଓ ଟେଷ୍ଟ ଖେଳିବାରେ ପ୍ରକୃତ ଚ୍ୟାଲେଞ୍ଜ୍ ଥାଏ ବୋଲି ପୂଜାରା କହିଛନ୍ତି।
ଉଲ୍ଲେଖଥାଉ କି, ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) କିଛିଦିନ ତଳେ ଟେଷ୍ଟକୁ ୪ ଦିନ ବିଶିଷ୍ଟ କରିବାକୁ ବିଚାର କରୁଛି। ତେବେ ଆଇସିସିର ଏହି ଆଭିମୁଖ୍ୟକୁ ସଚିନ ତେନ୍ଦୁଲକର, ରିକି ପଣ୍ଟିଂଙ୍କ ଭଳି କିମ୍ବଦନ୍ତୀ କ୍ରିକେଟରଙ୍କ ସମେତ କେତେକ ପୂର୍ବତନ ଖେଳାଳି ଦୃଢ ବିରୋଧ କରିଥିଲେ। ପୂଜାରା ଇତିମଧ୍ୟରେ ପ୍ରଥମ ଶ୍ରେଣୀ କ୍ରିକେଟରେ ୫୦ତମ ଶତକ ହାସଲ କରି ଏଲିଟ୍ କ୍ଲବରେ ସାମିଲ ହୋଇଛନ୍ତି। ନ୍ୟୁଜିଲାଣ୍ଡ ଗସ୍ତ ପୂର୍ବରୁ ଏହି ଶତକ ତାଙ୍କ ପାଇଁ ବିଶେଷଭାବେ ଗୁରୁତ୍ୱ ବହନ କରୁଛି। ନ୍ୟୁଜିଲାଣ୍ଡ ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରଜ ଜିତିଲେ ଭାରତ ଚଳିତ ବିଶ୍ୱ ଟେଷ୍ଟ ଚାମ୍ପିୟନଶିପ୍ର ପ୍ରାରମ୍ଭିକ ସଂସ୍କରଣ ୨୦୨୧ ଫାଇନାଲର ନିକଟତର ହେବ। ୩୧ ବର୍ଷୀୟ ପୂଜାର ଏପର୍ଯ୍ୟନ୍ତ ୧୮ଟି ଶତକ ହାସଲ କରିଛନ୍ତି।