ବୈପାରିଗୁଡା,୫।୪(ଡି.ଏନ୍.ଏ.): କରୋନା ମୁକାବିଲା ପାଇଁ ରାଜ୍ୟରେ ସମସ୍ତ ବିଦ୍ୟାଳୟ ଛୁଟି ଘୋଷଣା କରାଯାଇଛି। ମଙ୍ଗଳ ବିଭାଗ ଦ୍ଵାରା ପରିଚାଳିତ ଆବସିକ ବିଦ୍ୟାଳୟ ଗୁଡ଼ିକ ମଧ୍ୟ ବନ୍ଦ ରହିଛି। ତେବେ ସ୍କୁଲ ବନ୍ଦ ହେବା ପୂର୍ବରୁ ପିଲାଙ୍କୁ ୩ମାସର ଚାଉଳ ଯୋଗାଇ ଦେବାକୁ ସରକାର ନିଷ୍ପତ୍ତି ନେଇଥିଲେ। ଏବେ ଯୋଗାଣ ବିଭାଗ ପକ୍ଷରୁ ପ୍ରତ୍ୟେକ ଗାଁରେ ହିତାଧିକାରୀ ଓ ସ୍କୁଲ ପିଲାଙ୍କୁ ଚାଉଳ ଦିଆଯାଉଛି। ତେବେ ପଞ୍ଚାୟତ ବାହାର ସ୍କୁଲ ବିଶେଷ କରି ଆବାସିକ ବିଦ୍ୟାଳୟ ପିଲାଙ୍କ ପାଇଁ ଏବେ ଅଡ଼ୁଆ ପରିସ୍ଥିତି ସୃଷ୍ଟି ହୋଇଛି। ନିଜ ପଞ୍ଚାୟତ ବଦଳରେ ଯେଉଁ ପଞ୍ଚାୟତ ଅନ୍ତର୍ଗତ ସଂପୃକ୍ତ ବିଦ୍ୟାଳୟ, ସେଠାରୁ ହିଁ ଚାଉଳ ଆଣିବାକୁ କୁହାଯାଉଛି। ହେଲେ ଲକଡାଉନ୍ ପରିସ୍ଥିତିରେ ଦୂର ଜାଗାକୁ ଯାଇ ଚାଉଳ ଆଣିଵା ସମ୍ଭବ ହେଉନାହିଁ। ପ୍ରକାଶ ଯେ, ବୈପାରିଗୁଡା ବ୍ଲକ କୋଲାର ପଞ୍ଚାୟତ ଅନ୍ତର୍ଗତ ଚପଡିଆଗୁଡା ଗ୍ରାମର ଚନ୍ଦ୍ର ଗାଦଵାଙ୍କ ଝିଅ ରାଧିକା ଗାଦଵା ବ୍ଲକର ଗୁପ୍ତେଶ୍ୱର ପଞ୍ଚାୟତ ଅନ୍ତର୍ଗତ ଶିରିବେଡ଼ା ହଷ୍ଟେଲରେ ରହି ପାଠ ପଢନ୍ତି। ରବିବାର ଝିଅର ଚାଉଳ ପାଇଁ ଚନ୍ଦ୍ର ପଞ୍ଚାୟତକୁ ଯାଇଥିଲେ। କିନ୍ତୁ ସେଠାରେ ତାଙ୍କୁ ଚାଉଳ ନ ଦେଇ ଫେରାଇ ଦିଆଯାଇଥିଲା। ଏ ସମ୍ପର୍କରେ ଯୋଗାଣ ଅଧିକାରୀ ହରି ଶରଣ ମଲ୍ଲିକଙ୍କୁ ଯୋଗାଯୋଗ କରିବାରୁ ଶିକ୍ଷା ବିଭାଗ ପକ୍ଷରୁ ସମ୍ପୃକ୍ତ ବିଦ୍ୟାଳୟ ରହିଥିବା ପଞ୍ଚାୟତ ଗୁଡ଼ିକୁ ହିତାଧିକାରୀ ତାଲିକା ଦିଆଯାଇଛି। ତେଣୁ ପିଲାମାନଙ୍କୁ ସେଠାରେ ହିଁ ଚାଉଳ ମିଳିବ ବୋଲି କହିଛନ୍ତି। ତେଣୁ ନିୟମ ନ ବଦଳିଲେ ଜିଲାରେ ବାହାର ପଞ୍ଚାୟତର ଶହ ଶହ ଆଦିବାସୀ ଓ ହରିଜନ ଛାତ୍ରୀଛାତ୍ର ଚାଉଳ ପାଇବାରୁ ବଞ୍ଚିତ ହେବେ ବୋଲି ସେମାନେ କହିଛନ୍ତି।
