କେନ୍ଦୁଝର,୮ା୪ (ସ୍ବ.ପ୍ର.) – କରୋନା ପାଇଁ ସାରା ଦେଶରେ ଲକ୍ଡାଉନ ଘୋଷଣା କରାଯାଇଛି। ବିଭିନ୍ନ ସ୍କୁଲ ଛୁଟି କରାଯାଇ ଛାତ୍ରୀଛାତ୍ରଙ୍କୁ ୩ ମାସର ମଧ୍ୟାହ୍ନଭୋଜନ ଚାଉଳ ଅଗ୍ରୀମ ଦେବା ପାଇଁ କୁହାଯାଇଛି। କିନ୍ତୁ ଏନେଇ ପିଲାମାନଙ୍କ ଅଭିଭାବକମାନଙ୍କୁ ଟୋକନ ଶିକ୍ଷା ବିଭାଗ ଦେଇ ଚୁପ ବସିଛି। ଛାତ୍ରୀଛାତ୍ର ଅଦ୍ୟାବଧି ଚାଉଳ ପାଇପାରି ନ ଥିବାରୁ ଅସନ୍ତୋଷ ବଢୁଛି। ଯୋଗାଣ ବିଭାଗ ଓ ଶିକ୍ଷା ବିଭାଗ ମଧ୍ୟରେ ସମନ୍ବୟ ଅଭାବରୁ ଏଭଳି ପରିସ୍ଥିତି ଉପୁଜିଥିବା ଅଭିଯୋଗ ହୋଇଛି।
ପ୍ରକାଶ ଯେ, ଲକ୍ଡାଉନ ସମୟରେ ବିଦ୍ୟାଳୟଗୁଡିକ ବନ୍ଦ ଥିବାରୁ ପିଲାମାନଙ୍କୁ ମଧ୍ୟାହ୍ନଭୋଜନ ବଦଳରେ ତାଙ୍କ ଘରେ ସରକାର ଚାଉଳ ପହଞ୍ଚାଇବା ପାଇଁ ବ୍ୟବସ୍ଥା କରିଛନ୍ତି। ପ୍ରାଥମିକ ବିଦ୍ୟାଳୟ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କ ପାଇଁ ମାସକୁ ୩ କିଲୋ ହିସାବରେ ୩ମାସର ୯ କିଲୋ ଓ ଉଚ୍ଚପ୍ରାଥମିକ ବିଦ୍ୟାଳୟରେ ୬ଷ୍ଠରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କୁ ମାସକୁ ସାଢେ ୪ କିଲୋ ହିସାବରେ ୩ମାସରେ ସାଢେ୧୩ କିଲୋ ଚାଉଳ ମିଳିବା କଥା। ଏନେଇ ଅଭିଭାବକମାନଙ୍କୁ ଦୂରଦୂରାନ୍ତରୁ ଡକାଇ ଟୋକନ ଦିଆ ଯାଇଥିଲା। କିନ୍ତୁ ସେମାନଙ୍କୁ ଚାଉଳ ଅଦ୍ୟାବଧି ମିଳିନାହିଁ। ସମଗ୍ର ଜିଲାରେ ଏଭଳି ସମସ୍ୟା ସୃଷ୍ଟି ହୋଇଥିଲେ ହେଁ ଶିକ୍ଷା ବିଭାଗ ଚୁପ ହୋଇ ବସିଥିବାରୁ ଅସନ୍ତୋଷ ପ୍ରକାଶ ପାଉଛି। ସମସ୍ତେ ଟୋକନ ଧରି ଚାଉଳ ପାଇଁ ଅପେକ୍ଷାରେ ରହିଛନ୍ତି। ଏନେଇ ଜିଲା ଯୋଗାଣ ଅଧିକାରୀ ପରେଶ ଚନ୍ଦ୍ର ମହାନ୍ତି କହିଛନ୍ତି ଯେ, ଶିକ୍ଷା ବିଭାଗ ଛାତ୍ରୀଛାତ୍ରମାନେ କେଉଁ ରାଶନ ଦୋକାନରୁ ଚାଉଳ ନେବେ ତାହାର ତାଲିକା ଦେବାରେ ବିଳମ୍ବ କରୁଥିବାରୁ ବିଭାଗ ସେହି ସବୁ ରାଶନ ଦୋକାନକୁ ଚାଉଳ ଦେଇ ପାରିନାହିଁ। ଏନେଇ ଶିକ୍ଷା ବିଭାଗକୁ କୁହାଯାଇଛି। ଖୁବ ଶୀଘ୍ର ତାଲିକା ମିଳିବା ପରେ ଚାଉଳ ବଣ୍ଟନ ହେବ।