ଲାଉସାନେ,୨୬।୩ (ଏଏଫ୍ପି)-୨୦୨୦ ଟୋକିଓ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଥିବା ବେଳେ ନୂଆ ତାରିଖ ପାଇଁ ସବୁ ବିକଳ୍ପ ଖୋଲା ରହିଛି ବୋଲି ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ତରଫରୁ କୁହାଯାଇଛି। ବିଶ୍ୱରେ ଶାନ୍ତିପୂର୍ଣ୍ଣ ବାତାବରଣ ଥିବା ବେଳେ ପ୍ରଥମଥର ପାଇଁ ଏହି ମେଗା ଇଭେଣ୍ଟକୁ ସ୍ଥଗିତ ରଖାଯାଇଛି। କୋଭିଡ୍-୧୯ ଏବେ ସାରା ବିଶ୍ୱରେ ଭୟଙ୍କର ପରିସ୍ଥିତି ସୃଷ୍ଟି କରିଥିବାରୁ ସୋମବାର ଅଲିମ୍ପିକ୍ସକୁ ଘୁଞ୍ଚାଇବାକୁ ନିଷ୍ପତ୍ତି ନିଆଯାଇଥିଲା। ତେବେ ଅଲିମ୍ପିକ୍ସର ନୂଆ ତାରିଖ ଧାର୍ଯ୍ୟ କରି ନ ଥିଲା। ୨୦୨୦ରେ ଅଲିମ୍ପିକ୍ସ ଆୟୋଜନ ସମ୍ଭବ ନୁହଁ। ତେବେ ୨୦୨୧ ଗ୍ରୀଷ୍ମ ପୂର୍ବରୁ ଏହି ମେଗା ଇଭେଣ୍ଟ ଆୟୋଜନ ହେବ ବୋଲି ଆଇଓସି ସ୍ପଷ୍ଟ କରିଥିଲା। ତେବେ ଏହା କେବଳ ଗ୍ରୀଷ୍ମ ମାସରେ ଆୟୋଜନ ହେବ ବୋଲି ସେଭଳି କିଛି ମାନେ ନାହିଁ ବୋଲି ଆଇଓସି ଅଧ୍ୟକ୍ଷ ଥୋମାସ ବାକ୍ କହିଛନ୍ତି। ଗ୍ରୀଷ୍ମ ଓ ଏହା ପୂର୍ବରୁ ମଧ୍ୟ ଅଲିମ୍ପିକ୍ସ ଆୟୋଜନ କରିବାର ବିକଳ୍ପ ରହିଛି ବୋଲି ସେ ସ୍ପଷ୍ଟ କରିଛନ୍ତି।
ଏଥିସହିତ ବିଶ୍ୱ ଚାମ୍ପିୟନଶିପ୍କୁ ମଧ୍ୟ ୨୦୨୧କୁ ଘୁଞ୍ଚାଇବାକୁ ବିଶ୍ୱ ଆଥଲେଟିକ୍ସର ଏହି ସର୍ବୋଚ୍ଚ ପ୍ରଶାସନିକ ସଂସ୍ଥା ପ୍ରସ୍ତୁତ ଅଛି ବୋଲି କହିଛି। ଆମେରିକାର ଓରେଗନ ରାଜ୍ୟର ଇୟୁଗେନ୍ରେ ବିଶ୍ୱ ଚାମ୍ପିୟନଶିପ୍ ଆସନ୍ତା ବର୍ଷ ଅଗଷ୍ଟ ୬ରୁ ୧୫ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ଅଲିମ୍ପିକ୍ସ ଘୁଞ୍ଚିଥିବାରୁ ବିଶ୍ୱ ଚାମ୍ପିୟନଶିପ୍କୁ ଘୁଞ୍ଚାଇବାରେ କୌଣସି ସମସ୍ୟା ନାହିଁ ବୋଲି ଅନ୍ତର୍ଜାତୀୟ ସୁଇମିଂ ଫେଡେରେଶନ କହିଛି। ସୁତ୍ଇମିଂ ବିଶ୍ୱ ଚାମ୍ପିୟନଶିପ୍ ଜାପାନର ଫୁକୁଓକାରେ ଆସନ୍ତା ବର୍ଷ ଜୁଲାଇ ୧୬ରୁ ଅଗଷ୍ଟ ୧ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ରହିଛି।