ସିଓଲ, ୨୩ା୫ (ଏଏଫ୍ପି)-୨୦୨୦ ଟୋକିଓ ଅଲିମ୍ପିକ୍ସ ପାଇଁ ଉତ୍ତର କୋରିଆ ସହ ମିଳିତ ମହିଳା ଫିଲ୍ଡ ହକି ଦଳ ପଠାଇବା ଯୋଜନାରୁ ଓହରିଯାଇଛି ଦକ୍ଷିଣ କୋରିଆ। ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କରେ ପରିବର୍ତ୍ତନ ଯୋଗୁ ଏପରି ହୋଇଛି। ୨୦୧୮ରେ ଦକ୍ଷିଣ କୋରିଆରେ ଅନୁଷ୍ଠିତ ଓ୍ବିଣ୍ଟର ଗେମ୍ସରେ ଦୁଇ ଦେଶ ପ୍ରଥମଥର ଏକ ମିଳିତ ଅଲିମ୍ପିକ ଦଳ (ମହିଳା ଆଇସ୍ ହକି ଦଳ) ପଠାଇଥିଲେ। ଏହି ଦଳ ଯଦିଓ ସେମାନଙ୍କ ସମସ୍ତ ୫ଟି ମ୍ୟାଚରେ ପରାଜୟ ବରଣ କରିଥିଲା, ଗଣମାଧ୍ୟମରେ ଚର୍ଚ୍ଚାର ବିଷୟ ହୋଇଥିଲା। ପରେ ଇଣ୍ଡୋନେସିଆରେ ୨୦୧୮ ଏସିଆନ ଗେମ୍ସ ପାଇଁ ଦୁଇ କୋରିଆ ବହୁ ମିଳିତ ଦଳ ପଠାଇଥିଲେ। ଫେବୃୟାରୀରେ ଟୋକିଓ ଅଲିମ୍ପିକ୍ସ ପାଇଁ ଦୁଇ ଦେଶ ବାସ୍କେଟବଲ୍, ଜୁଡୋ, ଫିଲ୍ଡ ହକି ଏବଂ ରୋଇଂରେ ମିଳିତ ଦଳ ପଠାଇବା ଲାଗି ରାଜି ହୋଇଥିଲେ। କିନ୍ତୁ ଉତ୍ତର କୋରିଆ ନେତା କିମ୍ ଜଙ୍ଗ୍ ଉନ୍ ଏବଂ ଆମେରିକା ରାଷ୍ଟ୍ରପତି ଡାନାଲ୍ଡ ଟ୍ରମ୍ପ ମଧ୍ୟରେ ଏକ ଶିଖର ସମ୍ମିଳନୀର କିଛି ସପ୍ତାହ ପରେ ପ୍ୟଙ୍ଗୟାଙ୍ଗ୍ର ଅସହଯୋଗ ଯୋଗୁ ମିଳିତ ଦଳ ପଠାଇବା ଯୋଜନା ଅଟକି ଯାଇଛି। ଇଣ୍ଟରନ୍ୟାଶନାଲ ଅଲିମ୍ପିକ କମିଟି ପକ୍ଷରୁ ସ୍ପଷ୍ଟ କରିଦିଆଯାଇଛି ଯେ, ଟୋକିଓକୁ କୌଣସି ମିଳିତ ଟିମ୍ ପଠାଇବାକୁ ହେଲେ ଯୋଗ୍ୟତା ହାସଲ କରିବାକୁ ପଡ଼ିବ। ଅର୍ଥାତ ମିଳିତ ମହିଳା ଦଳକୁ ଜୁନ୍ ୮ରୁ ୧୬ ତାରିଖ ପର୍ଯ୍ୟନ୍ତ ହେବାକୁଥିବା ଆଇଏଚ୍ଏଫ୍ ମହିଳା ହକି ସିରିଜ ଫାଇନାଲ୍ସରେ ଅଂଶଗ୍ରହଣ କରିବାକୁ ପଡ଼ିବ। ଦଳର ଖେଳାଳି ତାଲିକା ପଠାଇବାର ଅନ୍ତିମ ଦିବସ ଗୁରୁବାର ଥିଲା। ଉତ୍ତର କୋରିଆ ତରଫରୁ କୌଣସି ଉତ୍ତର ନ ଥିବା ବେଳେ ଦକ୍ଷିଣ କୋରିଆ ଏକାକି ଭାଗ ନେବ ବୋଲି ସୂଚନାଦେଇଛି।