ଇନ୍ଦୋର,୧୭।୧୧(ପି.ଟି.)- ପ୍ରଥମଥର ପାଇଁ ଭାରତୀୟ କ୍ରିକେଟ ଦଳ ଆସନ୍ତା ୨୨ ତାରିତଖରୁ ଐତିହାସିକ ଇଡେନ ଗାର୍ଡେନରେ ଦିବାରାତ୍ର ଟେଷ୍ଟ ଖେଳିବ। ପିଙ୍କ୍ ବଲ୍ ବା ଗୋଲାପୀ ବଲ୍ରେ ଏହି ମ୍ୟାଚ ଖେଳାଯିବ। ଫଳରେ ସନ୍ଧ୍ୟା ତଥା ରାତିରେ ଅଭ୍ୟାସ କରିବା ଅର୍ଥାତ୍ ‘ଟ୍ବିଲାଇଟ୍ ଟ୍ରେନିଂ’ପାଇଁ ଭାରତୀୟ କ୍ରିକେଟର ଇନ୍ଦୋରରେ ଆହୁରି ଅଧିକ ଦୁଇଦିନ ରହିବେ। ଏପରି କି ବାଂଲାଦେଶ ଦଳ ମଧ୍ୟ ଅଭ୍ୟାସ ପାଇଁ ଏଠାରେ ରହିବାକୁ ନିଷ୍ପତ୍ତି ନେଇଛି। ପ୍ରଥମ ଟେଷ୍ଟ ୩ ଦିନ ମଧ୍ୟରେ ଶେଷ ହୋଇଥିବାରୁ ବାକି ୨ ଦିନ ଏଠାରେ ରହି ଅଭ୍ୟାସ ଉପରେ ଦଳ ଗୁରୁତ୍ୱ ଦେବ ବୋଲି କୁହାଯାଇଛି।
ଆଗାମୀ ଦୁଇଦିନରେ ଭାରତ ପିଙ୍କ୍ ବଲ୍ରେ ଅଭ୍ୟାସ କରିବ ଓ ଏହାକୁ ‘ଟ୍ବିଲାଇଟନ ଜୋନ୍’ ବୋଲି କୁହାଯାଉଛି। ଗୋଧୂଳି ବା ସନ୍ଧ୍ୟା ସମୟରେ କିପରି ଖେଳିବାକୁ ହୁଏ ଆମେ ତାହା ଜାଣିନାହୁଁ। ତେଣୁ ଏଥିପାଇଁ ସ୍ବତନ୍ତ୍ର ଭାବେ ପ୍ରଶିକ୍ଷଣ ନେବାକୁ ଆମେ ସ୍ଥିର କରିଛୁ ବୋଲି ଭାରତୀୟ ଟିମ୍ ମ୍ୟାନେଜମେଣ୍ଟ ତରଫରୁ କୁହାଯାଇଛି। ପୂର୍ବରୁ ଚେତେଶ୍ୱର ପୂଜାରାଙ୍କ ସମେତ କେତେଜଣ ଖେଳାଳି ଦୁଲୀପ୍ ଟ୍ରଫି ଖେଳିବା ଅବସରରେ ସନ୍ଧ୍ୟା ସମୟରେ ପିଙ୍କ୍ ବଲ୍ରେ ଖେଳିଛନ୍ତି ଓ ଏହାକୁ ଚ୍ୟାଲେଞ୍ଜ୍ ପୂର୍ଣ୍ଣ କହିଛନ୍ତି। ସନ୍ଧ୍ୟା ସମୟରେ ଆକାଶ ଓ ପିଙ୍କ୍ ବଲ୍ର ରଙ୍ଗ କମଳା ରଙ୍ଗ ପରି ମନେ ହୋଇଥାଏ। ଫଳରେ ଏହି ସମୟରେ ବଲକୁ ଦେଖିବାରେ ସମସ୍ୟା ରହିଥିଏ ଓ ଏଥିପାଇଁ ବ୍ୟାଟିଂ କରିବା ମଧ୍ୟ କଷ୍ଟକର ହୋଇଥାଏ ବୋଲି ପୂଜାରା କହିଛନ୍ତି। ତେବେ ଏହି ସମୟରେ ଅଧିକ ଖେଳିଲେ ଜଣେ ବ୍ୟାଟ୍ସମ୍ୟାନ ଅଭ୍ୟସ୍ତ ହୋଇଥାନ୍ତି ଓ ବଲ୍ର ଗତି ସମ୍ପର୍କରେ ଅବଗତ ହୋଇଥାନ୍ତି।
ଏପର୍ଯ୍ୟନ୍ତ ପିଙ୍କ୍ ବଲ୍ରେ ବୋଲିଂ କରିନାହିଁ। ବେଳେବେଳେ ଏହି ବଲ୍ ଗୋଲାପୀ କିମ୍ବା କମଳା ରଙ୍ଗ ଭଳି ମନେ ହୋଇଥାଏ। ତେଣୁ ଅଭ୍ୟାସ କରିବା ନିହାତି ଜରୁରୀ ବୋଲି ସ୍ପିନର ରବିଚନ୍ଦ୍ରନ ଅଶ୍ୱିନ କହିଛନ୍ତି। ଅନ୍ୟପଟେ ଖେଳାଳିମାନେ ଉଭୟ ନୂଆ ଓ ପୁରୁଣା ପିଙ୍କ୍ ବଲ୍ରେ ଅଭ୍ୟାସ କରବା ଜରୁରୀ ବୋଲି କ୍ରିକେଟ ଆଇକନ ସଚିନ ତେନ୍ଦୁଲକର କହିଛନ୍ତି। ନେଟ୍ସରେ ବ୍ୟାଟ୍ସମ୍ୟାନମାନେ ଭିନ୍ନ ବଲ୍ ସହ ଅଭ୍ୟାସ କରିବା ଆବଶ୍ୟକ। ନୂଆ ପିଙ୍କ୍ ବଲ୍, ୨୦ ଓଭର ପିଙ୍କ୍ ବଲ୍ ଓ ଗୋଟିଏ ୫୦ ଓଭର ପିଙ୍କ୍ ବଲ୍କୁ ନେଇ ଅଭ୍ୟାସ କରିବା ଦରାକାର ବୋଲି ସେ କହିଛନ୍ତି। ସେଣ୍ଟର ଉଇକେଟରେ ଓ କଳା ସାଇଡ ସ୍କ୍ରିନ୍ରେ ଏହି ମ୍ୟାଚ୍ ଖେଳାଯିବ। ତେଣୁ ନେଟ୍ ପ୍ରାକ୍ଟିସ୍ରେ ଖେଳାଳିମାନେ ଧ୍ୟାନ ଦେବା ଉଚିତ ହେବ ବୋଲି ସଚିନ କହିଛନ୍ତି। ଆସନ୍ତା ୧୯ ତାରିଖରେ ଦୁଇ ଦଳ କୋଲକାତା ଯାତ୍ରା କରିବ ଓ ଏହା ପର ଦୁଇଦିନରେ ଇଡେନ ଗାର୍ଡେନରେ ଅଭ୍ୟାସ କରିବ।