ବ୍ରହ୍ମପୁର ଅଫିସ,୧୨।୬- ଦକ୍ଷିଣାଞ୍ଚଳ ଅବକାରୀ ଗୋଇନ୍ଦା ବିଭାଗ ଗୋଇଲୁଣ୍ଡି ଛକରୁ ଗଞ୍ଜେଇ ଭର୍ତ୍ତି ଟ୍ରକ ଜବତ କରିଛି। ଟ୍ରକରେ ୨୦ଟି ଜରି ଅଖାରେ ୫୦୦ କେଜି ଗଞ୍ଜେଇ ଥିବା ଯାଞ୍ଚ ବେଳେ ଜଣାପଡ଼ିଛି। ଏହି ଘଟଣାରେ ଟ୍ରକ ଡ୍ରାଇଭର ଢେଙ୍କାନାଳ ଜିଲା ପରଜଙ୍ଗର ସୁଜନ କୁମାର ସାହୁ, ରବି ନାରାୟଣ ସାହୁ ଓ ଗଜପତି ଜିଲା ବିରିକୋଟ ଗ୍ରାମର କରୁଣ ନାୟକ ଓରଫ କାହ୍ନୁଙ୍କୁ ଗିରଫ କରାଯାଇଛି।
ଏମାନଙ୍କୁ କୋର୍ଟ ଚାଲାଣ କରାଯାଇଥିବା ଅବକାରୀ ଗୋଇନ୍ଦା ଅଧିକାରୀ ଧୀରେନ କୁମାର ବେହେରା ସୂଚନା ଦେଇଛନ୍ତି। ମଙ୍ଗଳବାର ଗଜପତି ଜିଲା ଅଡବା ଅଞ୍ଚଳରୁ ବ୍ରହ୍ମପୁର ଦେଇ ବିହାରକୁ ଗଞ୍ଜେଇ ଚାଲାଣ ହେଉଥିବା ଅବକାରୀ ଗୋଇନ୍ଦା ଖବର ପାଇଥିଲା। ଗୋଇଲୁଣ୍ଡି ଛକରେ ଟ୍ରକ (ନଂ.ବିଆର୦୨ଜିଏ ୪୮୦୪)କୁ ଅଟକାଇ ଅବକାରୀ ଗୋଇନ୍ଦା ଅଧିକାରୀଙ୍କ ନେତୃତ୍ୱରେ ଏକ ଟିମ୍ ଯାଞ୍ଚ କରିବାରୁ ସେଥିରୁ ଗଞ୍ଜେଇ ମିଳିଥିଲା। ଏହା ବିହାର ଚାଲାଣ ହେଉଥିଲା ବୋଲି ଜେରା ପରେ ଅବକାରୀ ବିଭାଗ ଜାଣିବାକୁ ପାଇଛି। ଗଞ୍ଜେଇ ବ୍ୟବସାୟୀ ତଥା ଟ୍ରକ ମାଲିକ ବିହାରର ମୁକେଶ କେଆର ସିଂ ବିହାରରେ ରହି ଏହା ଅପରେଟିଙ୍ଗ କରୁଥିବା ଜଣାପଡିଛି। ମାମଲା ନଂ.୪୨/୧୯-୨୦ ଅନୁସାରେ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇ ଅଧିକ ତଦନ୍ତ ଜାରି ରହିଛି। ଏହି ଘଟଣାରେ ଅନ୍ୟ ଯେଉଁମାନେ ତଦନ୍ତ ପରିସରକୁ ଆସିବେ ସେମାନଙ୍କୁ ମଧ୍ୟ ଗିରଫ କରାଯିବ ବୋଲି ଅବକାରୀ ଗୋଇନ୍ଦା ଅଧିକାରୀ ବେହେରା କହିଛନ୍ତି।