ରୂପ୍ସା, ୨୩।୮(ଡି.ଏନ.ଏ.)-ବାଲେଶ୍ୱର ଜିଲା ୬୦ନଂ. ଜାତୀୟ ରାଜପଥର ସଦର ବ୍ଲକ ରାଜଧାନୀ ଢ଼ାବା ନିକଟରେ ଶୁକ୍ରବାର ଏକ ଟ୍ରକ୍ ପଛପଟୁ ଏକ ବୋଲେରୋ (ନଂ. ଓଡ଼ି୦୧ଇ-୯୦୩୨) ଧକ୍କା ଦେବାରୁ ରୂପ୍ସା ଝୋଟ କାରଖାନାର ୭ଜଣ ଶ୍ରମିକଙ୍କ ସମେତ ବୋଲେରୋ ଡ୍ରାଇଭର ଗୁରୁତର ଆହତ ହୋଇଛନ୍ତି। ସେମାନଙ୍କୁ ଚିକିତ୍ସା ପାଇଁ ବାଲେଶ୍ୱର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଆହତ ଶ୍ରମିକମାନେ ହେଲେ ମୃତ୍ୟୁଞ୍ଜୟ ରଣା, ରାଜେନ୍ଦ୍ର ଦାସ, ନିରଞ୍ଜନ ଦାସ, ସଞ୍ଜୟ ସାହୁ, ଦୀପକ ସାହୁ, ରବୀନ୍ଦ୍ର ନାୟକ ଓ ଦେବେନ୍ଦ୍ର୍ର ସିଂହ। ଶ୍ରମିକ ସଂଘର କର୍ମକର୍ତ୍ତା ଓ ଶ୍ରମିକମାନେ ୩ଟି ବୋଲେରୋରେ ସଦର ବିଧାୟକ ମଦନମୋହନ ଦତ୍ତଙ୍କୁ ସଂଘ ପରିଚାଳନା ସମ୍ପର୍କରେ ଆଲୋଚନା ପାଇଁ ସାକ୍ଷାତ କରିବାକୁ ଯାଉଥିଲେ। ଦୁର୍ଘଟଣା ଘଟିବା ପରେ ଆହତମାନଙ୍କୁ ଅନ୍ୟ ଏକ ବୋଲେରୋରେ ତୁରନ୍ତ ଚିକିତ୍ସାଳୟରେ ଭର୍ତ୍ତି କରାଇଥିଲେ। ବିଧାୟକ ଦତ୍ତ ମେଡ଼ିକାଲରେ ପହଞ୍ଚତ୍ ଆହତଙ୍କ ସ୍ବାସ୍ଥ୍ୟ ଅବସ୍ଥା ପଚାରି ବୁଝିଥିଲେ। ଡ୍ରାଇଭରଙ୍କ ସମେତ ଶ୍ରମିକ ରାଜେନ୍ଦ୍ର ଦାସ ଓ ମୃତ୍ୟୁଞ୍ଜୟ ରଣା ଗୁରୁତର ଥିବା ଜଣାପଡ଼ିଛି। ଦୁର୍ଘଟଣାଗ୍ରସ୍ତ ବୋଲେରୋକୁ ରୂପ୍ସା ଥାନାରେ ରଖାଯାଇଛି।