ଯୋଡ଼ା,୨୩।୧୨(ଡି.ଏନ୍.ଏ.): କେନ୍ଦୁଝର ଜିଲା ବାମେବାରୀ ଥାନା ଅନ୍ତର୍ଗତ ଆନ୍ତ୍ରାମାନ୍ତ୍ରା ଛକ ନିକଟରେ ରବିବାର ସନ୍ଧ୍ୟାରେ ଛିଡ଼ା ହୋଇଥିବା ଟ୍ରକଗୁଡିକରୁ ଡିଜେଲ ଓ ଅନ୍ୟ ଯନ୍ତ୍ରାଂଶ ଚୋରି କରୁଥିବା ବେଳେ ଜଣେ ଅଭିଯୁକ୍ତଙ୍କୁ ଗ୍ରାମବାସୀ ଧରି ପୋଲିସରେ ଜିମା ଦେଇଥିବା ଜଣାପଡ଼ିଛି। ବାମେବାରୀ ଥାନା ଅଧିକାରୀ ଅମିତାଭ ଦାସଙ୍କଠାରୁ ମିଳିଥିବା ସୂଚନାନୁଯାୟୀ, ରବିବାର ସନ୍ଧ୍ୟାରେ ଆନ୍ତ୍ରାମାନ୍ତ୍ରା ଛକ ନିକଟରେ ଛିଡ଼ା ହୋଇଥିବା ଟ୍ରକଗୁଡିକରୁ ଡିଜେଲ ଚୋରି କରୁଥିବା ବେଳେ ସ୍ଥାନୀୟ ଗ୍ରାମବାସୀ ଅର୍ଜୁନ ନାଏକ ନାମକ ଅଭିଯୁକ୍ତଙ୍କୁ ଧରିଥିଲେ। ପରେ ତାଙ୍କୁ ପୋଲିସ ପାଖରେ ଜିମା ଦେଇଥିଲେ। ପୋଲିସ ଏହି ଘଟଣାର ଅଧିକ ତଦନ୍ତ କରି ଏହି ଡିଜେଲ ଚୋରି ଅଭିଯୋଗରେ ଅନ୍ୟ ଜଣେ ଅଭିଯୁକ୍ତ ଜୁରୁଡି ପେଣ୍ଠେଇ ବସ୍ତିର ଝାଡ଼େଶ୍ୱର ପେଣ୍ଠେଇଙ୍କୁ ଗିରଫ କରିଥିଲା। ପୋଲିସ ସେମାନଙ୍କଠାରୁ ୫୦ ଲିଟର ଡିଜେଲ ଜବତ କରିଛି। ଏନେଇ ବାମେବାରୀ ଥାନାରେ କେସ୍ ନଂ ୧୭୭/୧୯ରେ ମାମଲା ରୁଜୁ କରି ଅଭିଯୁକ୍ତଦ୍ୱୟଙ୍କୁ ସୋମବାର କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ସୂଚନା ଦେଇଛନ୍ତି।
