ବ୍ରହ୍ମପୁର ଅଫିସ,୩।୫: ବ୍ରହ୍ମପୁର ସହର ଦେଇ ଯାଇଥିବା ଜାତୀୟ ରାଜପଥ ୫୯- ଆସ୍କାରୋଡ ପୋଲିସ କଲୋନୀ ଛକରେ ବୁଧବାର ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ଏକ ଟ୍ରକ ଧକ୍କାରେ ଜଣେ ସ୍କୁଟି ଚାଳକଙ୍କ ମୃତ୍ୟୁ ଘଟିଛି।
ଖବର ପାଇ ଟ୍ରାଫିକ ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ମୃତ ବୃଦ୍ଧ ଜଣଙ୍କ ଟାଉନଥାନା ଅନ୍ତର୍ଗତ ଭାପୁର ବଜାର ପାନବିକା ସାହିର ୟାଇ. ମୋହନ ରାଓ (୬୨)। ଖବର ପାଇ ମୃତକଙ୍କ ପୁଅ ୟାଇ . ସନ୍ତୋଷ କୁମାର ମେଡିକାଲରେ ପହଞ୍ଚି ବାପାଙ୍କ ମୃତଦେହ ଚିହ୍ନଟ କରିଥିଲେ ବୋଲି ପୋଲିସ କହିଛି। ଟ୍ରକ ଚାଳକଙ୍କ ବେପାରୁଆ ଗାଡ଼ି ଚାଳନା ଯୋଗୁ ଏଭଳିଭାବେ ଦୁର୍ଘଟଣା ଘଟି ଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଘଟଣାରୁ ପ୍ରକାଶ ଯେ, ମୋହନା ରାଓ ବୁଧବାର ସକାଳେ ସ୍କୁଟି ନମ୍ବର ଓ ୦୨ ଏ ଜାଡ଼ ୧୩୫୯ ରେ ଫାଷ୍ଟଗେଟ ଯାଉଥିଲେ। ନୂଆ ତାଲୁକା ନିକଟ ପୋଲିସ କଲୋନୀ ଛକରେ ବିପରୀତ ଦିଗରୁ ଏକ ଟ୍ରକ୍ କେଏ ୩୫ସି ୯୮୪୫ ସ୍କୁଟି ପଛପଟୁ ଧକ୍କା ଦେଇଥିଲା। ସ୍କୁଟି ଚାଳକ ମୋହନ ଗାଡ଼ିରୁ ଛିଟିକି ତଳେ ପଢି ଯାଇଥିଲେ। ଉକ୍ତ ଟ୍ରକର ପଛ ଚକଟି ମୋହନଙ୍କ ମୁଣ୍ଡ ଉପରେ ଚଢି ଯାଇଥିଲା। ଯାହାଫଳରେ ସେଠାରେ ହିଁ ମୋହନାଙ୍କ ମୃତ୍ୟୁ ଘଟିଥିଲା ବୋଲି ପୋଲିସ କହିଛି।