ନୂଆଦିଲ୍ଲୀ,୧୭ା୨: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଭାରତ ଗସ୍ତ ପୂର୍ବରୁ ପାକିସ୍ତାନର ଆତଙ୍କବାଦୀ ସଙ୍ଗଠନ ଜୈଶ୍-ଇ-ମହମ୍ମଦ (ଜେଇଏମ୍) ଦେଇଛି ଆକ୍ରମଣ ଧମକ। ହତ୍ୟାକାରୀମାନଙ୍କୁ କ୍ଷମା ଦିଆଯିବ ନାହିଁ। ସେମାନଙ୍କ ଉପରେ ପ୍ରତିଶୋଧ ନିଆଯିବ ବୋଲି ଜୈଶ୍ ପକ୍ଷରୁ ଜାରି ଏକ ଭିଡିଓରେ ଧମକ ଦିଆଯାଇଛି। ଭାରତ ସରକାର, ମୁସଲିମମାନଙ୍କୁ ତୁମେ ଯେପରି ହଇରାଣ କରିଛ ଓ ସେମାନଙ୍କ ବସତିକୁ ଭାଙ୍ଗିଦେଇଛ, ତା’ର ପ୍ରତିଶୋଧ ନିଆଯିବ। ଶାନ୍ତିକୁ ନେଇ ଆମେ ଅନେକ କଥା ଶୁଣି ସାରିଛୁ। ଏବେ ଆଉ ବାହାନା ଚଳିବ ନାହିଁ ବୋଲି ଏଥିରେ କୁହାଯାଇଛି। ଭିଡିଓରେ ଜଣେ ବ୍ୟକ୍ତି କୋରାନ ଶରିଫ୍ ପାଠ କରୁଥିବା ଶୁଣିବାକୁ ମିଳୁଛି। ଆମେରିକା ରାଷ୍ଟ୍ରପତି ଓ ଫାର୍ଷ୍ଟ ଲେଡି ମାଲେନିଆ ଟ୍ରମ୍ପ୍ ଆସନ୍ତା ୨୪ରେ ଦୁଇଦିନିଆ ଗୁଜରାଟ ଗସ୍ତରେ ଆସୁଛନ୍ତି। ସମ୍ବିଧାନର ଅନୁଚ୍ଛେଦ ୩୭୦ ହଟିବା ପରେ କଶ୍ମୀରୀମାନେ କ୍ରୋଧିତ ହୋଇ ଆତଙ୍କବାଦୀ ଆକ୍ରମଣ ଉଦ୍ୟମ ଚଳାଇଛନ୍ତି ବୋଲି ଟ୍ରମ୍ପ୍ ଦମ୍ପତିଙ୍କ ଗସ୍ତ ପୂର୍ବରୁ ଦର୍ଶାଇବା ଲାଗି ପାକିସ୍ତାନର ଏହା ଏକ ଚାଲ୍ ବୋଲି କୁହାଯାଉଛି। ଇତିମଧ୍ୟରେ ସୁରକ୍ଷା ସଂସ୍ଥାଗୁଡ଼ିକ ଜାଣିବାକୁ ପାଇଛନ୍ତି ଯେ, ପାକ୍-ଅଧିକୃତ କଶ୍ମୀର (ପିଓକେ)ରେ ଚଳିତ ମାସରେ ଆତଙ୍କବାଦୀଙ୍କ ଏକ ବୈଠକ ହୋଇଥିଲା। ସେଠାରେ ପାକିସ୍ତାନୀ ସେନା ଓ ଗୋଇନ୍ଦା ସଂସ୍ଥା ଆଇଏସ୍ଆଇ ଅଧିକାରୀମାନେ ଉପସ୍ଥିତ ଥିଲେ। ଆତଙ୍କବାଦୀ ସଙ୍ଗଠନ ହିଜ୍ବୁଲ ମୁଜାହିଦ୍ଦିନକୁ ଅଧିକ ସକ୍ରିୟ କରିବା ପାଇଁ ଉକ୍ତ ବୈଠକରେ ନିଷ୍ପତ୍ତି ହୋଇଥିବା ଜଣାପଡ଼ିଛି। ଲଶ୍କର ଓ ଜୈଶ୍ଠାରୁ ସମସ୍ତ ଦାୟିତ୍ୱ ହିଜ୍ବୁଲକୁ ଦିଆଯିବା ନେଇ ଏକ ନିର୍ଦ୍ଦେଶନାମା ମଧ୍ୟ ସେଠାରେ ଜାରି ହୋଇଥିଲା।