ପାଟଣା,୧୫।୭(ସ୍ବ.ପ୍ର.): କେନ୍ଦୁଝର ଜିଲା ପାଟଣା କେନ୍ଦେଇପଶି ରାସ୍ତାର ପୁଟୁଳିଆ ପେଟ୍ରୋଲ ପମ୍ପ ବାଙ୍କ ନିକଟରେ ସୋମବାର ପୂର୍ବାହ୍ନରେ ଏକ ଟ୍ରଲର ଧକ୍କାରେ ଦମ୍ପତି ଗୁରୁତର ହୋଇ ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ। ଅବସ୍ଥା ସଙ୍କଟାପନ୍ନ ହେବାରୁ ଉଭୟଙ୍କୁ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରାଯାଇଛି। ସେହି ଦମ୍ପତି ହେଉଛନ୍ତି ସଦର ଥାନା କାଠଭାରୀ ପଞ୍ଚାୟତ ପୁଇପାଣି ଗ୍ରାମର ବେଣୁଧର ମହାନ୍ତ ଓ ତାଙ୍କ ସ୍ତ୍ରୀ ଭକ୍ତିରାଣୀ ମହାନ୍ତ।
ସୂଚନା ଅନୁଯାୟୀ, ଏହି ଦମ୍ପତି ପୁଟୁଳିଆ ପାର୍ଶ୍ୱରୁ ପାଟଣା ଆଡ଼କୁ ସାଇକେଲ ଯୋଗେ ଆସୁଥିବାବେଳେ ପାଟଣା ପାର୍ଶ୍ୱରୁ ଯାଉଥିବା ଏକ ଟ୍ରଲର ସହ ପୁଟୁଳିଆ ବାଙ୍କ ନିକଟରେ ଧକ୍କା ହୋଇଥିଲା। ବେଣୁଧରଙ୍କ ଅବସ୍ଥା ସଙ୍କଟଜନକ ରହିଛି।
