ଢେଙ୍କିକୋଟ, ୧୬ା୯(ଡି.ଏନ୍.ଏ.)- ପଣ୍ଡାପଡ଼ା ଥାନା ଅନ୍ତର୍ଗତ ଝାରବେଡ଼ା ଗ୍ରାମ ଚମ୍ପାଡିହି ସାହିର ସୁନାରାମ ମୁଣ୍ଡା (୫୫) ନାମକ ଜଣେ ବ୍ୟକ୍ତି ସୋମବାର ଅପରାହ୍ନରେ ଏକ ମାଲବାହୀ ଟ୍ରେନ୍ରେ କଟି ମୃତ୍ୟୁବରଣ କରିଛନ୍ତି। ସୁନାରାମ ସୋମବାର ସକାଳ ୮ଟାବେଳେ ପ୍ରତିଦିନ ଭଳି ଗ୍ରାମଲୋକମାନଙ୍କ ଗାଈ ନେଇ ଚରାଇବା ପାଇଁ ଘରୁବାହାରି ଯାଇଥିଲେ। ମାତ୍ର ବହୁ ଡେରି ପର୍ଯ୍ୟନ୍ତ ସେ ଖାଇବା ପାଇଁ ଆସି ନ ଥିବାରୁ ଘର ଲୋକ ତାଙ୍କୁ ଖୋଜା ଖୋଜି କରି ଚମ୍ପାଡିହି ନିକଟ ଟ୍ରେନ୍ଲାଇନ୍ ଉପରେ ଖଣ୍ଡ ବିଖଣ୍ଡିତ ମୃତଦେହ ଦେଖି ପଣ୍ଡାପଡ଼ା ଥାନା ଆଇଆଇସି ପଦ୍ମାଳୟା ସାହୁଙ୍କୁ ଖବର ଦେଇଥିଲେ। ଖବର ପାଇ ଥାନା ଆଇଆଇସିଙ୍କ ନିର୍ଦ୍ଦେଶ କ୍ରମେ ଥାନା ସବ୍ଇନ୍ସପେକ୍ଟର ତପନ କୁମାର ଜେନା ସଦଳବଳ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲେ। ଏନେଇ ଥାନାରେ ଏକ ଅପମୃତ୍ୟୁ ମାମଲା (ନଂ- ୧୭/୧୯) ରୁଜୁ କରି ବ୍ୟବଚ୍ଛେଦ ପାଇଁ କେନ୍ଦୁଝର ଡାକ୍ତରଖାନାକୁ ପଠାଯାଇଛି। ଗରୀବ ନିରୀହ ସୁନାରାମ ମୁଣ୍ଡା ଗାଈ ଚରାଇ ପରିବାର ପ୍ରତିପୋଷଣ କରୁଥିବାବେଳେ ପରିବାର ଲୋକେ ତାଙ୍କ ମୃତ୍ୟୁରେ ଅତ୍ୟନ୍ତ ମର୍ମାହତ ହୋଇପଡ଼ିଛନ୍ତି। ଏଣୁ ଗରୀବ ପରିବାରକୁ ସରକାରୀ ସହାୟତା ଦେବାପାଇଁ ଗ୍ରାମବାସୀ ଦାବି କରିଛନ୍ତି।