ନୂଆଦିଲ୍ଲୀ, ୨୪।୫(ପି.ଟି.): ଭାରତୀୟ ରେଲଓ୍ବେ ସ୍ବତନ୍ତ୍ର ଟ୍ରେନ୍ରେ ବର୍ତ୍ତମାନ ସୁଦ୍ଧା ୩୨ ଲକ୍ଷ ପ୍ରବାସୀ ଶ୍ରମିକଙ୍କୁ ସେମାନଙ୍କ ରାଜ୍ୟକୁ ଫେରାଇନେଲାଣି। ଆଗାମୀ ୧୦ ଦିନ ମଧ୍ୟରେ ଆଉ ୨୬୦୦ ଶ୍ରମିକ ସ୍ପେଶିଆଲ ଟ୍ରେନ୍ ଚଳାଚଳ ଯୋଜନା ରହିଛି। ଏଥିରେ ପାଖାପାଖି ୩୬ ଲକ୍ଷ ପ୍ରବାସୀ ଶ୍ରମିକ ଫେରିବେ ବୋଲି ରେଲଓ୍ବେ ବୋର୍ଡ ଅଧ୍ୟକ୍ଷ ଭି.କେ. ଯାଦବ ଶନିବାର କହିଛନ୍ତି। ମେ’ ୧ରୁ ବର୍ତ୍ତମାନ ସୁଦ୍ଧା ଦେଶରେ ମୋଟ ୨,୫୭୦ ଶ୍ରମିକ ସ୍ପେଶିଆଲ ଟ୍ରେନ୍ ଚଳାଚଳ କରିଛି। ଲକ୍ଡାଉନ ଯୋଗୁ ବିଭିନ୍ନ ରାଜ୍ୟରେ ଅଟକି ରହି ଅସୁବିଧାର ସମ୍ମୁଖୀନ ହେଉଥିବା ଶ୍ରମିକମାନଙ୍କୁ ଫେରାଇନେବାରେ ସହାୟତା ଲାଗି ରାଜ୍ୟ ସରକାରଙ୍କ ପକ୍ଷରୁ ରେଲଓ୍ବେକୁ ଅନୁରୋଧ କରାଯାଇଥିଲା। ଯାତ୍ରୀ ଭଡ଼ାର ୮୫ ପ୍ରତିଶତ ରେଲଓ୍ବେ ବହନ କରୁଥିବାବେଳେ ଅବଶିଷ୍ଟ ୧୫ ପ୍ରତିଶତ ସମ୍ପୃକ୍ତ ରାଜ୍ୟ ସରକାର ଭରଣା କରୁଛନ୍ତି। ୨,୦୬୫ ଟ୍ରେନ୍ ଶ୍ରମିକଙ୍କୁ ନେଇ ଗନ୍ତବ୍ୟସ୍ଥଳରେ ପହଞ୍ଚତ୍ ସାରିଥିବାବେଳେ ୫୦୫ ଟ୍ରେନ୍ ବାଟରେ ଅଛନ୍ତି। ଉତ୍ତରପ୍ରଦେଶକୁ ସର୍ବାଧିକ ୧୨୪୬ ଶ୍ରମିକ ସ୍ପେଶିଆଲ ଟ୍ରେନ ଚଳାଚଳ କରିଥିବାବେଳେ ବିହାରକୁ ୮୦୪ ଓ ଝାଡ଼ଖଣ୍ଡକୁ ୧୨୪ଟି ଟ୍ରେନ୍ ଯାଇଛି। ସେହିପରି ଗୁଜରାଟରୁ ସର୍ବାଧିକ ୭୫୯ଟି ଟ୍ରେନ୍ ଶ୍ରମିକଙ୍କୁ ନେଇ ଛାଡ଼ିଥିବାବେଳେ ମହାରାଷ୍ଟ୍ରରୁ ୪୮୩ ଓ ପଞ୍ଜାବରୁ ୨୯୧ଟି ଟ୍ରେନ୍ ଛାଡ଼ିଛି। ଏହା ବାଦ୍ ଅନେକ ଶ୍ରମିକ ବସ୍, ଟ୍ରକ୍ ଓ ଅନ୍ୟ ମାଲବାହୀ ଗାଡ଼ିରେ ସେମାନଙ୍କ ରାଜ୍ୟକୁ ଫେରିଛନ୍ତି। ବହୁସଂଖ୍ୟାରେ ଶ୍ରମିକ ଗାଡ଼ି ନ ପାଇ ଚାଲିଚାଲି ଫେରୁଥିବା ଦେଖାଯାଇଛି। ଏହାକୁ ଦୃଷ୍ଟିରେ ରଖି ଆଗାମୀ ୧୦ ଦିନରେ ଆଉ ୨,୬୦୦ ସ୍ବତନ୍ତ୍ର ଟ୍ରେନ୍ ଚଳାଇବା ପାଇଁ ସରକାର ନିଷ୍ପତ୍ତି ନେଇଛନ୍ତି। ୧୦୦୦ଟି ଟିକେଟ କାଉଣ୍ଟର ଖୋଲିଥିବାବେଳେ ଖୁବ୍ଶୀଘ୍ର ଅଧିକ କାଉଣ୍ଟର ଖୋଲିବାକୁ ଯୋଜନା ରହିଛି। ଗତ ୪ ଦିନ ହେଲା ଦୈନିକ ୨୬୦ଟି ସ୍ବତନ୍ତ୍ର ଟ୍ରେନ୍ ଚଳାଚଳ କରୁଛି।