ଭୁବନେଶ୍ୱର,୨୫ା୧୦(ବ୍ୟୁରୋ): ଆସନ୍ତା ରବିବାର ଦୀପାବଳି। ଏଥିପାଇଁ ବାଣ ଓ ବିସ୍ଫୋରକ ଟ୍ରେନ୍ ଯୋଗେ ବେଆଇନ ଭାବେ ପରିବହନ କରାଯିବାର ଆଶଙ୍କା ରହିଛି। ଏଥିଯୋଗୁ ସମ୍ଭାବ୍ୟ ବିସ୍ଫୋରଣଜନିତ ଦୁର୍ଘଟଣାକୁ ଏଡ଼ାଇବା ପାଇଁ ରେଲ୍ଓ୍ବେ ପକ୍ଷରୁ ଯାଞ୍ଚ ସହ ସ୍ବତନ୍ତ୍ର ସଚେତନତା ଅଭିଯାନ ଆରମ୍ଭ ହୋଇଛି। ଟ୍ରେନ୍ରେ ବାଣ, ବିସ୍ଫୋରକ ବା ଦହନଶୀଳ ପଦାର୍ଥ ପରିବହନ କରିବା ରେଲ୍ଓ୍ବେ ଆକ୍ଟ ୧୯୮୯ ଅନୁଯାୟୀ ଏକ ଦଣ୍ଡନୀୟ ଅପରାଧ। ଏଥିରେ ୩ବର୍ଷ ପର୍ଯ୍ୟନ୍ତ ଜେଲ୍ ହୋଇପାରେ। ଯାତ୍ରୀମାନେ ଟ୍ରେନରେ ଏଭଳି ସାମଗ୍ରୀ ନ ନେବାକୁ ପୂର୍ବତଟ ରେଳପଥ ପକ୍ଷରୁ ସ୍ବତନ୍ତ୍ର ଟିମ ଗଠନ କରାଯାଇ ସଚେତନତା କରାଯାଉଛି। ଏହାସହ ଲଗେଜ, ପାର୍ସଲ ଭ୍ୟାନ ଆଦିକୁ ଯାଞ୍ଚ କରାଯାଉଛି। କୌଣସି ଯାତ୍ରୀ ବାଣ କିମ୍ବା ବିସ୍ଫୋରକ ସାମଗ୍ରୀ ନେଉଥିବା ଦେଖିଲେ ସହଯାତ୍ରୀମାନେ ରେଳ ସୁରକ୍ଷା ବଳ (ଆର୍ପିଏଫ୍)ର ହେଲ୍ପଲାଇନ ନଂ.୧୮୨ କିମ୍ବା ଆର୍ପିଏଫ୍, ଜିଆର୍ପି, ଟିଟିଇ, ଟ୍ରେନ୍ ଗାର୍ଡ, ଷ୍ଟେଶନ ମ୍ୟାନେଜର, କୋଚ୍ ଆଟେଣ୍ଡାଣ୍ଟଙ୍କୁ ସିଧାସଳଖ ଜଣାଇବାକୁ ପରାମର୍ଶ ଦିଆଯାଇଛି। ଯାତ୍ରୀମାନେ ଏଥିପ୍ରତି ଗୁରୁତ୍ୱ ଦେବା ସହ ବିପଜ୍ଜନକ ପଦାର୍ଥ ପରିବହନ ସଂକ୍ରାନ୍ତରେ ତୁରନ୍ତ ଖବର ଦେବାକୁ କୁହାଯାଇଛି। ପୂର୍ବତଟ ରେଳପଥର ସମସ୍ତ ୩ ଡିଭିଜନରେ ଚାଲିଥିବା ଏହି ସଚେତନତା ଅଭିଯାନରେ ଜିଆର୍ପି, ଆର୍ପିଏଫ୍ ଓ ସିଭିଲ ଡିଫେନ୍ସକୁ ସାମିଲ୍ କରାଯାଇଛି। କୌଣସି ଦୁର୍ଘଟଣାକୁ ଏଡାଇବାକୁ ଷ୍ଟେଶନ, ଗୁଡ୍ ସେଡ୍, ଗାର୍ଡ ବ୍ରେକ୍ ଭ୍ୟାନ୍, ଏସି କୋଚ୍, ପ୍ୟାଣ୍ଟ୍ରି କାର ଏବଂ ଲୋକୋମୋଟିଭରେ ଯଥେଷ୍ଟ ଅଗ୍ନି ନିର୍ବାପନ ବ୍ୟବସ୍ଥା ହୋଇଛି ବୋଲି ରେଳପଥ ପକ୍ଷରୁ କୁହାଯାଇଛି।