ଢେଙ୍କାନାଳ ଅଫିସ, ୨୯।୩ – ଗାଡ଼ି ଗଡ଼ିଲେ ପେଟକୁ ଦିମୁଠା ମିଳେ। ପରିବାର ଚଳେ। ଗାଡ଼ି ବନ୍ଦ ତ ଦାନାପାଣି ସବୁ ବନ୍ଦ। ପରିବାରକୁ ପଛକରି ସେମାନେ ଚାଲିଆସନ୍ତି। କେତେବେଳେ ପୁଣି ଫେରିବେ କିଛି ଠିକ୍ ଠିକଣା ନ ଥାଏ।
ଏମିତି ଧରାବନ୍ଧା ଜୀବନ। ହେଲେ କରୋନା ଏହାକୁ ବି ବିଗାଡ଼ି ଦେଇଛି, ଯାହାକୁ ନେଇ ଚିନ୍ତାରେ ହଜାର ହଜାର ଡ୍ରାଇଭର ଏବଂ ସେମାନଙ୍କୁ ସହଯୋଗ କରୁଥିବା ହେଲ୍ପର। ଲକ୍ଡାଉନ ଯୋଗୁ ବିଭିନ୍ନ ସ୍ଥାନରେ ଅଟକି ରହିଛନ୍ତି ସେମାନେ। କେବେ କଟକଣା ହଟିବ ଆଉ ସେମାନେ ଘରକୁ ବାହୁଡ଼ିବେ ଏବେ ସେହି କଥା ସେମାନଙ୍କୁ ବ୍ୟତିବ୍ୟସ୍ତ କରୁଛି।
ଲକ୍ଡାଉନ୍ ଘୋଷଣା ହେବାପରେ ଢେଙ୍କାନାଳ ସହର ନିକଟ ୫୫ନଂ. ଜାତୀୟ ରାଜପଥର ଗୁଣ୍ଡିଚାପଡ଼ା ନିକଟରେ ୪ଦିନ ହେଲା ୩୦ରୁ ଊର୍ଦ୍ଧ୍ୱ ଟ୍ରଲର ଚାଳକ ଏବଂ ହେଲ୍ପର ଫସି ରହିଛନ୍ତି। ବିହାର, ଉତ୍ତରପ୍ରଦେଶ, ମହାରାଷ୍ଟ୍ରରୁ ସମ୍ପୃକ୍ତ ଡ୍ରାଇଭରମାନେ ବିଭିନ୍ନ ସଂସ୍ଥାର ମାଲ୍ ଓଡ଼ିଶାରେ ପହଞ୍ଚାଇଥାନ୍ତି। ସେହିପରି ଫେରିବା ସମୟରେ ପାରାଦୀପରୁ ମାଲ୍ ଉଠାଇଥାନ୍ତି। ସମ୍ପୃକ୍ତ ଡ୍ରାଇଭରମାନେ ଖାଲିଗାଡ଼ି ନେଇ ପାରାଦୀପ ଯାଉଥିବାବେଳେ ଗୁଣ୍ଡିଚାପଡ଼ା ନିକଟରେ ଲକ୍ଡାଉନ ନିର୍ଦ୍ଦେଶନାମା ଜାରି ହୋଇଥିଲା। ଫଳରେ ସେମାନେ ସେଠାରେ ଅଟକି ରହିଛନ୍ତି। ଡ୍ରାଇଭରମାନେ କହିଛନ୍ତି, ଢେଙ୍କାନାଳ ସୀମା ପୂର୍ବରୁ ରାସ୍ତାରେ ସେମାନଙ୍କୁ କେତେଜଣ ଯୁବକ ଅଟକାଇଥିଲେ। ବାହାର ରାଜ୍ୟରୁ ଆସିଥିବା କହି ଗାଡ଼ିର କାଚ ଭଙ୍ଗାରୁଜା କରିଥିଲେ। ଏ ନେଇ ସେମାନେ ଟ୍ରାନ୍ସପୋର୍ଟ ସଂସ୍ଥା କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଛନ୍ତି। ତେବେ କଟକଣା ନ ହଟିବା ଯାଏ ସେମାନେ ଯେଉଁଠି ଅଛନ୍ତି ସେଠାରେ ରହିବାକୁ ଟ୍ରାନ୍ସପୋର୍ଟ ସଂସ୍ଥା କର୍ତ୍ତୃପକ୍ଷ ପରାମର୍ଶ ଦେଇଛନ୍ତି। ନିଜପାଖରେ ଥିବା ଟଙ୍କା ସରି ସରି ଆଣିଲାଣି। ଅଟକିଥିବା ସ୍ଥାନରୁ ୨ କିମି ବାଟ ଚାଲି ଚାଲି ଯାଇ ଗ୍ରସେରି ସାମଗ୍ରୀ ଆଣିବାକୁ ପଡୁଛି। ୪ଦିନ ହେଲା ଟ୍ରେଲର ଉପରେ ରୋଷେଇ, ଖାଇବା, ଶୋଇବା ସବୁକିଛି ଚାଲିଛି ବୋଲି ସେମାନେ କହିଛନ୍ତି।
ଏ ସଂକ୍ରାନ୍ତରେ ବିହାରର ଡ୍ରାଇଭର ପୁରୁଷୋତ୍ତମ କୁହନ୍ତ, ୩୦ ଜଣ ଚାଳକ ଏବଂ ହେଲ୍ପର ରାସ୍ତାରେ ଅଟକି ରହିଛୁ। ପରିବାର ଲୋକଙ୍କ କଥା ବେଶି ମନେ ପଡୁଛି। ସେମାନଙ୍କ ସହ ଫୋନ୍ରେ ଯୋଗାଯୋଗ କରିଛୁ। ସେମାନେ ବି ଆମମାନଙ୍କ ପାଇଁ ବ୍ୟସ୍ତ ହେଉଛନ୍ତି। ମାଲିକଙ୍କ ସହ ଯୋଗାଯୋଗ କରିବା ପରେ ଗାଡ଼ି ଛାଡ଼ିଦେଇ ପ୍ରଶାସନର ଅନୁମତି ନେଇ ଭଡ଼ା ଗାଡ଼ିରେ ପଳାଇ ଆସିବାକୁ ପରାମର୍ଶ ଦେଇଥିବା ପୁରୁଷୋତ୍ତମ କହିଛନ୍ତି। ଜିଲାପାଳ ଭୂମେଶ ଚନ୍ଦ୍ର ବେହେରା କୁହନ୍ତି, ଫସି ରହିଥିବା ଡ୍ରାଇଭର ଏବଂ ହେଲ୍ପର ଚାହିଁଲେ ପ୍ରଶାସନ ପକ୍ଷରୁ ସେମାନଙ୍କ ରହିବା ଖାଇବା ବ୍ୟବସ୍ଥା କରାଯିବ। ଏ ନେଇ ସେମାନଙ୍କ ସହ ଆଲୋଚନା କରି ଯାହା କିଛି ପଦକ୍ଷେପ ନିଆଯିବ।