ଛେଣ୍ଡିପଦା,୧।୫ (ସ୍ବ.ପ୍ର.):ଓଡିସି ଟ୍ରାନ୍ସପୋର୍ଟ କମ୍ପାନୀର ଏକ ଟ୍ରେଲର ବିଦ୍ୟୁତ୍ ତାରରେ ଲାଗିଯିବାରୁ ସୋମବାର ବିଳମ୍ବିତ ରାତିରେ ଛେଣ୍ଡିପଦା ବଜାରରେ ଥିବା ୩୦ରୁ ଊର୍ଦ୍ଧ୍ୱ ଦୋକାନର ବିଦ୍ୟୁତ୍ ତାର ଛିଣ୍ଡିଯିବା ସହ ବୈଦ୍ୟୁତିକ ଉପକରଣ ସବୁ ପୋଡ଼ିଯାଇଛି। ଘଟଣାରୁ ଜଣାପଡିଛି, ଏହି ଟ୍ରେଲର(ନଂ. ଆରଜେ୦୧ଜିଏ-୮୮୦୦) ଓ ଟ୍ରଲି (ନଂ. ଏଚଆର୫୫ଡବ୍ଲୁ-୩୦୯୯)କୁ ଛେଣ୍ଡିପଦା ପୋଲିସ ଓ ଓଡିସି ଟ୍ରାନ୍ସପୋର୍ଟର କର୍ମଚାରୀମାନେ ବଜାର ପାର କରାଉଥିବାବେଳେ ଉକ୍ତ ଗାଡି ଟଣାଯାଇଥିବା ବିଦ୍ୟୁତ୍ ତାରରେ ଲାଗି ଯାଇଥିଲା। ଫଳରେ ଛେଣ୍ଡିପଦା ବଜାରର ବହୁ ଦୋକାନର ବିଦ୍ୟୁତ୍ ତାର ଛିଣ୍ଡିଯାଇଥିବା ବ୍ୟବସାୟୀଙ୍କ ପକ୍ଷରୁ ଅଭିଯୋଗ ହୋଇଛି। ସମ୍ପୃକ୍ତ ବ୍ୟବସାୟୀମାନେ କ୍ଷତିପୂରଣ ଦେବାକୁ ଦାବି କରିବା ସହିତ ଉକ୍ତ ଗାଡିକୁ ଅଟକ ରଖିଥିଲେ। ଉପସ୍ଥିତ ଥିବା କର୍ମଚାରୀମାନେ ଏହାର ସମାଧାନ ସକାଳ ୧୦ଟା ସୁଦ୍ଧା କରିବା ପାଇଁ ପ୍ରତିଶ୍ରୁତି ଦେବା ପରେ ଉତ୍ତେଜନା ଥମିଥିଲା। ତେବେ ପ୍ରତିଶ୍ରୁତି ପୂରଣ ନ ହେବାରୁ ବଜାର କମିଟି ତରଫରୁ ଟ୍ରାନ୍ସପୋର୍ଟ କମ୍ପାନୀ ବିରୋଧରେ ଥାନାରେ ଲିଖିତ ଅଭିଯୋଗ କରାଯାଇଛି।