ପୃଥିବୀର ବିଭିନ୍ନ ଦେଶର ଲୋକ ନିଜର ଆୟ ମୁତାବକ ଟ୍ୟାକ୍ସ ବା କର ଦେଇଥାଆନ୍ତି। କାରଣ ଟ୍ୟାକ୍ସ ଦେଶର ବିକାଶ ପାଇଁ ନିହାତି ଜରୁରୀ। ତେବେ ଯଦି ଛୋଟ ମୋଟ କଥାରେ ଟ୍ୟାକ୍ସ ପକାଯାଏ, ତେବେ କେମିତି ଲାଗିବ? ଆମେ ସେମିତି କିଛି ଅଜବ ଟ୍ୟାକ୍ସ ସମ୍ପର୍କରେ ଜଣାଇବାକୁ ଯାଉଛୁ…
କଖାରୁ କିଣିଲେ ଟ୍ୟାକ୍ସ- ପରିବା ଦୋକାନରୁ ଆପଣ ଅନେକଥର କଖାରୁ କିଣିଥିବେ। ହେଲେ ଜାଣି ଆଶ୍ଚର୍ଯ୍ୟ ହେବେ ଆମେରିକାର ନ୍ୟୁଜର୍ସିରେ କଖାରୁ କିଣିଲେ ଦେବାକୁ ପଡିବ ଟ୍ୟାକ୍ସ। କଖାରୁକୁ ଯଦି ଆପଣ କାଟି ବିଭିନ୍ନ ଆକାର ଦେଇ ସେଥିରେ ଲାଇଟ୍ ଲଗାଇ ସଜାଇବା ପାଇଁ କିଣିଛନ୍ତି ତେବେ ସେଲ୍ସ ଟ୍ୟାକ୍ସ ପଡିବ। କିନ୍ତୁ ରୋଷେଇ କରି ଖାଇବା ପାଇଁ କିଣିଥିଲେ ଟ୍ୟାକ୍ସ ଦେବାକୁ ପଡିବ ନାହିଁ।
ଟାଟୁ କଲେ ଟ୍ୟାକ୍ସ- ଟାଟୁ କରିବା ଆଜିକାଲି ଯବୁପିଢିଙ୍କର ଫ୍ୟାଶନ ପାଲଟିଗଲାଣି। ତେବେ ଟାଟୁ କରାଇବା ଉପରେ ଯଦି ଟ୍ୟାକ୍ସ ପକାଯାଏ କେମିତି ଲାଗିବ। ଆମେରିକାର ଅରକାନସାସ୍ରେ ଟାଟୁ କଲେ ଟ୍ୟାକ୍ସ ଦେବାକୁ ହୁଏ। ସେ ପୁଣି ୬% ସେଲ୍ସ ଟ୍ୟାକ୍ସ।
ଟଏଲଟ୍ ଫ୍ଲଶ୍ କଲେ ଟ୍ୟାକ୍ସ- ଟଏଲେଟ୍ ବ୍ୟବହାର କଲାମାନେ ସମସ୍ତେ ଫ୍ଲଶ୍ ନିଶ୍ଚିତ ଭାବେ କରନ୍ତି। ଜାଣନ୍ତି ଏମିତି ଏକ ସ୍ଥାନ ଅଛି, ଯେଉଁଠି ଫ୍ଲଶ୍ କଲେ ବି ଟ୍ୟାକ୍ସ ଦେବାକୁ ହୁଏ। ସେହି ସ୍ଥାନଟି ହେଉଛି ଆମେରିକାର ମେରୀଲାଣ୍ଡ। ଏଠାକାର ସରକାର ଟଏଲେଟ୍ ଫ୍ଲଶ ବ୍ୟବହାର ପାଇଁ ଲୋକଙ୍କଠାରୁ ପ୍ରତି ମାସ ପ୍ରାୟ ୩୫୫ ଟଙ୍କା ଟ୍ୟାକ୍ସ ଆଦାୟ କରିଥାଏ। ଯଦିଓ ଏହି ଟଙ୍କାରେ ନାଳନର୍ଦ୍ଦମା ସଫା କରାଯାଇଥାଏ।
ବରଫ ଖଣ୍ଡ ପାଇଁ ଟ୍ୟାକ୍ସ- ଆମେରିକାର ଆରିଜୋନାରେ ବରଫ ଖଣ୍ଡ ବା ଆଇସ୍ ବ୍ଲକ୍ କିଣିଲେ ଟ୍ୟାକ୍ସ ଦେବାକୁ ପଡିଥାଏ। କିନ୍ତୁ ଆଇସ୍ କ୍ୟୁବ୍ କିଣିଲେ ଟ୍ୟାକ୍ସ ଦେବାକୁ ପଡ଼େନା।
ତାସ୍ ପତା କିଣାବିକାରେ ଟ୍ୟାକ୍ସ- ଆମେରିକାର ଅଲବାମାରେ ତାସ୍ କିଣା ଓ ବିକା ଉଭୟରେ ଟ୍ୟାକ୍ସ ଦେବାକୁ ପଡିଥାଏ। କିଣୁଥିବା ବ୍ୟକ୍ତି ପ୍ରତି ତାସ୍ ପ୍ୟାକେଟ୍ରେ ୧୦% ଓ ବିକୁଥିବା ବ୍ୟକ୍ତି ୭୧ଟଙ୍କା ଫିସ୍ ସହ ୨୧୩ ଟଙ୍କା ବାର୍ଷିକ ଲାଇସେନ୍ସ ପାଇଁ ଦେବାକୁ ହୁଏ।