ପାଣି ଶରୀର ପାଇଁ କେତେ ଗୁରୁତ୍ୱପୂର୍ଣ୍ଣ ସମସ୍ତେ ଜାଣିଛନ୍ତି। ଶରୀରକୁ ସୁସ୍ଥ ରଖିବାରେ ଜଳର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ମଣିଷ ଶରୀରରେ ପ୍ରାୟ ୬୦ରୁ ୭୦ ଭାଗ ଜଳ ରହିଥାଏ। ଏହା ମାଂସପେଶୀକୁ ସୁରକ୍ଷା ଦେବା ସହ ଶରୀରର ବିଭିନ୍ନ କୋଷକୁ ଅକ୍ସିଜେନ ଓ ନ୍ୟୁଟ୍ରିଶନ ଯୋଗାଇଥାଏ। ବେଳେ ବେଳେ ଦେଖିଥିବେ କେତେକ ଠିଆ ହୋଇ ପାଣି ପିଇଥାନ୍ତି। ହେଲେ ଜାଣିଛନ୍ତି କି ଏହା ଶରୀର ପାଇଁ କେତେ କ୍ଷତିକାରକ। ଏହା ବିଭିନ୍ନ ରୋଗକୁ ଆମନ୍ତ୍ରଣ ଦେଇଥାଏ। ତେବେ ଆସନ୍ତୁ ଜାଣିବା ଠିଆ ହୋଇ ପାଣି ପିଇଲେ କେଉଁ କେଉଁ ସବୁ ସମସ୍ୟା ଦେଖାଦେଇଥାଏ। ଠିଆ ହୋଇ ପାଣି ପିଇଲେ ଆମ ଶରୀରର ପାଚନ ତନ୍ତ୍ର ଦୁର୍ବଳ ହୋଇଯାଏ। ତେଣୁ ପାଚନ ପ୍ରକ୍ରିୟା ସ୍ବଭାବିକ ଭାବେ ହୋଇପାରେ ନାହିଁ। ଫଳରେ ଅନେକ ପ୍ରକାରର ପେଟଜନିତ ସମସ୍ୟା ଦେଖାଦେଇଥାଏ। ସେହିପରି ଠିଆ ହୋଇ ପାଣି ପିଇବା ଦ୍ୱାରା ଏହା ଦ୍ରୁତ ଗତିରେ କିଡନୀକୁ ଚାଲି ଯାଇଥାଏ। ଫଳରେ ସେହି ପାଣିକୁ କିଡନୀ ଠିକ୍ ଭାବେ ଛାଣି ନ ପାରିବାରୁ ରକ୍ତ ଦୂଷିତ ହୋଇଥାଏ। ଯାହାଦ୍ୱାରା କିଡନୀ ଜନିତ ବିଭିନ୍ନ ସମସ୍ୟା ଦେଖାଦିଏ ବୋଲି ଗବେଷକ କହିଛନ୍ତି।