କାନପୁର: ଏବେ କରୋନା ଭାଇରସ୍ ପାଇଁ ସବୁଆଡେ ଭୟର ବାତାବରଣ। ପାଖ ପଡ଼ିଶା ଠାରୁ ଆରମ୍ଭ କରି ବନ୍ଧୁବାନ୍ଧବମାନଙ୍କୁ ବି ଲୋକେ ଘରେ ପୁରାଇବାକୁ ରାଜି ହେଉନାହାନ୍ତି । ଏହି ଭାଇରସ୍ ସଂକ୍ରମଣରେ ଚାଇନା ପରେ ସବୁଠୁ ଅଧିକ ଲୋକ ମୃତ୍ୟୁବରଣ କଲେଣି ଇଟାଲିରେ। ଇଟାଲିର ଭୟଙ୍କର ସ୍ଥିତି ଏବେ ସମସ୍ତଙ୍କୁ ଛାନିଆ କରିଛି। ଏମିତି ଏକ ସମୟରେ ଯଦି ଇଟାଲିରୁ କାହା ପାଖକୁ କିଛି ଜିନିଷ ଆସେ ତାହେଲେ ପରିସ୍ଥିତି କ’ଣ ହେବ ଭାବି ପାରୁଛନ୍ତି… ଏମିତି ଏକ ଅସ୍ବାଭାବିକ ପରିସ୍ଥିତି ଦେଖିବାକୁ ମିଳିଥିଲା ଉତ୍ତରପ୍ରଦେଶ କାନପୁରର ମାଲରୋଡ ଠାରେ ଥିବା କାନାଡ଼ା ବ୍ୟାଙ୍କ ଶାଖାରେ।
ଏହି ବ୍ୟାଙ୍କକୁ ଗତ ମଙ୍ଗଳବାର ଦିନ ଏକ କୋରିଅର ଆସିଥିଲା। ବ୍ୟାଙ୍କ କର୍ମଚାରୀମାନେ ପ୍ରଥମେ କିଛି ନ ଦେଖି କୋରିଅର ରିସିଭ ତ କରି ଦେଇଥିଲେ, କିନ୍ତୁ କିଛି ସମୟ ପରେ ଯେତେବେଳେ କୋରିଅରରେ କର୍ମଚାରୀମାନେ ଠିକଣା ଦେଖିଥିଲେ ସେତେବେଳେ ହଠାତ୍ ଭୟରେ ଥରିବାକୁ ଲାଗିଥିଲେ। କାରଣ କୋରିଅରଟି ଆସିଥିଲା ଇଟାଲିରୁ। ଏକଥା ଜାଣିବା ପରେ ପୁରା ବ୍ୟାଙ୍କରେ ହଠାତ୍ ଭୟର ବାତାବରଣ ସୃଷ୍ଟି ହୋଇଥିଲା। ବ୍ୟାଙ୍କର କୌଣସି କର୍ମଚାରୀ କୋରିଅରଟିକୁ ଛୁଇଁବାକୁ ପ୍ରସ୍ତୁତ ନଥିଲେ। ବହୁ କଷ୍ଟରେ କୋରିଅରଟିକୁ ଏକ ବାକ୍ସ ଭିତରେ ଅଲଗା ସ୍ଥାନରେ ରଖାଯାଇଥିଲା। କୋରିଅରଟିକୁ ବାରମ୍ବାର ସାନିଟାଇଜ୍ କରିବା ସହ ୪୮ ଘଣ୍ଟା ପରେ ହିଁ ତାକୁ ଖୋଲାଯିବା ପାଇଁ ସ୍ଥିର କରାଯାଇଥିଲା।
