ବିଜେପୁର, ୨୫।୩ (ଡି.ଏନ୍.ଏ.)- ସମିଆର ଧାରେ ପଡି ରୀତିନୀତି, ରିକ୍ମା ବଦ୍ଲିବାରଟା ସୁଆଭାବିକ୍ ଆଏ। ସେଦିନ୍ କେନ୍ତା ଥିଲା, ଆଏଜ୍ କେନତା ହେଉଛେ ବଲି ବିସ୍ମାତ୍ ହେବାରଟା ଠିକ୍ ନୁହେ। ଆଏଜ୍କାଲି ବି କାମ୍ବୁତା ଭିତ୍ରେ ପୁରାତନ୍ କାଲର୍ ଛାପ୍ କେତେ ଠାନେ ଦେଖ୍ବାକେ ମିଲୁଛେ। ଯେନ୍ତା ପୁରାତନ୍ କାଲେ ରଜା, ଜମିଦାର୍, ଗଁତି ଶାସନ୍ ବେଲେ ଫିଗାଁଥି ଝନେ ଝନେ ଡକୁଆ ରହୁଥିଲେ। ସେମାନେ ପୂଜାଧଜା, ଯାନିଯାତ୍ରା, ଗାଁର୍ ଭଲମନ୍ଦ ବିଷେଥି ଲୁକ୍କୁ ସୂଚନା ଦେଉଥିଲେ। ସେମାନକୁ ଡକୁଆ କହୁଥିଲେ। କାଏଁ ସଖାଲ, ବେଲବୁଡ଼ିଆ ସେମାନେ ଗଁାଗଁା ବୁଲି ଗଁାଖୁଲିରେ ଟିମ୍କିଡି ବଜେଇ ଲୁକ୍କୁ ଠୋଲ କରୁଥିଲେ ଆର ଧାଯ୍ ହେଇଥିବାର ସୂଚନା ଦେଉଥିଲେ। ଇଥିର ଲାଗି ସେମାନେ ରଜା, ଗଁତିଆ, ଜମିଦାରନୁ କମେଇ ଖାଏବାକେ ଜମିବାଡ଼ି ପାଉଥିଲେ। କାହାର ଗାଈଗୋରୁ କି କେହେନ୍ସି ଜିନିଷ ହଜିଗଲେ ଫିରିପାଏବାକେ ଲୋକ୍ ତାହାକୁ ବିଅକ୍ତିଗତ ହିସାବେ ବି ବେଭାର କରୁଥିଲେ। ଗଁାଖୁଲିରେ ରଡି ରଡି ଡାକ୍ ପକେଇ ଡକୁଆମାନେ ସୂଚନା ଦେଉଥିଲେ। ଗଁାର ସୁଖ୍ଦୁଖ୍ଥି ଡକୁଆମାନେ ସାମିଲ ହେଉଥିଲେ। ସେଥିରଲାଗି ଲୁକେ ଗହଗହ ମନେ ଯାନିଯାତ୍ରା ତିହାରବାହାର ବେଲେ ତାହାକୁ ପିଠାପନା, ପଏସାପତର୍ ଦେଉଥିଲେ। ଡକୁଆର ପୁଓ ଡକୁଆ କାମ କରବାର ଗୁଟେ ରିକ୍ମା ପିଢ଼ି ଧରି ପିଢ଼ି ଚଲିଆସୁଥିଲା। ହେଲେ ରାଜାଡ଼ି ଶାସନ, ଜମିଦାରି, ଗଉଁତି ଗଲାଦିନୁ ଡକୁଆ ରିକ୍ମାଟା ଉଠିଗଲା। କଁା ଭଁା ଗଁାଗଁଲିରେ ଇ ରିକ୍ମା ବଁଚିଛେ। ହେଲେ ଇ ବିଗିଅଁାନ୍ ଆର୍ କାରିଗରି ଯୁଗେ ସୋସିଆଲ ମିଡିଆ ଡକୁଆ ଠାନ୍ ଆବ୍ରି ନେଇଥିବାର୍ ଦେଖ୍ବାକେ ମିଲୁଛେ। ଡକୁଆ ଏଖେଇ ଚୁଟେକେ ଶହ ଶହ ଲୋକ୍କଁ ଚେତେଇ ନେଲା ମିତାର୍ ସୋସିଆଲ୍ ମିଡିଆ ହଜାର ହଜାର ଲୋକ୍କୁ ସଚେତନ୍ କରୁଛେ। ଏଛେନ୍ କରୋନା ଭାଏରସ୍ ସଂକ୍ରମଣ ଲାଗି ପୁର୍ଥିବାସୀ ଅଚାବୁହା। ଇ ସମିଆଥି ଲୋକ୍କୁ ସଚେତନ୍ କର୍ବାରେ ସୋସିଆଲ ମିଡିଆ ବରକସ୍ ସହଯୋଗ କରୁଛେ। ଗଲା ରଏବାର ପ୍ରଧାନମନ୍ତ୍ରୀ ଡାକ୍ରା ଦେଇଥିବାର ଜନତା କରଫ୍ୟୁ ଗଁାଗଁଲିନୁ ସହରତକ୍ ସାଫୁଲ ହେବାର ଭିତରେ ଇ ସୋସିଆଲ୍ ମିଡିଆର୍ ଦେନ୍କେ ସହଁରାବାକେ ପଡବା। ଜୀବନ୍ ମରନ୍ର ସମିଆ ଲାଗି ଲୁକକଁର୍ ଭିତରେ ଦିନ୍କେ ଜାତୀୟତାର ଭାବ୍ ସୁରୁଷ୍ଟି ହେଇଥିଲା। ସୋସିଆଲ ମିଡିଆକେ ବେଭାର କରୁଥିବାର ସବୁ ଲୋକ୍ ଇତାକେ ଗାଁର ଡକୁଆ ଭାବେ କାମ୍ ନିପ୍ଟାଲେ ଗଁା ସଂଗେ ଦେଶ ସୁଧ୍ରିବା, ଇଥି ଟିକେ ବି ସଁଧେ ନଁାଇଁନ।