ଜୟପୁର,୧୦।୩(ଡି.ଏନ୍.ଏ.): କୋରାପୁଟ ଜିଲା ଲମତାପୁଟ ବ୍ଲକ ନିକଟସ୍ଥ ଦୁର୍ଲା ଘାଟରେ ଡଙ୍ଗା ବୁଡ଼ି ଜଣେ ବ୍ୟକ୍ତି ନିଖୋଜ ଥିଲେ। ତେବେ ରବିବାର ମଧ୍ୟାହ୍ନରେ ତାଙ୍କ ମୃତଦେହ ଉକ୍ତ ଡ୍ୟାମ୍ରୁ ଉଦ୍ଧାର କରାଯାଇଛି। ମୃତକ ହେଲେ ବଡ଼ଗୁରୁ ପାଙ୍ଗି(୫୦)।
ସୂଚନାନୁଯାୟୀ, ବଡ଼ଗୁରୁ ପାଙ୍ଗ ଶନିବାର ମଧ୍ୟାହ୍ନ ୧୨ଟା ସମୟରେ କୋଲାବ ଜଳଭଣ୍ଡାରକୁ ଯାଇଥିଲେ। ସେଠାରୁ ଏକ ମାଛମରା ଡଙ୍ଗା ସାହାଯ୍ୟରେ କୌଣସି କାମରେ ପରଜା ଖୁଡୁବୀଗ୍ରାମକୁ ଯାଇଥିଲେ। କାମ ସାରି ଅପରାହ୍ନରେ ଗାଁକୁ ଫେରୁଥିବା ବେଳେ ଡଙ୍ଗାରେ ପାଣି ଭର୍ତ୍ତି ହୋଇ ମଝି ନଦୀରେ ବୁଡ଼ି ଯାଇଥିଲା। ଖବର ପାଇ ପରିବାର ଓ ସ୍ଥାନୀୟ ଲୋକମାନେ ମିଶି ଜଳଭଣ୍ଡାରରେ ଖୋଜାଖୋଜି କରିଥିଲେ। ମାତ୍ର ସନ୍ଧ୍ୟା ସୁଦ୍ଧା ତାଙ୍କର କୌଣସି ପତ୍ତା ମିଳି ନ ଥିଲା। ପରେ ଅଗ୍ନିଶମ କର୍ମଚାରୀ ତାଙ୍କୁ ରବିବାର ଡ୍ୟାମ୍ରୁ ଉଦ୍ଧାର କରିଥିଲେ।