ଜେନେଭା,୨୬।୫: ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲୁଏଚ୍ଓ) ସୋମବାର କରୋନା ମହାମାରୀକୁ ନେଇ ଆଉ ଏକ ଚେତାବନୀ ଦେଇଛି। ଡବ୍ଲୁଏଚ୍ଓ କହିଛି ଯେଉଁ ଦେଶରେ କରୋନା ସଂକ୍ରମଣ କମ୍ ହୋଇଛି ସେଠାରେ ପୁଣିଥରେ କରୋନା ଫେରିପାରେ। କାରଣ ବିଶ୍ୱର ଅନେକ ବିଶେଷଜ୍ଞ କହୁଛନ୍ତି କି ବିଶ୍ୱପାଇଁ ‘ସେକେଣ୍ଡ ଓ୍ବେବ’ର ବିପଦ ରହିଛି। ଯଦି ବିଶ୍ୱରେ ‘ସେକେଣ୍ଡ ଓ୍ବେବ’ ନ ହୁଏ ତଥାପି ଆମେରିକା ଭଳି କିଛି ଦେଶକୁ ‘ସେକେଣ୍ଡ ଓ୍ବେବ’ର ସାମ୍ନା କରିବାକୁ ପଡିପାରେ। ଏବେ କିଛିଦିନ ପାଇଁ କରୋନା ସଂକ୍ରମଣ ବୃଦ୍ଧି ପାଇବାକୁ ଥିବା ବେଳେ ଏସିଆ-ଆଫ୍ରିକାରେ ଅଧିକ ସଂକ୍ରମଣ ହେବ ବୋଲି ବିଶେଷଜ୍ଞମାନେ ଅନୁମାନ କରିଛନ୍ତି। ଏବେ ‘ସେକେଣ୍ଡ ଓ୍ବେବ’ନ ଥିଲେ ମଧ୍ୟ ଏହା କେବେବି ଆସିପାରେ ବୋଲି କହିଛନ୍ତି ଡବ୍ଲୁଏଚ୍ଓ ହେଲ୍ଥ ଏମରଜେନ୍ସି ପ୍ରୋଗ୍ରାମର ନିର୍ଦ୍ଦେଶକ ଡାକ୍ତର ମାଇକ ରେୟାନ। ଯେଉଁ ଦେଶମାନେ ଦାବି କରୁଛନ୍ତି କି ସେମାନଙ୍କର କରେନା ସଂକ୍ରମଣ କମ୍ ହୋଇ ଆସିଲାଣି ସେଠାରେ କେବେବି କରୋନା ଫେରିପାରେ ବୋଲି ଅନୁମାନ କରାଯାଉଛି। ତେବେ ବର୍ଷା ଓ ଶୀତ ଆସିଲେ କରୋନା ପୁଣିଥରେ ଉଗ୍ର ହୋଇପାରେ ବୋଲି ଅନୁମାନ କରାଯାଉଥିବା କହିଛନ୍ତି ଡବ୍ଲୁଏଚ୍ଓର ଇନଫେକ୍ସନ ଡିଜିଜ ଏପିଡେମୋଲୋଜିଷ୍ଟ ମାରିୟା ଭାନ କେରଖୋବେ। ତେଣୁ ବିଶ୍ୱର ସମସ୍ତ ଦେଶ ଏହାକୁ ନେଇ ସଜାଗ ରହିବା ଜରୁରୀ ବୋଲି ସେ କହିଛନ୍ତି। ଏମିତିକି ସମସ୍ତେ ରାପିଡ ଟେଷ୍ଟ କିଟ୍ ମଧ୍ୟ ଗଚ୍ଛିତ ରଖିବା ଦରକାର ବୋଲି ସେ ମତ ଦେଇଛନ୍ତି।
