ମସ୍କୋ, ୩୧ା୩:ଗୁପ୍ତଚର ବୃତ୍ତି ଅଭିଯୋଗରେ ଓ୍ବାଲ୍ ଷ୍ଟ୍ରିଟ୍ ଜର୍ନାଲ(ଡବ୍ଲ୍ୟୁଏସ୍ଜେ)ର ଜଣେ ରିପୋର୍ଟରଙ୍କୁ ରୁଷିଆର ଶୀର୍ଷ ସୁରକ୍ଷା ସଂସ୍ଥା ଫେଡେରାଲ ସିକ୍ୟୁରିଟି ସର୍ଭିସ୍ (ଏଫ୍ଏସ୍ବି) ଗିରଫ କରିଛି। କେତେକ ଗୁପ୍ତ ତଥ୍ୟ ସଂଗ୍ରହ ଲାଗି ଉଦ୍ୟମ ଚଳାଇଥିବା ରିପୋର୍ଟର ଏଭାନ ଗେର୍ସକୋଭିଚ୍ଙ୍କୁ ଉରାଲର ପାର୍ବତ୍ୟାଞ୍ଚଳ ସହର ୟେକାଟୋରିନବର୍ଗରୁ ଗିରଫ କରାଯାଇଥିବା ଏଫ୍ଏସ୍ବି କହିଛି। ଶୀତଳ ଯୁଦ୍ଧଠାରୁ ଆମେରିକା ଖବରକାଗଜର କୌଣସି ରିପୋର୍ଟରଙ୍କୁ ଗୁପ୍ତଚର ବୃତ୍ତି ଅଭିଯୋଗରେ ରୁଷିଆ ଗିରଫ କରିବା ଏହା ପ୍ରଥମ ଘଟଣା। ୟୁକ୍ରେନ୍ ଯୁଦ୍ଧକୁ ନେଇ ମସ୍କୋ ଓ ଓ୍ବାଶିଂଟନ ମଧ୍ୟରେ ଉତ୍ତେଜନା ବୃଦ୍ଧି ପାଇଥିବାବେଳେ ଗେର୍ସକୋଭିଚ୍ଙ୍କୁ ଗିରଫ କରାଯାଇଛି। ଗେର୍ସକୋଭିଚ୍ ଆମେରିକା ନିର୍ଦ୍ଦେଶରେ ରୁଷିଆର ଏକ ସାମରିକ ଶିଳ୍ପ କମ୍ପ୍ଲେକ୍ସ ଉଦ୍ୟୋଗରୁ ବିଭିନ୍ନ କାର୍ଯ୍ୟର ତଥ୍ୟ ସଂଗ୍ରହ ପାଇଁ କାର୍ଯ୍ୟ କରୁଥିଲେ ବୋଲି ରୁଷିଆ ଅଭିଯୋଗ କରିଛି। ସେ ଗୁପ୍ତଚର ବୃତ୍ତିରେ ଦୋଷୀସାବ୍ୟସ୍ତ ହେଲେ ୨୦ ବର୍ଷ ଜେଲ୍ଦଣ୍ଡ ଭୋଗିପାରନ୍ତି। ଓ୍ବାଲଷ୍ଟ୍ରିଟ୍ ଜର୍ନାଲର ମସ୍କୋ ବ୍ୟୁରୋର ଖବରଦାତା ଭାବେ ଗେର୍ସକୋଭିଚ୍ ରୁଷିଆ ଓ ୟୁକ୍ରେନ୍ରୁ ଖବର ସଂଗ୍ରହ କରୁଥିଲେ। ସେ ଜଣେ ସାମ୍ବାଦିକ ଭାବେ କାର୍ଯ୍ୟ କରିବା ଲାଗି ରୁଷିଆ ବହିର୍ବ୍ୟାପାର ମନ୍ତ୍ରଣାଳୟରୁ ଆଧିକାରିକ ମାନ୍ୟତା ପାଇଥିଲେ। ମସ୍କୋରୁ ତାଙ୍କ ଶେଷ ରିପୋର୍ଟ ଗତ ସପ୍ତାହରେ ପ୍ରକାଶ ପାଇଥିଲା। ପାଶ୍ଚାତ୍ୟ କଟକଣା ଯୋଗୁ ରୁଷିଆ ଅର୍ଥନୀତିରେ ମାନ୍ଦାବସ୍ଥା ଦେଖାଦେଇଥିବା ଏଥିରେ ସେ ଦର୍ଶାଇଥିଲେ।