ଛତିଆ,୧୬।୭(ଡି.ଏନ୍.ଏ.): ଯାଜପୁର ଜିଲା ବଡ଼ଚଣା ବ୍ଲକ ଅନ୍ତର୍ଗତ ଛତିଆ ଚମ୍ପାପୁର ରାସ୍ତାରେ ମଙ୍ଗଳବାର ଏକ ଦୁର୍ଘଟଣାରେ ଜଣେ ମହିଳାଙ୍କ ମୃତ୍ୟୁ ଘଟିଛି। ସେ କଟକ ଜିଲା କଇଥା ପଞ୍ଚାୟତର ଲାଲବେଗୀ ଗ୍ରାମର ଶାନ୍ତି ପାଲ (୪୮) ବୋଲି ଜଣାପଡିଛି।
ସୂଚନାନୁଯାୟୀ, ମଧ୍ୟାହ୍ନରେ ମହିଳା ଜଣକ କୌଣସି କାର୍ଯ୍ୟରେ ସ୍ବାମୀଙ୍କ ସାଇକେଲରେ ଚମ୍ପାପୁର ରାସ୍ତାଦେଇ ଛତିଆ ଆସୁଥିଲେ। ତେବେ ହଠାତ୍ ସାଇକେଲରୁ ତଳେ ପଡିଯିବା ସମୟରେ ଏକ ଡମ୍ପର ତାଙ୍କ ଉପରେ ଚଢ଼ିଯାଇଥିଲା। ଘଟଣାସ୍ଥଳରେ ମହିଳାଙ୍କ ମୃତ୍ୟୁ ଘଟିଥିଲା। ସ୍ଥାନୀୟ ଲୋକେ ଗାଡି ସହ ଡ୍ରାଇଭରକୁ ଅଟକ ରଖିଛନ୍ତି। ଏହାସହ ମୃତଦେହ ରାସ୍ତାରେ ରଖି ଅବରୋଧ କରିଛନ୍ତି। ଖବରପାଇ ବୈରୀ ପୋଲିସ ପହଞ୍ଚି ତଦନ୍ତ ଚଳାଇଛି।