କଟକ ଅଫିସ,୧୨।୪: ଗହଳଚହଳ ଭିତରେ ଦିନରାତି କଟେ। ସେତେବେଳେ ଚୋର, ତସ୍କରଙ୍କ ଭୟ ରହୁଥିଲା। ସେଥିପାଇଁ ସବୁବେଳେ ସଜାଗ ରହୁଥିଲୁ। ମନରେ ଏତେଟା ଡର ନ ଥିଲା। ଏବେ ଯେଉଁ ଆଡେ ଚାହିଁବ ସିଆଡ଼େ ପୋଲିସ। ମାଳମାଳ ଖାକି ପୋଷାକଙ୍କ ଭିଡ଼ ଯୋଗୁ ଚୋରିର ପ୍ରଶ୍ନ ଉଠୁନି। ହେଲେ ଏବେ ସହରର ଶୂନଶାନ ରାସ୍ତାଘାଟ ବେଶୀ ଡରାଉଛି। ମନକୁ ଏକ ଅଜଣା ଭୟ ମାଡ଼ି ବସୁଛି। ପୁଣି ସବୁକିଛି ଶୀଘ୍ର ସ୍ବାଭାବିକ ହୋଇଯାଉ ଏହା ହିଁ ସବୁବେଳେ ଠାକୁରଙ୍କୁ ପ୍ରାର୍ଥନା କରୁଛି ବୋଲି କହିଛନ୍ତି ଲିଙ୍କରୋଡ ନିକଟରେ ଥିବା ଏକ ଶୋ’ ରୁମ୍ର ସିକ୍ୟୁରିଟି ଗାର୍ଡ ପ୍ରଶାନ୍ତ ବେହେରା। ପେଟ ପୋଷିବା ପାଇଁ ଏହି ସହରକୁ ଆଶ୍ରା କରିଥିବା ପ୍ରଶାନ୍ତଙ୍କୁ କିନ୍ତୁ ସହରର ଶୂନ୍ୟତା ଆଦୌ ଭଲ ଲାଗୁନି ବୋଲି କହିଛନ୍ତି।
ପ୍ରଶାନ୍ତଙ୍କ ଘର ବୈୟାଳିଶମୌଜା ଅନ୍ତର୍ଗତ ବେଣ୍ଟକାର ଗ୍ରାମରେ। କିଛି ବର୍ଷ ହେବ ସେ ଏକ ସିକ୍ୟୁରିଟି ସଂସ୍ଥାରେ କାମ କରି ପରିବାର ପୋଷୁଛନ୍ତି। ଏବେ ଲିଙ୍କରୋଡ -ବାଦାମବାଡ଼ି ମୁଖ୍ୟରାସ୍ତା କଡ଼ରେ ଥିବା ଏକ ଗାଡ଼ି ଶୋ’ ରୁମ୍ରେ ସେ ସିକ୍ୟୁରିଟି ଗାର୍ଡ଼ ଭାବେ କାର୍ଯ୍ୟ କରୁଛନ୍ତି। ପରିବାର କହିଲେ, ସ୍ତ୍ରୀ ଆଉ ଦୁଇ ଝିଅ। ସକାଳ ହେଲେ ବେଣ୍ଟକାରରୁ କର୍ତ୍ତବ୍ୟସ୍ଥଳକୁ ଆସନ୍ତି। ଘରୁ ବାହାରିବା ମାତ୍ରେ ଦୁଇ ଝିଅ ସାନିଟାଇଜର ଓ ମାସ୍କ ନେବା ପାଇଁ ବାଧ୍ୟ କରନ୍ତି। କାହା ସହିତ ମିଶିବନି, ଅଜଣା ଲୋକକୁ ଛୁଇଁବନି, ନିମୟିତ ବ୍ୟବଧାନରେ ହାତକୁ ଧୋଇବ ବୋଲି ବୁଝାନ୍ତି। ଫୋନ କରି ମଧ୍ୟ ଏହି କଥା ବାରମ୍ବାର ମନେ ପକାଇ ଦିଅନ୍ତି। ଘର ପାଇଁ ସେ ପର୍ଯ୍ୟପ୍ତ ପରିମାଣର ଖାଦ୍ୟ ସାମଗ୍ରୀ, ମାସ୍କ ଓ ସାନିଟାଇଜର କିଣି ନେଇଛନ୍ତି ବୋଲି ପ୍ରଶାନ୍ତ କହିଥିଲେ। ପ୍ରଶାନ୍ତ କହିଛନ୍ତି, ତାଙ୍କ କାନ୍ଧ ଉପରେ ପରିବାରର ବୋଝ ଲଦି ହୋଇଛି। ସିକ୍ୟୁରିଟି ସଂସ୍ଥା ପକ୍ଷରୁ ମାସିକ ଦରମା ମଧ୍ୟ ଠିକ ସମୟରେ ମିଳୁଛି। ତେଣୁ ଏଭଳି ଭୟାନକ ପରିସ୍ଥିତିରେ ମଧ୍ୟ ସେ ଚାକିରି ଛାଡ଼ି ପାରୁନାହାନ୍ତି। ପ୍ରତିଦିନ ଶହ ଶହ ଲୋକ ଆସନ୍ତି। ପାଖରେ ବସି କଥା ହୁଅନ୍ତି। ହେଲେ ଏବେ ଚୁପଚାପ ବସିବାକୁ ପଡ଼ୁଛି। ଯାହା ଫଳରେ ମାନସିକ ଭାବେ ମଧ୍ୟ ଭାରାକ୍ରାନ୍ତ ଲାଗୁଛି। ପରିସ୍ଥିତି ତୁରନ୍ତ ସୁଧୁରିଯିବା ସେ ଚାହାନ୍ତି ବୋଲି ପ୍ରଶାନ୍ତ କହିଛନ୍ତି।