ନୂଆଦିଲ୍ଲୀ,୩୧ା୭: ତିନି ତଲାକ୍ ବିଲ୍କୁ ପାର୍ଲାମେଣ୍ଟର ମଞ୍ଜୁରୀ ପରେ ଏବେ ରାଷ୍ଟ୍ରପତିଙ୍କ ମୋହରକୁ ଅପେକ୍ଷା। ରାଷ୍ଟ୍ରପତି ରାମନାଥ କୋବିନ୍ଦ ଏହାକୁ ଅନୁମୋଦନ କରିବା ପରେ ବିଲ୍ ଆଇନରେ ପରିଣତ ହେବ। ୨୦୧୭ ଅଗଷ୍ଟରେ ଟ୍ରିପଲ୍ ତଲାକ୍କୁ ସୁପ୍ରିମକୋର୍ଟ ଅସାମ୍ବିଧାନିକ ବୋଲି ଘୋଷଣା କରିଥିଲେ। ଏହା ପରେ ପ୍ରଥମେ ୨୦୧୭ ଡିସେମ୍ବରରେ ତିନି ତଲାକ୍ ବିଲ୍ ଲୋକ ସଭାରେ ଆଗତ ହୋଇଥିଲା। ଉକ୍ତ ବିଲ୍ ନିମ୍ନ ସଦନରେ ଆଉ ୨ ଥର ଗୃହୀତ ହୋଇଥିବାବେଳେ ରାଜ୍ୟ ସଭାରେ ଏନ୍ଡିଏର ସଂଖ୍ୟାଗରିଷ୍ଠତା ନ ଥିବାରୁ ଏହା ଅଟକି ଯାଇଥିଲା। ୨୦୧୯ ସାଧାରଣ ନିର୍ବାଚନରେ ନରେନ୍ଦ୍ର ମୋଦି ସରକାର ପୁନଃ କ୍ଷମତାସୀନ ହେବା ପରେ ଗତ ସପ୍ତାହରେ ଏହା ଲୋକ ସଭାରେ ଗୃହୀତ ହୋଇଥିଲା। ମଙ୍ଗଳବାର ବିଲ୍ ଉଚ୍ଚ ସଦନରେ ଗୃହୀତ ହେବା ପରେ ମଧ୍ୟଯୁଗୀୟ ପ୍ରଥା ଶେଷରେ ଇତିହାସର ଡଷ୍ଟବିନ୍କୁ ଚାଲିଯାଇଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟୁଇଟ୍ କରିଛନ୍ତି। ଏହା ଆଇନରେ ପରିଣତ ହେଲେ କୌଣସି ମୁସଲମାନ ପୁରୁଷ କଥିତ, ଲିଖିତ କିମ୍ବା ହ୍ବାଟ୍ସଆପ୍ ବା ଅନ୍ୟ କୌଣସି ଇଲେକ୍ଟ୍ରୋନିକ୍ସ ମାଧ୍ୟମରେ ସ୍ତ୍ରୀଙ୍କୁ ତିନିଥର ତଲାକ୍ କହି ଛାଡ଼ପତ୍ର ଦେଇପାରିବେ ନାହିଁ। କେହି ଏପରି କଲେ ତାହାକୁ ଧର୍ତ୍ତବ୍ୟ ଅପରାଧ ଭାବେ ବିବେଚନା କରାଯିବ। ସମ୍ପୃକ୍ତ ଅଭିଯୁକ୍ତଙ୍କୁ ୩ ବର୍ଷ ପର୍ଯ୍ୟନ୍ତ ଜେଲ୍ ଓ ଜରିମାନାର ବ୍ୟବସ୍ଥା ଏଥିରେ ରହିଛି। ଏହାସହ ତିନି ତଲାକ୍ ମାମଲାର ତଦନ୍ତ କରୁଥିବା ପୋଲିସ ଅଧିକାରୀ ଅଭିଯୁକ୍ତଙ୍କୁ ବିନା ଓ୍ବାରେଣ୍ଟରେ ଗିରଫ କରିପାରିବେ। ପୀଡ଼ିତ ମହିଳାଙ୍କ ପକ୍ଷ ଶୁଣିବା ପରେ ତାଙ୍କୁ ଜଣେ ମାଜିଷ୍ଟ୍ରେଟ୍ ଜାମିନ ଦେଇପାରିବେ।