ମସ୍କୋ,୨୨ା୬ (ଏ.ପି.): ଡାଇନାମୋ ମସ୍କୋର ୩ ଖେଳାଳି କରୋନା ପଜିଟିଭ ଜଣାପଡ଼ିବା ପରେ ଚଳିତ ରଷିଆନ ଫୁଟ୍ବଲ ଲିଗ୍ରେ ଆଗକୁ ଖେଳାଯିବାକୁ ଥିବା ଏହାର ଏକ ମ୍ୟାଚ୍କୁ ସ୍ଥଗିତ ରଖାଯାଇଛି। କୋଭିଡ୍-୧୯ ଟେଷ୍ଟରେ ପଜିଟିଭ ଆସିଥିବା ଖେଳାଳି ହେଲେ ଫରଓ୍ବାର୍ଡ କ୍ଲିଣ୍ଟନ ଏନ୍’ଜେ ଏବଂ ମିଡ୍ଫିଲ୍ଡର ଦ୍ୱୟ ଚାଲର୍ସ କାବୋରେ ଏବଂ ସେବାଷ୍ଟିଆନ ସିଜିମାନସ୍କି। ଶନିବାର ଅନ୍ୟ ସମସ୍ତ ଖେଳାଳିଙ୍କଠାରୁ ସଂଗ୍ରହ କରାଯାଇଥିବା ସାମ୍ପଲ ନେଗେଟିଭ୍ ଆସିଥିଲା। ଡାଇନାମୋ ରବିବାର ଏଫ୍ସି କ୍ରାସ୍ନୋଦର ବିପକ୍ଷରେ ଖେଳିଥାନ୍ତା। କିନ୍ତୁ ମ୍ୟାଚ୍କୁ ସ୍ଥଗିତ ରଖିବା ଲାଗି କ୍ରାସ୍ନୋଦର ରାଜି ହୋଇ ଯାଇଥିଲା। ଏହି ମ୍ୟାଚ ପାଇଁ ରଷିଆନ ଫୁଟ୍ବଲ ଆସୋସିଏଶନ ନୂଆ ତାରିଖ ଜୁଲାଇ ୧୯ ଧାର୍ଯ୍ୟ କରିଛି। କରୋନା ଭାଇରସ୍ ଯୋଗୁ ୩ ମାସ ସ୍ଥଗିତ ରହିବାପରେ ଗତ ଶୁକ୍ରବାରଠାରୁ ରଷିଆନ ଲିଗ୍ ପୁନର୍ବାର ଆରମ୍ଭ ହୋଇଛି। କରୋନା ଭାଇରସ୍ ଦ୍ୱାରା ବାଧାପ୍ରାପ୍ତ ହେବାରେ ଏହା ହେଉଛି ଦ୍ୱିତୀୟ ମ୍ୟାଚ। ଶୁକ୍ରବାର ଖେଳାଯାଇଥିବା ଏକ ମ୍ୟାଚରେ ସୋଚି ୧୦-୧ରେ ଏଫ୍ସି ରୋସ୍ତଭକୁ ପରାସ୍ତ କରିଛି। ରୋସ୍ତଭ ଏହି ମ୍ୟାଚରେ ଯୁବ ଖେଳାଳିଙ୍କୁ ଖେଳାଇବାକୁ ବାଧ୍ୟ ହୋଇଥିଲା। ଏପରି କି ଦଳର କେତେଜଣ ଖେଳାଳିଙ୍କ ବୟସ ମାତ୍ର ୧୬ ବର୍ଷ ଥିଲା। ରୋସ୍ତଭର ପ୍ରଥମ ଦଳରେ ଜଣେ କରୋନା ପଜିଟିଭ ଥିବା ଜଣାପଡ଼ିବା ପରେ ସମସ୍ତ ଖେଳାଳି ଏବେ ଆଇସୋଲେଶନରେ ଅଛନ୍ତି। ମ୍ୟାଚକୁ ସ୍ଥଗିତ ରଖିବା ଲାଗି ସୋଚି କୌଣସିମତେ ରାଜି ହୋଇ ନ ଥିଲା।