ଲକ୍ଷଲକ୍ଷ ବର୍ଷ ପୂର୍ବେ ଯେତେବେଳେ ପୃଥିବୀର ଉତ୍ପତ୍ତି ହେଲା ସେତେବେଳେ ଜୀବଜନ୍ତୁଙ୍କ ବିକାଶ ହେବାରେ ଲାଗିଲା। କିନ୍ତୁ ପୁଣି ଏହାର କିଛି ବର୍ଷ ପରେ ଲକ୍ଷାଧିକ ପ୍ରଜାତିର ଜୀବଜନ୍ତୁ ଲୋପ ପାଇଗଲେ। ଯାହାର ଅବଶେଷାଂଶ ଆଜି ମଧ୍ୟ ମିଳୁଛି। ତାହା ହେଉଛି ଡାଇନୋସର। ନିଶ୍ଚୟ ଡାଇନୋସର୍ ବିଷୟରେ ଶୁଣିଥିବେ। ଯାହାକି ଦୁନିଆର ସବୁଠୁ ବଡ଼ ପ୍ରାଣୀ ଥିଲା। କିନ୍ତୁ ଆଜି ଆଉ ଏକ ପ୍ରାଣୀ ବିଷୟରେ କହିବୁ ଯାହା ଡାଇନୋସରକୁ ମଧ୍ୟ ଶିକାର କରୁଥିଲା। ବାସ୍ତବରେ ଏହା ହେଉଛି ବିଶ୍ୱର ସବୁଠୁ ବଡ଼ କୁମ୍ଭୀର। ଯାହାକି ବର୍ତ୍ତମାନ ମିଳିଥିବା ଅବଶେଷାଂଶରୁ ଜାଣି ହେଉଛି। ଏହି ବିପଜ୍ଜନକ କୁମ୍ଭୀରମାନେ ଡାଇନୋସରମାନଙ୍କୁ ମାରି ଖାଉଥିଲେ।
କୁମ୍ଭୀରର ଏହି ବିଶାଳ ପ୍ରଜାତିର ନାମ ସାର୍କୋସୁଚସ ଥିଲା। ସେମାନେ ଆଜିର କୁମ୍ଭୀର ଅପେକ୍ଷା ଅନେକାଂଶରେ ଓଜନିଆ ଏବଂ ବହୁ ବଡ଼ ଥିଲେ। ସେମାନଙ୍କର ଲମ୍ବ ପ୍ରାୟ ୯.୫ ମିଟର ଅର୍ଥାତ୍ ୩୧ ଫୁଟ ଥିଲାବେଳେ ଓଜନ ୪ ଟନ୍ ପାଖାପାଖି ଅର୍ଥାତ୍ ପ୍ରାୟ ୩୬୦୦ କିଲୋଗ୍ରାମରୁ ଅଧିକ ଥିଲା। ଏହି କୁମ୍ଭୀରମାନେ ଉତ୍ତର ଆଫ୍ରିକାର ଘଞ୍ଚ ଜଙ୍ଗଲରେ ରହୁଥିଲେ। ଯେଉଁ ସ୍ଥାନ ଧୀରେ ଧୀରେ ମରୁଭୂମିରେ ପରିଣତ ହୋଇଥିଲା। ଆଜି ଏହା ସାହାରା ମରୁଭୂମି ଭାବରେ ଜଣାଶୁଣା। ୧୯୫୦ ଦଶର୍କରେ ଆଲବର୍ଟ ଫିଲିକ୍ସ ନାମକ ଜଣେ ଫରାସୀ ଗବେଷକ ସାହାରା ମରୁଭୂମିରେ ଏହାର ମୁଣ୍ଡ ଏବଂ ଦାନ୍ତ ପରି ନମୁନା ପାଇଥିଲେ। ପରବର୍ତ୍ତୀ ସମୟରେ ବିଶ୍ୱାସ କରାଯାଇଥିଲା ଏହି କୁମ୍ଭୀରମାନେ ଡାଇନୋସରକୁ ଶିକାର କରୁଥିଲେ।