ମାଧପୁର, ୮ା୪- କରୋନା ସଂକ୍ରମଣ ରୋକିବାକୁ ଲୋକେ ଲକଡାଉନ କଟକଣାକୁ ସମ୍ପୂର୍ଣ୍ଣ ଭାବେ ମାନିବାକୁ ଅନୁଗୋଳ ଜିଲା ମାଧପୁର ବଜାରରେ ପୋଲିସ ପକ୍ଷରୁ ସଚେତନ କରାଯାଉଛି। ଆଠମଲ୍ଲିକ ଥାନା ଆଇଆଇସି ପ୍ରିୟବ୍ରତ ଦାସ ଡାକବାଜି ଯନ୍ତ୍ର ମାଧ୍ୟମରେ ପ୍ରଚାର କରି ଲୋକଙ୍କୁ ନିୟମ ଉଲ୍ଲଘଂନ ନ କରିବାକୁ ପରାମର୍ଶ ଦେଉଛନ୍ତି । କୌଣସି ବାହାନା କରି ଘରୁ ବାହାରିଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ ପକ୍ଷରୁ ଚେତାବନୀ ଦିଆଯାଇଛି। ସେହିପରି ଯଥେଷ୍ଟ ପ୍ରମାଣ ଦେଖାଇଲେ ଡାକ୍ତରଖାନା ଯିବାକୁ ଲୋକଙ୍କୁ ଛଡାଯାଉଛି। ଅନ୍ୟପକ୍ଷରେ ଜିଲାପାଳଙ୍କ ନିଷ୍ପତ୍ତି କ୍ରମେ ସକାଳ ୬ଟାରୁ ଅପରାହ୍ନ ୧ ଟା ପର୍ଯ୍ୟନ୍ତ ତେଜରାତି, କ୍ଷୀର, ପରିବା ଏବଂ ମାଛ ମାଂସ ଦୋକାନ ଖୋଲା ରହିବ ବୋଲି ପୋଲିସ ତରଫରୁ ସୂଚନା ଦିଆଯାଇଛି। ସାପ୍ତାହିକ ହାଟକୁ ମଧ୍ୟ ବନ୍ଦ କରିଦିଆଯାଇଛି। ତେବେ ଔଷଧ ଦୋକାନ ଦିନତମାମ ଖୋଲା ରହିବ ବୋଲି କୁହାଯାଇଛି।