ରିୟାଦ, ୧୩ା୧ (ପି.ଟି.)-ହିରୋ ମୋଟର ସ୍ପୋଟର୍ସ ଟିମ୍କୁ ଶକ୍ତ ଧକ୍କା ଲାଗିଛି। ସୌଦି ଆରବରେ ଚାଲିଥିବା ଡାକାର ରାଲିର ୭ମ ଷ୍ଟେଜ୍ ବେଳେ ଏହାର ପର୍ତ୍ତୁଗିଜ୍ ରାଇଡର ପଲୋ ଗନକ୍ଲେଭ୍ସଙ୍କ ଏକ ମର୍ମନ୍ତୁଦ ଦୁର୍ଘଟଣାରେ ମୃତ୍ୟୁ ଘଟିଛି। ୨୦୦୬ରେ ପଦାର୍ପଣପରଠାରୁ ୪୦ବର୍ଷୀୟ ପଲୋଙ୍କ ଏହା ଥିଲା ୧୩ତମ ଡାକାର ରାଲି । ରବିବାର ରାଜଧାନୀ ରିୟାଦଠାରୁ ଓ୍ବାଦି ଅଲ୍ ଦାଓ୍ବାସିର ପର୍ଯ୍ୟନ୍ତ ୨୭୬ କିଲୋମିଟର ସ୍ପେଶାଲ ଷ୍ଟେଜ୍ରେ ସେ ହୃଦ୍ଘାତରେ ସଂଜ୍ଞାହୀନ ହୋଇ ତଳେ ପଡ଼ିଯାଇଥିଲେ। ଖବରପାଇବାପରେ ଆୟୋଜକଗଣ ତାଙ୍କୁ ଏକ ମେଡିକାଲ ହେଲିକପ୍ଟରରେ ଲେଲା ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ। ୨୦୧୫ରେ ରନର୍ସଅପ୍ ହୋଇଥିବା ଗନ୍କ୍ଲେଭ୍ସ ଚଳିତ ସଂସ୍କରଣରେ ୪ଥର ଟପ୍ ଟେନ୍ରେ ରହିଥିଲେ। ସେ ୨୦୧୩ ଏଫଆଇଏମ୍ କ୍ରସ୍ କଣ୍ଟ୍ରି ରାଲି ଓ୍ବାଲର୍ଡ ଚାମ୍ପିୟନ ଟାଇଟଲ ଜିତିଥିଲେ। ୨୦୧୫ରେ ଆର୍ଜେଣ୍ଟିନାରେ ପୋଲଣ୍ଡ ମୋଟରସାଇକେଲ ରାଇଡର ମିଚାଲ ହେନରିକ୍ଙ୍କ ପରେ ଏହି କଷ୍ଟସାଧ୍ୟ ଇଭେଣ୍ଟରେ ମୃତ୍ୟୁ ବରଣ କରିବାରେ ଗନ୍କ୍ଲେଭ୍ସ ହେଉଛନ୍ତି ପ୍ରଥମ ପ୍ରତିଯୋଗୀ। ରବିବାର ୫୪୬ କିଲୋମିଟର ବିଶିଷ୍ଟ ଷ୍ଟେଜ୍ ଇଭେଣ୍ଟର ସବୁଠାରୁ ଦୀର୍ଘତମ। ସ୍ପେନ୍ର ଜୋହାନ ବାରେଡା ଜିତିଥିବାବେଳେ ଆମେରିକାର ରିକି ବ୍ରାବେକ୍ ଓଭର ଅଲ ଅଗ୍ରଣୀରେ ତାଙ୍କ ସ୍ଥାନ ଆହୁରି ମଜଭୁତ କରିଛନ୍ତି। ଅଷ୍ଟ୍ରେଲିଆର ତଥା ଗତଥରର ଚାମ୍ପିୟନ ଟୋବି ପ୍ରାଇସ୍ ବାରେଡାଙ୍କଠାରୁ ଏକ ଘଣ୍ଟା ଏବଂ ୨୦ ମିନିଟ ପଛରେ ଦ୍ୱିତୀୟ ସ୍ଥାନରେ ରହିଥିଲେ। କିନ୍ତୁ ବାଟରେ ଅଟକି ସେ ଗନକ୍ଲେଭ୍ସଙ୍କୁ ସହାୟତା କରିଥିବାରୁ ତାଙ୍କ ପୋଜିଶନର ପୁନଃ ମୂଲ୍ୟାୟନ କରାଯିବ। ଅନ୍ୟପକ୍ଷରେ କାର୍ କାଟେଗୋରିରେ ଦୁଇଥର ଡାକାର ବିଜେତା ସ୍ପେନର କାର୍ଲୋସ ସେଞ୍ଜ୍ ଇଭେଣ୍ଟରେ ତୃତୀୟ ଥର ଷ୍ଟେଜ୍ ବିଜେତା ହୋଇଛନ୍ତି।