ବରଗଡ଼ ଅଫିସ,୨୩।୮: ବରଗଡ଼ ଜିଲା ମୁଖ୍ୟ ଚିକିତ୍ସାଳୟରୁ ଚିକିତ୍ସାଧୀନ କଏଦୀ ଫେରାର ଘଟଣାରେ ଶନିବାର ୨ କର୍ମଚାରୀ ନିଲମ୍ବିତ ହୋଇଛନ୍ତି। ସେମାନେ ହେଲେ, ବରଗଡ଼ ସବ୍ଜେଲରେ କାର୍ଯ୍ୟରତ କିରଣ ଯୋଶୀ ଏବଂ ରମେଶ ହରି ।
ପ୍ରକାଶ ଯେ, ବରପାଲିର ନକୁଳ ମାଝି ଗତ ଜୁନ ମାସରେ ସଂଘଟିତ ଜମୁର୍ଡା ଗୁଳିକାଣ୍ଡ, ବରପାଲିରେ ମହଦା ସରପଞ୍ଚଙ୍କୁ ପିସ୍ତଲ ମୁନରେ ଧମକ ମାମଲାରେ ଗିରଫ ହୋଇ ସ୍ଥାନୀୟ ବରଗଡ଼ ସବ୍ଜେଲରେ ବିଚାରାଧୀନ ବନ୍ଦୀଭାବେ ସେ ରହିଥିଲେ। ଗୁରୁବାର ବିଚାରପତିଙ୍କ ସମ୍ମୁଖରେ ହାଜର କରିବା ପାଇଁ ତାଙ୍କୁ ସବ୍ଜେଲରୁ ବରଗଡ କୋର୍ଟକୁ ନିଆଯାଇଥିଲା। ତେବେ ପୋଲିସ ହେପାଜତରେ ଥିବାବେଳେ ନକୁଳ କୌଣସି ଧାରୁଆ ଅସ୍ତ୍ରରେ ହାତ ସମେତ ଶରୀରର ବିଭିନ୍ନ ସ୍ଥାନକୁ କାଟି ହୋଇଥିଲେ। ପରେ ଚିକିତ୍ସା ପାଇଁ ତାଙ୍କୁ ବରଗଡ଼ ଜିଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା। ପୋଲିସ ସୁରକ୍ଷା ମଧ୍ୟରେ ଚିକିତ୍ସାଧୀନ ଥିବାବେଳେ ବିଳମ୍ବିତ ରାତ୍ରିରେ ସେ ଫେରାର ହୋଇଯାଇଥିଲେ।