ଭଟଲି, ୨ା୧(ଡି.ଏନ.ଏ.) ରାଜ୍ୟ ସରକାରଙ୍କ ୫ଟି ଯୋଜନାକୁ ସାକାର କରିବା ପାଇଁ ସମସ୍ତ ଅଧିକାରୀ ତତ୍ପର। ସେପଟେ ୫ଟି ସଚିବ ବିଭିନ୍ନ ଜିଲା ମୁଖ୍ୟାଳୟର ସ୍ବାସ୍ଥ୍ୟକେନ୍ଦ୍ର ପରିଦର୍ଶନ ପରେ ଜିଲା ମୁଖ୍ୟ ଡାକ୍ତରଖାନା ସହ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରଗୁଡ଼ିକ ଚକାଚକ୍ ହୋଇଯାଇଛି। ମାତ୍ର ସେଗୁଡ଼ିକ କାମକୁ ଆସୁ ନ ଥିବା ଦୃଷ୍ଟିଗୋଚର ହେଉଛି। ଏଭଳି ଏକ ଘଟଣା ଘଟିଛି ବରଗଡ଼ ଜିଲା ଭଟଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ। ବୁଧବାର ରାତି ପ୍ରାୟ ସାଢ଼େ ୮ଟାରେ କେତେକ ସାମାଜିକ କର୍ମୀ ଜଣେ ଦୁର୍ଘଟଣାଗ୍ରସ୍ତ ବୃଦ୍ଧାଙ୍କୁ ନେଇ ଡାକ୍ତରଖାନା ପହଞ୍ଚିଥିଲେ। ହେଲେ ସେତେବେଳକୁ ଡାକ୍ତରଖାନାରେ ତାଲା ପଡ଼ିଥିବା ଦେଖାଯାଇଥିଲା। ଡାକ୍ତରଖାନା କେବଳ ତାଲା ପଡି ନ ଥିଲା, ସେଠାରେ ନା ଥିଲେ କୌଣସି ଡାକ୍ତର କିମ୍ବା ନାଇଟ୍ୱାଚର। ଡାକ୍ତରଖାନାରେ କେହି ବି ନଥିଲା ବେଳେ ବୃଦ୍ଧା ଜଣକ ଗୁରୁତୁର ଅବସ୍ଥାରେ ପଡି ରହିଥିଲେ। ତାଙ୍କ ଗୋଡ଼, ହାତ, ମୁହଁ ଏବଂ ମୁଣ୍ଡରେ ଗଭୀର ଆଘାତ ଲାଗିଥିବା ଦେଖାଯାଇଥିଲା। ସେପଟେ ଭଟଲିରେ ଆମ୍ବୁଲାନ୍ସ ବ୍ୟବସ୍ଥା ନଥିବାବେଳେ ଗୋଟିଏ ମାତ୍ର ୧୦୮ ଗାଡ଼ି ରହିଛି। ଉକ୍ତ ଗାଡିକୁ ଫୋନ୍ କଲେ ମଧ୍ୟ କୌଣସି ସୁଫଳ ମିଳି ନ ଥିଲା। ଦମକଳ ବାହିନୀକୁ ଡାକି ସାମାଜିକ କର୍ମୀମାନେ ଘଟଣାସ୍ଥଳରୁ ଉଦ୍ଧାର କରି ବୃଦ୍ଧାଙ୍କୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ମାତ୍ର ଡାକ୍ତରଙ୍କ ଅନୁପସ୍ଥିତି ସେଠାରେ ଏକ ଉତ୍ତେଜନାମତ୍କ ପରିସ୍ଥିତି ସୃଷ୍ଟି କରିଥିଲା। ପରେ ବିଡିଓ ଧିରେନ୍ଦ୍ର କୁମାର ସେଠୀଙ୍କ ଉପସ୍ଥିତିରେ ଉକ୍ତ ଦମକଳ ଗାଡ଼ିରେ ବୃଦ୍ଧାଙ୍କୁ ବରଗଡ଼ ଜିଲା ମୁଖ୍ୟଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ଏ ନେଇ ଜିଲାପାଳ ଜ୍ୟୋତିରଞ୍ଜନ ପଧାନ ଏବଂ ସିଡିଏମ୍ଓ ବିଭୂତି ଭୂଷଣ ମେହେରଙ୍କୁ ଯୋଗାଯୋଗ କରାଯିବାରୁ ଏହାର ତଦନ୍ତ ପୂର୍ବକ ସମାଧାନ କରାଯିବ ବୋଲି କହିଥିଲେ। ସୂଚନାଯୋଗ୍ୟ ଯେ ଏହି ଡାକ୍ତରଖାନାକୁ ପୂର୍ବରୁ ମଧ୍ୟ ଅନେକ ଦୁର୍ଘଟଣାଜନିତ ରୋଗୀ ହଟହଟାର ସମ୍ମୁଖୀନ ହୋଇଥିବା ନଜିର ରହିଛି।
ପ୍ରକାଶଥାଉକି ଭଟଲି-ଅମ୍ବାଭୋନା ମୁଖ୍ୟରାସ୍ତା ତରାଜୁଙ୍ଗା ନିକଟରେ କୌଣସି ଏକ ଗାଡ଼ି ଧକ୍କାରେ ବୃଦ୍ଧା ଜଣକ ଗୁରୁତର ହୋଇ ରାସ୍ତା କଡ଼ରେ ପଡ଼ିରହିଥିଲେ। କେତେକ ସାମାଜିକ କର୍ମୀ ତାଙ୍କୁ ଦେଖି ୧୦୮ ଆମ୍ବୁଲାନ୍ସକୁ ଫୋନ କରିଥିଲେ।ମାତ୍ର କୌଣସି ୧୦୮ ଖାଲି ନଥିବା ଉତ୍ତର ଆସିବାରୁ ସେମାନେ ଭଟଲି ଦମକଳ ବାହିନୀକୁ ଫୋନ କରି ବୃଦ୍ଧାଙ୍କୁ ଉଦ୍ଧାର କରିଥିଲେ।