ଭୁବନେଶ୍ୱର,୨୯ା୪(ବ୍ୟୁରୋ): କରୋନା ସଂକ୍ରମଣର ସାମାନ୍ୟ କିମ୍ବା ସେଭଳି କିଛି ଲକ୍ଷଣ ଦେଖାଯାଉଥିବା ବ୍ୟକ୍ତିମାନେ ନିଜ ଘରେ ଏକାନ୍ତବାସ ବା ସଙ୍ଗରୋଧ( ହୋମ୍ ସେଲ୍ଫ ଆଇସୋଲେଶନ)ରେ ରହି ପାରିବେ। ସେଭଳି ରୋଗୀ କୋଭିଡ୍ ହସ୍ପିଟାଲ କିମ୍ବା କୌଣସି ସ୍ବାସ୍ଥ୍ୟକେନ୍ଦ୍ରକୁ ଯିବା ଦରକାର ନାହିଁ। କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ଏ ନେଇ ଏକ ସଂଶୋଧିତ ଗାଇଡ୍ଲାଇନ୍ ବା ନିୟମାବଳୀ ଜାରି କରାଯାଇଛି। ଏଥିରେ କୁହାଯାଇଛି, ସାମାନ୍ୟ କୋଭିଡ୍ ଲକ୍ଷଣ ଦେଖାଯାଉଥିବା ନେଇ ମେଡିକାଲ ଅଫିସର ଯଦି ଘୋଷଣା କରିବେ ସେହି ରୋଗୀମାନେ ଘରେ ପରିବାରଠାରୁ ଅଲଗା ରହିପାରିବେ। ସେହି ସଂକ୍ରମିତ ବ୍ୟକ୍ତିଙ୍କର ଯତ୍ନ ନେବା ପାଇଁ ଜଣେ ସେବାକାରୀ ୨୪ ଘଣ୍ଟା ପାଖରେ ରହିବା ଦରକାର। ସେବା ଯୋଗାଉଥିବା ବ୍ୟକ୍ତି ମେଡିକାଲ ଅଫିସରଙ୍କ ପରାମର୍ଶ ନେଇ କୋଭିଡ୍ ସଂକ୍ରମିତଙ୍କୁ ହାଇଡ୍ରୋକ୍ସିକ୍ଲୋରୋକୁଇନ୍ ପ୍ରଫିଲାକ୍ସିସ୍ ଔଷଧ ଖାଇବାକୁ ଦେଇ ପାରିବେ। ଏଥିସହିତ ନିଜ ମୋବାଇଲରେ ଆରୋଗ୍ୟ ସେତୁ ଡାଉନ୍ଲୋଡ୍ କରିବା ସହିତ ୨୪ଘଣ୍ଟିଆ ଏହାକୁ କାର୍ଯ୍ୟକ୍ଷମ କରିବାକୁ (ବ୍ଲୁ ଟୁଥ୍/ ୱାଇଫାଇ ସଂଯୋଗ)ପରାମର୍ଶ ଦିଆଯାଇଛି। ସଂକ୍ରମିତ ବ୍ୟକ୍ତି ନିୟମିତ ଭାବେ ନିଜର ସ୍ବାସ୍ଥ୍ୟ ବିଷୟରେ ତଦାରଖ କରିବାକୁ ଜିଲା ସେର୍ଭଲାନ୍ସ ଅଫିସରଙ୍କୁ ଜଣାଇବା ସହିତ ପରବର୍ତ୍ତୀ ସମୟରେ ସର୍ଭେଲାନ୍ସ ଟିମ୍କୁ ସ୍ବାସ୍ଥ୍ୟ ଯାଞ୍ଚ କରିବାକୁ ଅନୁମତି ଦେବାକୁ ପଡିବ। ସେଲ୍ଫ ଆଇସୋଲେଶନରେ ରହିବା ପୂର୍ବରୁ ସଂକ୍ରମିତଙ୍କୁ ଲିଖିତ ଆକାରରେ ଦେବାକୁ ହେବ। ଏଥିସହିତ ହୋମ୍ କ୍ୱାରାଣ୍ଟାଇନ୍ର ଗାଇଡ୍ଲାଇନ୍ ଅନୁସରଣ କରିବାକୁ ପଡିବ। କରୋନା ସଂକ୍ରମିତଙ୍କ ଯତ୍ନ ନେଉଥିବା ବ୍ୟକ୍ତି ନିୟମିତ ଭାବେ ସେମାନଙ୍କର ସ୍ବାସ୍ଥ୍ୟ ଉପରେ ଦୃଷ୍ଟି ରଖିବେ। ଯଦି ସମ୍ପୃକ୍ତ ରୋଗୀଙ୍କର ନିଃଶ୍ୱାସ ପ୍ରଶ୍ୱାସ ନେବାରେ କଷ୍ଟ ହେଉଥିବ, ଛାତିରେ ଯନ୍ତ୍ରଣା, ମାନସିକସ୍ତରରେ ଦୁର୍ବଳ କିମ୍ବା କଥା କହିବାକୁ ଅକ୍ଷମ ହେଉଥିବେ, ଓଠ କିମ୍ବା ମୁହଁରେ ନୀଳ ରଙ୍ଗର କେତେକ ପରିବର୍ତ୍ତନ ହେଉଥିବ କିମ୍ବା ମେଡିକାଲ ଅଫିସରଙ୍କ ପରାମର୍ଶକ୍ରମେ ସେହି ବ୍ୟକ୍ତିଙ୍କୁ ତୁରନ୍ତ ହସ୍ପିଟାଲ ସହ ଯୋଗାଯୋଗ କରିବାକୁ କୁହାଯାଇଛି। ଘରେ ସଙ୍ଗରୋଧରେ ଥିବା ବ୍ୟକ୍ତିଙ୍କର ଯଦି କୌଣସି କରୋନା ଲକ୍ଷଣ ଦେଖାଯାଉଥିବା ମନେ ହେବ ନାହିଁ, କିମ୍ବା ମେଡିକାଲ ଅଫିସର ସମ୍ପୃକ୍ତ ବ୍ୟକ୍ତିିଙ୍କର କୌଣସି ଲକ୍ଷଣ ନ ଥିବା ନେଇ ଲିଖିତ ଆକାରରେ ଦେବେ ସମ୍ପୃକ୍ତ ବ୍ୟକ୍ତି ଗୃହ ସଙ୍ଗରୋଧ ବା ହୋମ୍ ଆଇସୋଲେଶନରୁ ମୁକ୍ତି ପାଇପାରିବେ ବୋଲି ନୂତନ ଗାଇଡ୍ଲାଇନ୍ରେ କୁହାଯାଇଛି। ସୂଚନାଯୋଗ୍ୟ, ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ୨୦୨୦ ଏପ୍ରିଲ ୭ରେ ଜାରି କରାଯାଇଥିବା ଗାଇଡ୍ଲାଇନ୍ ଅନୁଯାୟୀ, ସାମାନ୍ୟ କରୋନା ଲକ୍ଷଣ ଦେଖାଦେଲେ ମଧ୍ୟ ରୋଗୀଙ୍କୁ କୋଭିଡ୍ ହସ୍ପିଟାଲକୁ ନେବାକୁ ପରାମର୍ଶ ଦିଆଯାଇଥିଲା। ଗୋଷ୍ଠୀ ସଂକ୍ରମଣକୁ ରୋକିବା ପାଇଁ ଏଭଳି ପଦକ୍ଷେପ ନିଆଯାଉଥିଲା।