ପୁରୀ ଅଫିସ,୨୦।୩: ବିଶ୍ୱବାସୀଙ୍କ ନିଦ ଉଡ଼ାଇଥିବା କରୋନା ଏବେ ଭାରତରେ ନିଜ କାୟା ବିସ୍ତାର କରିବାରେ ଲାଗିଲାଣି। ଭାରତରେ ଏଥିରେ ଆକ୍ରାନ୍ତଙ୍କ ସଂଖ୍ୟା ୨୦୯ରେ ପହଞ୍ଚିଛି। ରାଜ୍ୟରେ ମଧ୍ୟ ୨ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସଂକ୍ରମଣ ବଢ଼ିବା ଆଶଙ୍କା କରାଯାଉଥିବାରୁ ରାଜ୍ୟ ସରକାରଙ୍କ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। ଏସବୁ ଭିତରେ ସାଧାରଣଜନତାଙ୍କୁ ଯେତେସମ୍ଭବ ହୋମ୍ ଆଇସୋଲେଶନରେ ରହିବାକୁ ପରାମର୍ଶ ଦିଆଯାଉଛି। ହେଲେ କରୋନା ମୁକାବିଲା ଦିଗରେ ପ୍ରମୁଖ ଭୂମିକା ଡାକ୍ତରମାନେ ଗ୍ରହଣ କରୁଛନ୍ତି। ସେମାନଙ୍କୁ ସମ୍ମାନ ଜଣାଇ ଅନ୍ତର୍ଜାତୀୟ ବାଲୁକାଶିଳ୍ପୀ ସୁଦର୍ଶନ ପଟ୍ଟନାୟକ ବାଲୁକାକଳାରେ ସମସ୍ତଙ୍କ ଲାଗି ବାର୍ତ୍ତା ଦେଇଛନ୍ତି। ସେ କହିଛନ୍ତି,‘ଆଇ ଷ୍ଟେଡ୍ ଆଟ୍ ଓ୍ବାର୍କ ଫର୍ ୟୁ, ୟୁ ଷ୍ଟେ ଆଟ୍ ହୋମ୍ ଫର୍ ଅସ୍’। ଏହା ବିଶେଷକରି ଡାକ୍ତରମାନଙ୍କ ଉଦ୍ଦେଶ୍ୟରେ ସେ କରିଛନ୍ତି।
କରୋନା ମୁକାବିଲା ଦିଗରେ ପ୍ରତ୍ୟକ୍ଷ ଭାବେ ଜଡ଼ିତ ରହୁଛନ୍ତି ଡ଼ାକ୍ତରମାନେ। ନିଜର ସୁରକ୍ଷା କଥା ନ ଭାବି ସେମାନେ ରୋଗୀଙ୍କୁ ସୁସ୍ଥ କରିବା ଦିଗରେ କାମ କରୁଛନ୍ତି। ଏହାକୁ ଦୃଷ୍ଟିରେ ରଖି ଲୋକମାନେ ସେମାନଙ୍କ କାମକୁ ନ ବଢ଼ାନ୍ତୁ ବୋଲି କୁହାଯାଉଛି। ଏଣୁ ଲୋକମାନଙ୍କୁ ଘରେ ରହିବାକୁ ସୁଦର୍ଶନ ବାର୍ତ୍ତା ଦେଇଛନ୍ତି।