ନୂଆଦିଲ୍ଲୀ,୧୬।୪: କରୋନା ବିରୋଧରେ ଲଢ଼େଇ ଜାରି ରଖିଥିବା ଯୋଦ୍ଧାଙ୍କ ପାଇଁ ଦିଲ୍ଲୀ ସରକାରଙ୍କ ପକ୍ଷରୁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ସେମାନଙ୍କ ସୁରକ୍ଷା ପାଇଁ ରାଜ୍ୟ ସରକାର ବଡ଼ ପଦକ୍ଷେପ ଗ୍ରହଣ କରିଛନ୍ତି। ପୂର୍ବରୁ କରୋନା ରୋଗୀଙ୍କ ଚିକିତ୍ସା କରୁଥିବା ଡାକ୍ତରଙ୍କୁ ହୋଟେଲରେ ରହିବା ପାଇଁ ସରକାର ସୁବିଧା ପ୍ରଦାନ କରାଇଥିବା ବେଳେ ଏବେ ପୋଲିସକର୍ମୀ ମଧ୍ୟ ହୋଟେଲରେ ରହିବେ ବୋଲି ଜଣାପଡ଼ିଛି। ରାଜ୍ୟରେ ଲକ୍ଡାଉନ୍କୁ ଆହୁରି କଡ଼ାକଡ଼ି କରିବା ପାଇଁ ମୁତୟନ ହୋଇଥିବା ପୋଲିସକର୍ମୀ ମଧ୍ୟ ହୋଟେଲରେ ରହିବେ ବୋଲି ସୂଚନା ମିଳିଛି। ଆଉ ଏହି ହୋଟେଲ ବାବଦକୁ ଖର୍ଚ୍ଚ ହେଉଥିବା ସମସ୍ତ ଟଙ୍କା ସରକାର ନିଜେ ବହନ କରିବେ ବୋଲି ଘୋଷଣା କରିଛନ୍ତି। ସୂଚନାଯୋଗ୍ୟ, ଏଲ୍ଏନ୍ଜିପି ଓ ଜିବିପି ହସ୍ପଟାଲରେ କରୋନା ସଂକ୍ରମିତ ରୋଗୀଙ୍କୁ ଚିକିତ୍ସା କରୁଥିବା ଡାକ୍ତରମାନେ ଦିଲ୍ଲୀ ସରକାରଙ୍କ ଖର୍ଚ୍ଚରେ ଲଲିତ ହୋଟେଲରେ ରହୁଛନ୍ତି।