କଟକ ଅଫିସ,୧୧।୪: ମହାମାରୀ କରୋନା କାୟାରେ ଆଜି ସାରା ବିଶ୍ୱ କବଳିତ। ଏନେଇ ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଫଳରେ ସବୁ ଲୋକ ଘରେ ରହି କରୋନା ସହ ମୁକାବିଲା କରୁଥିବା ବେଳେ ଡାକ ବିଭାଗର କର୍ମଚାରୀମାନେ ଯୋଧ୍ୟା ଭାବରେ ଅବିରତ ଅତ୍ୟାବଶ୍ୟକୀୟ ସେବା ପ୍ରଦାନ କରୁଛନ୍ତି। ଏବେ ରେଳ ଓ ବିମାନ ସେବା ବନ୍ଦ ଥିବାରୁ ଡାକବିଭାଗ ତା’ର ସଡ଼କ ପରିବହନ ଯୋଗେ ନିଜର ସେବା ବଜାୟ ରଖିଛି। ସଡ଼କ ପରିବହନ ବ୍ୟବସ୍ଥା ଦ୍ବାରା ପ୍ରତ୍ୟେକ କାର୍ଯ୍ୟ ସହ ଯୋଗାଯୋଗ ରକ୍ଷାକରି ଅତ୍ୟାବଶ୍ୟକୀୟ ଡାକ୍ତରୀ ଉପକରଣ ବିଭିନ୍ନ ଡାକ୍ତରଖାନାରେ ପହଞ୍ଚାଇ ପାରୁଛି। ଏହି କ୍ରମରେ ଚେନ୍ନାଇରୁ ୧୫ଟି ଡାଏଲିସିସ୍ କିଟ୍ ମାଲବାହୀ ବିମାନ ଜରିଆରେ ଆସି କୋଲକାତାରେ ପହଞ୍ଚି ସଡ଼କ ପରିବହନ ବ୍ୟବସ୍ଥା ଦ୍ବାରା ଶନିବାର ସକାଳେ ଭୁବନେଶ୍ୱରରେ ପହଞ୍ଚିଥିଲା। ଏନ୍ଏସ୍ଏଚ୍, ଭୁବନେଶ୍ୱର, ଆର୍ଏମ୍ଏସ୍ ଓ କଟକ ନଗର ମଣ୍ଡଳର ପରସ୍ପର ସହଯୋଗିତାରେ ସ୍ବତନ୍ତ୍ର ବିଭାଗୀୟ ଡାକ ଗାଡ଼ିରେ କଟକକୁ ୧୧ଟି ଡାଏଲିସିସ କିଟ୍ ପଠାଯାଇଥିଲା। କଟକର ବ୍ଲୁ ଲାଇନ ହସ୍ପିଟାଲ, ପ୍ରାଇମ ହସ୍ପିଟାଲ ଓ ସନ୍ ହସ୍ପିଟାଲ ପାଇଁ ଆସିଥିବା ଡାଏଲିସିସ କିଟ୍ଗୁଡ଼ିକୁ ସ୍ବତନ୍ତ୍ର ସେବା ଜରିଆରେ ଠିକ୍ ସମୟରେ ଗ୍ରହୀତାଙ୍କୁ ପ୍ରଦାନ କରାଯାଇଥିଲା। କଟକ ନଗର ମଣ୍ଡଳର ବରିଷ୍ଠ ଡାକ ଅଧୀକ୍ଷକ ଶୁଚିସ୍ମିତା ସ୍ବାଇଁଙ୍କ ନିର୍ଦ୍ଦେଶ ଅନୁସାରେ ଆର୍ଏମ୍ଏସ୍ଏନ୍ ଡିଭିଜନର ସହକାରୀ ଡାକ ଅଧୀକ୍ଷକ ମୀନକେତନ ପ୍ରଧାନଙ୍କ ନେତୃତ୍ୱରେ ସୋମ୍ୟା ସାହୁ, ଚନ୍ଦନ ନାରାୟଣ ଦାସ ଏବଂ ଅନ୍ୟମାନେ ଏହି ଅତ୍ୟାବଶ୍ୟକୀୟ ସେବା ଯୋଗାଇ ଦେଇଥିଲେ। ଡାକ ବିଭାଗର କର୍ମଚାରୀମାନେ ସୁରକ୍ଷା ସହ ମୁହଁରେ ମାସ୍କ ଓ ହାତରେ ଗ୍ଲୋଭ୍ସ ଲଗାଇ ଏହି କାର୍ଯ୍ୟ ସୂଚାରୁ ରୂପେ ସମ୍ପାଦନ କରିଥିଲେ।