ନୂଆଦିଲ୍ଲୀ,୨୦-୭: ଦୈନନ୍ଦିନ ବ୍ୟବହାରରେ ଲାଗୁଥିବା ସାମଗ୍ରୀ ଉତ୍ପାଦକ ଡାବର ଇଣ୍ଡିଆର ଅଧ୍ୟକ୍ଷ ଭାବେ ଅମିତ ବର୍ମନଙ୍କୁ ନିଯୁକ୍ତ କରାଯାଇଛି। ଉତ୍ତରାଧିକାରୀ ପରମ୍ପରା ଅନୁଯାୟୀ ତାଙ୍କୁ ଏହି ପଦ ମିଳିଛି। କମ୍ପାନୀ ପକ୍ଷରୁ ଶୁକ୍ରବାର ଏ ସମ୍ପର୍କରେ ସୂଚନା ଦିଆଯାଇଛି। ଡାବର ଇଣ୍ଡିଆ ପକ୍ଷରୁ ଏକ ବିବୃତି ଜାରି କରି କୁହାଯାଇଛି ଯେ, ଆନନ୍ଦ ସି.ବର୍ମନଙ୍କ ସ୍ଥାନରେ ଅମିତ ବର୍ମନ କମ୍ପାନୀର ଅଧ୍ୟକ୍ଷ ହେବେ। ଆନନ୍ଦ ପୂର୍ବରୁ କମ୍ପାନୀର ସିଏମ୍ଡି ପଦ ଛାଡି ଦେଇଛନ୍ତି। ଅମିତ ପରଲୋକଗତ ଜ୍ଞାନ ସି.ବର୍ମନଙ୍କ ପୁତ୍ର। ଶୁକ୍ରବାର ଡାବର ବୋର୍ଡ ଅଫ୍ ଡାଇରେକ୍ଟର୍ସରେ ଅମିତଙ୍କ ନିଯୁକ୍ତିକୁ ସବୁଜ ସଙ୍କେତ ଦିଆଯାଇଛି। ଏହାବ୍ୟତୀତ ମୋହିତ ବର୍ମନଙ୍କୁ ଭାଇସ ଚେୟାରମ୍ୟାନ ଏବଂ ଆଦିତ୍ୟ ବର୍ମନଙ୍କୁ ଅଣ କାର୍ଯ୍ୟନିର୍ବାହୀ ଅତିରିକ୍ତ ନିର୍ଦ୍ଦେଶକ ଭାବେ ବୋର୍ଡରେ ସାମିଲ କରାଯାଇଛି। କମ୍ପାନୀର ପୂର୍ବତନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୁନୀଲ ଦୁଗଲ ବୋର୍ଡରୁ ଇସ୍ତଫା ଦେଇଛନ୍ତି ବୋଲି ବିବୃତିରେ କୁହାଯାଇଛି।