ଭୁବନେଶ୍ୱର,୧୫।୯(ବ୍ୟୁରୋ): ନୂଆ ମୋଟର ଯାନ ଆଇନ ଲାଗୁ ହେବା ପରେ ଲୋକଙ୍କ ଭିତରେ ଏକପ୍ରକାର ଛନକା ପଶିଥିଲା। ଡ୍ରାଇଭିଂ ଲାଇସେନ୍ସ ଓ ଗାଡ଼ିର ଆବଶ୍ୟକ କାଗଜପତ୍ର କରିବା ପାଇଁ ଆର୍ଟିଓ କାର୍ଯ୍ୟାଳୟରେ ଭିଡ଼ ଲଗାଇଥିଲେ। ମାତ୍ର ଆର୍ଟିଓରେ ଡ୍ରାଇଭିଂ ଲାଇସେନ୍ସ (ଡିଏଲ୍) ଆବେଦନ ପାଇଁ ସୀମିତ ସ୍ଲଟ୍ ଥିବାରୁ ମାତ୍ର ଅଳ୍ପଦିନରେ ମାସକ ପର୍ଯ୍ୟନ୍ତ ବୁକିଂ ସରିଯାଇଥିଲା। ବହୁ ଲୋକ ଆଉ ଆବେଦନ କରିପାରି ନ ଥିଲେ। ଏବେ ପରିବହନ ସଚିବଙ୍କ ନିର୍ଦ୍ଦେଶକ୍ରମେ ଶନିବାର ଏହି ସ୍ଲଟ୍ ସଂଖ୍ୟା ବଢାଇ ଦିଆଯାଇଛି। ଦୈନିକ ୧୫୦ ସ୍ଲଟ୍ ରହିଥିବାବେଳେ ତାହାକୁ ୪୫୦କୁ ବଢାଇ ଦିଆଯାଇଛି। ଫଳରେ ଲୋକେ ସହଜରେ ଅନ୍ଲାଇନ୍ ମାଧ୍ୟମରେ ସ୍ଲଟ୍ ପାଇଁ ଆବେଦନ ଆରମ୍ଭ କରିଛନ୍ତି।
ଆବେଦନକାରୀଙ୍କୁ ସ୍ଲଟ୍ ଦିଆଯିବା ପରେ ତାହା ବ୍ଲକ୍ ହୋଇଯାଇଥାଏ। ସ୍ଲଟ୍ ବୁକ୍ କରିଥିବା ଲୋକଙ୍କୁ ଡ୍ରାଇଭିଂ ଟେଷ୍ଟ ପୂର୍ବରୁ ପ୍ରଥମେ ଲର୍ନିଂ ପାଇଁ ଡକାଯାଇଥାଏ। ନିୟମକୁ ୩ ମାସ କୋହଳ କରାଯିବା ପରେ ଏବେ ସ୍ଲଟ୍ ବୁକ୍ କରିଥିବା ଆବେଦନକାରୀ ଲର୍ନିଂ ଟେଷ୍ଟ ଦେବାକୁ ଆସୁନାହାନ୍ତି। ଲର୍ନିଂ ପାଇଁ ନାମ ଡକାଯାଉଥିଲେ ମଧ୍ୟ ଅଧିକାଂଶ ଅନୁପସ୍ଥିତ ରହୁଛନ୍ତି। ଫଳରେ ପରବର୍ତ୍ତୀ ଆବେଦନକାରୀଙ୍କୁ ସୁଯୋଗ ଦିଆଯାଉଛି। ସେହି ସମୟରେ ଥରେ ଯିଏ ସ୍ଲଟ୍ ହରାଇଲା ତାଙ୍କୁ ପୁଣିଥରେ ପ୍ରଥମକୁ ଫେରିବାକୁ ପଡୁଛି। ଦୁଇତିନି ଦିନ ହେବ ଆର୍ଟିଓ ଅଫିସରେ ଏଭଳି ପରିସ୍ଥିତି ଦେଖିବାକୁ ମିଳୁଛି। ତେଣୁ ଅଯଥାରେ ସ୍ଲଟ୍ ବୁକ୍ ନ କରିବାକୁ ଆରଟିଓ ପକ୍ଷରୁ ନିବେଦନ କରାଯାଇଛି।
ଅନ୍ୟପକ୍ଷରେ ଆର୍ଟିଓ ଅଫିସରେ ପ୍ରତିଦିନ ଭିଡ଼ ରହୁଥିବାରୁ ଏକାଧିକ କାଉଣ୍ଟରରେ ଧାଡ଼ି ବ୍ୟବସ୍ଥା କରାଯାଇ ନ ଥିଲା। ମହିଳା, ବରିଷ୍ଠ ନାଗରିକ ଓ ଦିବ୍ୟାଙ୍ଗମାନେ ପଛରେ ରହି ନାନା ହଟହଟା ହେଉଥିଲେ। ଏନେଇ ଖବର ପ୍ରକାଶ ପାଇବା ପରେ ଆରଟିଓଙ୍କ ପକ୍ଷରୁ ସେମାନଙ୍କ ପାଇଁ ବ୍ୟବସ୍ଥା କରାଯାଇଛି। ମହିଳା,ଦିବ୍ୟାଙ୍ଗ ଓ ବରିଷ୍ଠ ନାଗରିକମାନେ ଧାଡିରେ ଆସି ସହଜରେ ଲଇସେନ୍ସ ଆବେଦନ ଓ ନେଇପାରୁଛନ୍ତି।