ଭୁବନେଶ୍ୱର,୬ା୨(ବ୍ୟୁରୋ): ଗଞ୍ଜାମ ଜିଲା ତାରାତାରିଣୀ ପୀଠର ଉନ୍ନତୀକରଣ କରାଯିବ। ଏହି ପ୍ରସ୍ତାବକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୁଧବାର ଅନୁମୋଦନ କରିଛନ୍ତି। ସେହିପରି ନିର୍ଦ୍ଧାରିତ ସମୟରେ ଏହାର ସୌନ୍ଦର୍ଯ୍ୟକରଣ ଓ ଭିତ୍ତିଭୂମି କାର୍ଯ୍ୟ ସାରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ମୁଖ୍ୟ ମନ୍ଦିରର ପ୍ରବେଶ ଦ୍ୱାର ତଥା ସିଂହଦ୍ୱାରର ଉନ୍ନତୀକରଣ କରାଯିବ। ମନ୍ଦିରକୁ ସୁଗମ ଚଲାପଥ ସହ ପିଇବା ପାଣି ବ୍ୟବସ୍ଥା କରାଯିବ। ଏହା ମଧ୍ୟରେ ପ୍ରସାଦ ସେବନ ମଣ୍ଡପ, ଇଣ୍ଟରପ୍ରିଟେସନ୍ ସେଣ୍ଟର, ମୁଣ୍ଡନ ହଲ୍ ଏବଂ ଶୌଚାଳୟ ମଧ୍ୟ ନିର୍ମାଣ କରାଯିବ। ଉପାସନା ଏବଂ ବିଶ୍ରାମ ଗୃହ, ଫୁଡ୍ କିସ୍କୋ, ପିଇବା ପାଣି, ଜୋତା ଷ୍ଟାଣ୍ଟ, ପାଦ ଧୋଇବାକୁ ସ୍ବତନ୍ତ୍ର ସ୍ଥାନ, ଅପେକ୍ଷାସ୍ଥଳ, ଅବରୋଧ ବିହୀନ ଯୋଗାଯୋଗ ବ୍ୟବସ୍ଥା କରାଯିବାକୁ ନିଷ୍ପତ୍ତି ହୋଇଛି। ୱାଚ୍ ଟାୱାର, ପୋଲିସ୍ ଆଉଟପୋଷ୍ଟ ଏବଂ ପ୍ରାଥମିକ ଚିକିତ୍ସା କେନ୍ଦ୍ର ମଧ୍ୟ ରହିବ। ମୁଖ୍ୟ ମନ୍ଦିର ପଛ ପାଖରେ ଉପାସନା ଗୃହ ରହିବ। ଏହା ଏକ ଅନ୍ୟତମ ଶକ୍ତିପୀଠ, ତେଣୁ ଓଡ଼ିଶାର ପୁରାତନ କାରୁକାର୍ଯ୍ୟ କରାଯାଇ ଏହାର ସର୍ବାଙ୍ଗୀନ ସୌନ୍ଦର୍ଯ୍ୟକରଣ ପାଇଁ ନିଷ୍ପତ୍ତି ହୋଇଛି। ଲୋକସେବା ଭବନରେ ଏହି ଘୋଷଣା କରାଯିବାରୁ ପ୍ରକଳ୍ପ ସମ୍ପର୍କିତ ଉପସ୍ଥାପନା ହୋଇଥିଲା। ଏହାକୁ ସ୍ଥାପତ୍ୟ ସଂସ୍ଥା ନେଷ୍ଟର ଦ୍ୱାରା ପ୍ରସ୍ତୁତ କରାଯାଇଛି। ଡିଜାଇନ୍ ଅନୁଯାୟୀ କାର୍ଯ୍ୟ ସମ୍ପାଦିତ ହେଲେ ପୀଠଟି ପ୍ରମୁଖ ଦର୍ଶନୀୟ ସ୍ଥାନ ହେବ। ବୈଠକରେ ମୁଖ୍ୟମନ୍ତ୍ରୀଙ୍କ ସହ ସିଏମ୍ଓର ମୁଖ୍ୟ ପରାମର୍ଶଦାତା ଆର.ବାଲକ୍ରିଷ୍ଣନ, ଗ୍ରାମ୍ୟ ଉନ୍ନୟନ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ ଜେନା, ଜଳସମ୍ପଦ ପ୍ରମୁଖ ସଚିବ ସୁରେନ୍ଦ୍ର କୁମାର , ୫-ଟି ସଚିବ ଭି.କେ. ପାଣ୍ଡିଆନ୍ , ପୂର୍ତ୍ତ ସଚିବ କ୍ରିଷ୍ଣନ କୁମାର, ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ପ୍ରମୁଖ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ, କିଛିଦିନ ତଳେ ୫-ଟି ସଚିବ ଏହି ପୀଠକୁ ଗସ୍ତ କରିବା ସହ ଏହାର ଉନ୍ନୟନ ନେଇ ସ୍ଥାନୀୟ ଜନସାଧାରଣ, ମନ୍ଦିର କର୍ତ୍ତୃପକ୍ଷ ଏବଂ ବୁଦ୍ଧିଜୀବୀଙ୍କ ସହ ଆଲୋଚନା କରିଥିଲେ।