ଭୁବନେଶ୍ୱର,୪।୨(ବ୍ୟୁରୋ): ଅନ୍ୟକୁ ନ୍ୟାୟ ଦେବା ପାଇଁ ପୋଲିସ ପୋଷାକ ପିନ୍ଧିଥିବା ଜଣେ ଅଧିକାରୀ ନିଜେ ଅନ୍ୟାୟର ରାସ୍ତା ଧରିଛନ୍ତି। ବାଲିଅନ୍ତା ଥାନା ପାହାଳ ଫାଣ୍ଡି ଅନ୍ତର୍ଗତ ନଖରା ଗ୍ରାମରେ ଅନ୍ୟର ୨୦୦ ବର୍ଗଫୁଟ ଜମି ଜବରଦସ୍ତ ଦଖଲ କରି ଘର ନିର୍ମାଣ କରୁଛନ୍ତି। ଏଭଳି ଅନ୍ୟାୟର ଶିକାର ଜମିମାଲିକ ଅନ୍ତର୍ଯ୍ୟାମୀ ସାହୁ ଏବଂ ଯଶୋବନ୍ତ ସାହୁ ଥାନା ସମେତ ଡିସିପି, ସିପି ଓ ଡିଜିପିଙ୍କ ଦ୍ୱାରସ୍ଥ ହୋଇଥିଲେ। ଡିଜିପି ନିର୍ମାଣ କାମ ବନ୍ଦ କରିବାକୁ ବାଲିଆନ୍ତା ଥାନାକୁ ନିର୍ଦ୍ଦେଶ ଦେଇଥିଲେ। ସେହିପରି ଡିସିପିଙ୍କ କୋର୍ଟ ଉକ୍ତ ଜାଗା ଉପରେ ୧୪୪ ଧାରା ଜାରି କରି କାମ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ। କିନ୍ତୁ ପୋଲିସ ବାବୁଜଣକ ତାହାକୁ ଖାତିର ନ କରି ନିର୍ମାଣ କାମ ଚଳାଇଛନ୍ତି। ଏନେଇ ଅନ୍ତର୍ଯ୍ୟାମୀ ପୁଣି ସୋମବାର ଡିସିପିଙ୍କ ଦ୍ୱାରସ୍ଥ ହୋଇଛନ୍ତି। କାମ ବନ୍ଦ କରିବାକୁ ଡିସିପି ନିର୍ଦ୍ଦେଶ ଦେବେ ବୋଲି ପ୍ରତିଶ୍ରୁତି ଦେଇଥିବା ଅନ୍ତର୍ଯ୍ୟାମୀ କହିଛନ୍ତି। ବାଲିଅନ୍ତା ଥାନା ଅଧିକାରୀ ପ୍ରଦୀପ୍ତ କୁମାର ରାଉତ କହିଛନ୍ତି ଯେ, ଆମେ କାମ ବନ୍ଦ କରାଇଥିଲୁ। ତଥାପି ସେ ଏହାକୁ ମାନୁନାହାନ୍ତି। ଆମର ଯେତିକି କ୍ଷମତା ତାହା ଲଗାଇ ସାରିଛୁ ବୋଲି ରାଉତ କହିଛନ୍ତି।
