ଡିଜିପିଙ୍କ ବଦଳିକୁ ବିରୋଧୀଙ୍କ କଟାକ୍ଷ: ସତ୍ସାହସ ଥିଲେ ମାରିକଙ୍କ ବିରୋଧରେ ଥିବା ଲୋକପାଳ ରିପୋର୍ଟ ଦେଖାଅ
05 ଭୁବନେଶ୍ୱର,୨୨ା୧୧(ବ୍ୟୁରୋ): ରାଜ୍ୟ ସରକାର ବୁଧବାର ସାରେ ହଠାତ୍ ଡିଜିପି ବି.କେ. ଶର୍ମାଙ୍କୁ ଦାୟିତ୍ୱରୁ ହଟାଇବା ଘଟଣାକୁ ବିରୋଧୀ କଡା ସମାଲୋଚନା କରିଛନ୍ତି। ଜଣେ ବରିଷ୍ଠ ଆଇପିଏସ୍ ଅଫିସରଙ୍କୁ ଏମିତି ରାତିଅଧିଆ କାଢି ତାଙ୍କ ସ୍ଥାନରେ ଅନ୍ୟ ଜଣଙ୍କୁ ଦାୟିତ୍ୱ ଦେବା, ପୂର୍ବତନ ଡିଜିପିଙ୍କ ବିରୋଧରେ ତଦନ୍ତ ନିର୍ଦ୍ଦେଶ ଦେବା ଘଟଣାକୁ ଉଭୟ କଂଗ୍ରେସ ଏବଂ ଭାଜପା ସମାଲୋଚନା କରିଛନ୍ତି।
କଂଗ୍ରେସ ରାଜ୍ୟ କାର୍ଯ୍ୟାଳୟଠାରେ ଗୁରୁବାର ଆୟୋଜିତ ଏକ ଖବରଦାତା ସମ୍ମିଳନୀରେ ଦଳର ମିଡିଆ ସେଲ୍ ଅଧ୍ୟକ୍ଷ ସତ୍ୟପ୍ରକାଶ ନାୟକ କହିଛନ୍ତି, ବିଭିନ୍ନ ସମୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସରକାର ଡି.ଜି. ପୋଲିସଙ୍କ ବିରୋଧରେ ଯେଉଁ ତଦନ୍ତ ଚଳାନ୍ତି ତାହା କେବଳ ଲୋକଦେଖାଣିଆ । ସରକାର ଗୋଟିଏ ପଟେ ବରିଷ୍ଠ ଅଭିଯୁକ୍ତ ଅଧିକାରୀଙ୍କୁ ବଞ୍ଚାଇବାକୁ ତଦନ୍ତ ରିପୋର୍ଟକୁ ହଜେଇବେ, ଅନ୍ୟପଟେ ବାହାବା ନେବାପାଇଁ ତଦନ୍ତ କମିଟି ଗଠନର ନିର୍ଦ୍ଦେଶ ଦେବେ। ବି.କେ. ଶର୍ମାଙ୍କ ବିରୋଧରେ ବହୁ ଅଭିଯୋଗ ଅଛି ଦର୍ଶାଇ ତା’ର ଏକ ଉଚ୍ଚସ୍ତରୀୟ ପ୍ରଶାସନିକ ତଦନ୍ତ ନିର୍ଦ୍ଦେଶ ଦିଆଯାଇଛି। ସ୍ମିତାରାଣୀ ବିଶ୍ୱାଳଙ୍କ ସନ୍ଦେହଜନକ ମୃତ୍ୟୁ ପ୍ରସଙ୍ଗରୁ ନଜର ହଟାଇବା ପାଇଁ ଏହା ଏକ ଚାଲ୍। ଯଦି ଏହା ମିଛ ତେବେ ପୂର୍ବତନ ଡି.ଜି. ପୋଲିସ ସଞ୍ଜିବ ମାରିକ୍ଙ୍କ ବିରୋଧରେ ହୋଇଥିବା ଲୋକପାଳ ରିପୋର୍ଟକୁ ସରକାର ଖୁଲାସା କରନ୍ତୁ। ସାଧାରଣ ପ୍ରଶାସନ ବିଭାଗରେ କିଏ ମାରିକଙ୍କ ଲୋକପାଳ ରିପୋର୍ଟକୁ ଗାଏବ କରିଛି ସରକାର ତା’ର ଉତ୍ତର ରଖନ୍ତୁ। ୧୧ବର୍ଷ ହେଲା ମାରିକ୍ଙ୍କ ବିରୋଧରେ ହୋଇଥିବା ଲୋକପାଳ ତଦନ୍ତ କମିଶନ ରିପୋର୍ଟ ସରକାରଙ୍କ ପାଖରେ ନାହିଁ, ଏହା ରାଜ୍ୟପାଳଙ୍କ ପାଖରେ ଅଛି ବୋଲି କୁହାଯାଉଛି। ମାତ୍ର ଗତ ସେପ୍ଟେମ୍ବର ୧୮ ତାରିଖ ଦିନ ରାଜ୍ୟପାଳଙ୍କ କାର୍ଯ୍ୟାଳୟ ପକ୍ଷରୁ ସରକାରଙ୍କୁ ଦିଆଯାଇଥିବା ଚିଠି ନଂ. ୧୧୫୮୨ରେ ସ୍ପଷ୍ଟ ଉଲ୍ଲେଖ ଅଛି ୨୦୦୮ ଏପ୍ରିଲ ୫ରେ ଲୋକପାଳ ରିପୋର୍ଟ ସରକାରଙ୍କୁ ଦିଆଯାଇଛି। ଯଦି ସତ୍ସାହସ ଅଛି ତେବେ ଉକ୍ତ ରିପୋର୍ଟର ଖୁଲାସା କରାଯାଉ ବୋଲି ସତ୍ୟପ୍ରକାଶ ଅଭିଯୋଗ କରିଛନ୍ତି।
ଅନ୍ୟପଟେ କଂଗ୍ରେସର ବରିଷ୍ଠ ନେତା ତାରା ପ୍ରସାଦ ବାହିନୀପତି କହିଛନ୍ତି, ଯେତେବେଳେ ସରକାର ତାଙ୍କୁ ନିଯୁକ୍ତି ଦେଲେ ତାଙ୍କ କାର୍ଯ୍ୟକଳାପ କ’ଣ ଜାଣି ନ ଥିଲେ। ଯଦି ଜାଣି ନ ଥିଲେ ତେବେ ସେଥିପାଇଁ ସରକାର ଦାୟୀ। ରାତିଅଧିଆ ବାହାର କରି ଫୋପାଡି ଦେବା କେତେ ଯୁକ୍ତିଯୁକ୍ତ। ଡିଜିପିମାନଙ୍କୁ ସରକାର କଣ୍ଢେଇ ପରି ବ୍ୟବହାର କରୁଛନ୍ତି। ଯେତେବେଳେ ଯାହାକୁ ଚାହୁଁଛନ୍ତି କିକ୍ ମାରି କାଢୁଛନ୍ତି। ଏହା ନୂଆ କଥାନୁହେଁ ବୋଲି ତାରା କହିଛନ୍ତି। ଭାଜପାର ବରିଷ୍ଠ ନେତା ଜୟନାରାୟଣ ମିଶ୍ର କହିଛନ୍ତି, ସରକାର କୌଣସି ଅଫିସରଙ୍କ ଉପରେ ଭରସା ରଖିପାରୁ ନାହାନ୍ତି। ଅଫିସରଙ୍କୁ ନିଜ ମୁତାବକ ଚଳାଇବାକୁ ଚାହୁଁଛନ୍ତି। ଯିଏ ଚଳିପାରୁ ନାହିଁ ତାକୁ ପରିବର୍ତ୍ତନ କରୁଛନ୍ତି ବୋଲି ମିଶ୍ର କହିଛନ୍ତି।